Потсдамска конференция — официална дипломатична встрѣча лидерох трьох найвекшых держав антигитлеровской коалиции в Другой свѣтовой войнѣ.
Конференция ся одбывала од 17. юла по 2. августа 1945 в замку Цецилиенхоф в Потсдамѣ (поблиз Берлина), а ей главныма участниками были Предсѣдатель Совѣта Народных Комисарьох СССР И. В. Сталин, Президент США Г. Трумен, Премьер-министер Великой Британии В. Черчил, которого 28. юла заступив новый Премьер-министер К. Еттли. Участниками конференции были тыж министры загранича, военны радникы и експерты.
Конференция ся догваряла о повойновом урегулованю в Европѣ, але не складовала мирны договоры: тота задача была лишена на Раду министрох загранича. До той Рады вошли министры загранича СССР, США, Великой Британии, Франции и Китая, а было на них покладене приготовлѣня мирного урегулованя з бывшыма союзниками Германии — Италиев, Румыниев, Болгариев, Мадярщинов и Финландиев, а по створѣню новой сполочной нѣмецкой влады — приготовлѣня мирного договора з Германиев.
Найскорше мав быти рѣшеный вопрос администрации пораженой Германии. Она была подѣлена на четыри окупачны зоны: совѣтску, британску, америцку и французску, кажда под войсковов администрациев. Про сполочны вопросы была створена Союзна Контролна Рада. Ей политика ся мала базовати на «пятьох Д», доеднаных скорше в Ялтѣ: демилитаризация, денацификация, демократизация, децентрализация, деиндустриализация. Были догоджены репарации, дѣльба войскового маетку и заграничных активох Германии. Конференция постановила передати СССР Кенигсберг (од року 1946 Калининград) и прилеглу територию. По острой дискузии была догоджена западна границя Польщи, котра тыж достала часть Восточной Пруссии и вольный город Данциг (днесь Гданьск). Перемѣна границь была подкрѣплена рѣшѣньом о депортации нѣмецкого обывательства з Польщи, Чехословакии и Мадярщины.
Хоть в зачатку конференции чекали приятельску атмосферу и добру волю участникох, як то было на попередных встрѣчах еще в току войны, теперь, по конци войны в Европѣ, каждый остро стояв за властны интересы и Черчил быв найвеце застараный мотивами и неуступностьов Сталина. З другого боку, Трумен, котрый при зачатку конференции достав новину, же в США успѣшно выпробовали атомову бомбу тискнув на Сталина з позиции силы, добиваючи ся уступок.
Рѣшѣня конференции мали великый вызнам про наступне повойнове мирне урегулованя в Европѣ, выкорѣнѣня германского милитаризма и национал-социализма.
This article uses material from the Wikipedia Русиньскый article Потсдамска конференция, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Обсяг є доступный під CC BY-SA 4.0, кідь не є вказане інше. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Русиньскый (DUHOCTRUNGQUOC.VN) is an independent company and has no affiliation with Wiki Foundation.