Кумыктар (бэйэлэрин тылларынан: къумукълар ) — Дагестааҥҥа, Чечняҕа уонна Хотугу Осетияҕа олорор түүр тыллаах омук, Хотугу Кавказка баар саамай улахан түүр омуга.
Кумыктар Чечня Өрөспүүбүлүкэтигэр иккис (нууччалар кэннэ) уонна Хотугу Осетияҕа төрдүс (нуучча, ингуш уонна эрмээн кэнниттэн) элбэх ахсааннаах меньшинство буолаллар.
Кумыктар олорор сирдэрин Кумыкия (кумыктыы Къумукъ) диэн ааттыыллар.
Кумыктар Кавказка азербайдьааннар кэнниттэн иккис саамай улахан түүр тыллаах омук буолаллар.
Кинилэр былыргыттан олорор сирдэрэ: Кумык сирэ, Каспий күөлүн арҕааҥы кытыла, Дагестааҥҥа Моздок куорат, Кизляр (Гүчүк-йурт), Предгорное (Борасув-отар), Калининскай, Брагуны, Виноградное (Бамат-йурт) уонна Дарбанхи (Истисув).
2010 сыллаах биэрэпиһинэн Арассыыйаҕа 503,1 тыһыынча кумык олорор, онтон 431,7 тыһ. киһи Дагестааҥҥа баар.
РФ субъега | 2002 | 2010 |
---|---|---|
Ахсаан | Ахсаан | |
Дагестан | 365 804 | 431 736 |
Тюмень уобалаһа | 12 343 | 18 668 |
Ханты-Мансийскай автономнай уокурук | 9554 | 13 849 |
Ямало-Ненецкэй автономнай уокурук | 2613 | 4466 |
Хотугу Осетия | 12 659 | 16 092 |
Чечня | 8883 | 12 221 |
Ставропольскай кыраай | 5744 | 5639 |
Москва | 1615 | 2351 |
Москва уобалаһа | 818 | 1622 |
Астраханскай уобалас | 1356 | 1558 |
Ростовскай уобалас | 1341 | 1511 |
Волгоград уобалаһа | 895 | 1018 |
"Кумык" (къумукъ) төрдө чопчу быһаарылла илик. Чинчийээччилэр үксүлэрэ (Бакиханов, С. А. Токарев, А. И. Тамай, С. Ш. Гаджиева уонна да атыттар) бу ааты кимак эбэтэр куман . П. К. Услар этэринэн XIX үйэҕэ Хотугу Кавказка кумык эбэтэр кумук диэн аатынан дэхси сиргэ олорор түүр тыллаах омуктары ааттыыр этилэр. Дагестаҥҥа, Чечняҕа уонна Ингушетияҕа кумык диэн аатынан билиҥҥи эрэ кумыктары ааттыыр этилэр. Б. А. Алборов кумык диэн ааты түүрдүү «кум» (кумах) диэн тылтан таһаарбыт. Я. А. Фёдоров этэринэн VIII–XIX үйэлэргэ "гумик – кумык – кумух" диэн дьиҥнээх Дагестаан сирин аата.
XIX үйэҕэ А. В. Старчевскай кумык тылын тылдьытыгар бу омук атын аатын суруйбут – арияк; Н. Я. Марр буоллаҕына кумыктары тузлилэр [түзлүлэр — дэхси сиргэ олорооччулар] диэн ааттыыр.
Нууччалар уонна Европа дьоно кумыктары "Дагестаан татаардара", "Кавказ татаардара", "Терскай татаардар", черкестэр диэн ааттыыр этилэр.
Атын Дагестаан омуктара кумыктары маннык ааттыыллар: даргиннар — диркъаланти, авардар — лъарагӏал, лактар — арнисса, годобериннэр — гъумакиди, каратиннар — лъарагӏабди, ахвахтар — лъагӏидо, багвалиннэр — гьаргӏиди.
Чинчийээччилэр ыккардыларыгар кумыктар төрүттэрин туһунан биир кэлим санаа суох. С. М. Броневский диэн чинчийээччи кумыктары кыпчактары кытта ситимниир уонна кинилэр Дагестаан сиригэр XII–XIII үйэлэргэ көспүттэр диир. И. Клапрот этэринэн кумыктар Дагестааҥҥа хазардары кытта кэлбиттэр уонна кинилэр кэннилэриттэн хаалбыттар.
Сэбиэскэй кэмҥэ кумыктар өбүгэлэрэ түүр тылын ылыммыт олохтоох хайа омуктара буолуохтарын сөп диэн санаа тарҕаммыта. Бу сабаҕалааһыны аатырбыт түүр чинчийээччитэ В. В. Бартольд өйүүр этэ. Ол эрээри атын чинчийээччилэр, холобур, С. А. Токарев, В. Минорскай, Л. Лавров бу теорияны ылымматахтара.
Кумыктар тылларар кумык тыла буолар. Бу тыл түүр тыллар кыпчак бөлөҕөр киирэр. Кумык тыла 1930 сылларга диэри Хотугу Кавказ араас тыллаах омуктара кэпсэтэр уопсай тыллара этэ.
Кумык тыла карачай-балкар, Кырыым татаардарын уонна караим тылларыгар майгынныыр.
This article uses material from the Wikipedia Саха тыла (Saxa Tyla) article Кумыктар, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Маны туһанары CC BY-SA 4.0 лиссиэнсийэ көҥүллүүр (атын ыйыллыбытах буоллаҕына). Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Саха тыла (Saxa Tyla) (DUHOCTRUNGQUOC.VN) is an independent company and has no affiliation with Wiki Foundation.