Чорнобыль

Найскорша упоминка о Чорнобылю, под роком 1193, походить з Ипатийовского лѣтописа. Записаный Чорнобыль и в Список русских городов дальних и ближних (XIV. стороча). Належав шляхетным родам Кмѣтох, Сапѣг, Ходкевичох, котры были подданыма польской коруны. По другом роздѣлѣ Польщи (1793) переходить до Российской империи.

Первы податкы о том, же в Чорнобылю жили Евреи, суть од конця XVII. ст.. Под роком 1691 занотовано, же козакы под командов полковника В. Искрицкого учинили в Чорнобылю погром. Поступно Евреи стали ся найвекшов етничнов групов (року 1897 — 60 % обывательства). До року 1926 их частка упала до 39 % через погромы (1905, 1919–1920) ай миграцію. Ту быв еден зоз центрох хасидизму. Еврейска громада была знищена гитлеровцями (1941–1943).

Совѣтска влада настала 12. юна 1920. В року 1925 обывательох было 8,9 тыс. Од року 1930 выбудовали лодярску майстерню, што в року 1939 стала ся лодярньов, а од року 1955 оправовов базов днѣпровского флота. Атомову електрарню выставили в рокох 1970–1977. 26. апрѣля 1986 на 4. енергоблоку АЕ стала ся гавария. Обывательство перед гавариев было 13,3 тысяч особ (новембер 1985), на другый день по гаварии вшиткы зостали евакуованы.

Електрарня офи­ци­ал­но была затворена 15. децембра 2000. Про персонал и членох родин в Чер­ни­гов­ской области збудоване мѣсто Славутич. Днесь Чернобыль — мертве мѣсто, де приходить працовати на шихты лем персонал обслугы АЕ, вояци и полиция. Людскы поговоры затято пояснюють чорнобыльску трагедию розбуряньом незадовго перед тым мѣстным обывательством гробовой крипты едного зоз хасидскых духовных везирьох на еврейском теметовѣ Чорнобыля.

В сучасности Чорнобыль выступуе тыж як туристична атракция.

• Припять

• Переверзєв С.В. (2013). ЧОРНОБИЛЬ, місто Київської обл.. in В. А. Смолій (голова) та ін.. // Енциклопедія історії України. Т. 10: Т-Я. "Наукова думка". pp. 561–563. http://www.history.org.ua/?termin=Chornobyl_mst. укр.
• Елена Холоденко (23 июля 2021). Чернобыль туристический. Русская служба Радио Свобода. https://www.svoboda.org/a/31345788.html. [перевірено 2021-11-16]. русс.
• Чернобыль. Электронная еврейская энциклопедия. 2021. https://eleven.co.il/diaspora/communities/14672/. [перевірено 2021-11-12]. русс.