Леонид Ильич Брежнев

Леонид Ильич Брежнев, укр. Леонід Ілліч Брежнєв, *19. децембра 1906 (6.12 Юл.кал.), Камяньске Днѣпропетровской области Украины — †10. новембра 1982, Москва, СССР — совѣтскый партийный функционарь и штатник.

Леонид Ильич Брежнев
В Берлинѣ, 1967
Генералный СекретарьКомунистичной партии СССР (до 1966 Первый Секретарь)
Во функции:
14. октобер 1964 — 10. новембер 1982
Предходник	Никита Сергеевич Хрущов
Наступник	Юрий Владимирович Андропов
Уродив ся	децембра 19, 1906(1906-12-19) Камяньске Днѣпропетровской области Украины
Умер	новембра 10, 1982 (75 р.) Москва
Политична партия	комунистична
Шаржа	Маршал СССР
Леонид Ильич Брежнев на Викискладѣ

Брежнев быв совѣтскый политик украинского походжѣня, котрый стояв на чолѣ Совѣтского Союза од рока 1964 до своей смерти в року 1982. Подля тырвалости свого лидерства быв другый по Сталинови. В року 1976 став ся маршалом Совѣтского Союза, а так тыж другым по Сталинови партийным лидером, котрый мав найвысшый военскый ранг.

Партийну карьеру зачав в року 1938 в Днѣпропетровском областном комитетѣ Комунистичной партии Украины. В часѣ Другой свѣтовой войны быв политичным комисарьом в розличных военскых единках Червеной армады и закончив войну в шаржи генерал-майора яко началник Политичной справы IV. Украинского фронта. Ту ся стрѣтив и сприятелив з Хрущовом.

На роздѣл од Хрущова, свого предходника, Брежнев не быв ентузиастом процеса десталинизации, не подтримовав реформы. Быв конзервативный, острожный и усиловав ся принимати рѣшѣня консензусом, и так его доба была характерна социалным и економичным упадком в державѣ, корупциов и непотизмом и достала назву Брежневова стагнация.

Напротив, великы ресурсы были напрямлены на военскый промысел, войсковы и космичны програмы. В добѣ Брежнева СССР досяг паритет зоз США в стратегичном нуклеарном вызброю, а в космичных програмах став ся лидером.

СССР активно подпоровав «народно-ослободителны войны» в розличных частях свѣта. В року 1968, в часѣ Пражской яри, прогласив право СССР интервеновати военсков силов, «кедь общы интересы социалистичных держав огрожены в едной зоз членскых держав», што на Западѣ достало назву Брежневовой доктрины. На основѣ той доктрины интервеновав в Чехословакии (1968) и Афганистанѣ (1979).

В списку орденох и медалий, котрыма были вызнаменаны заслугы Леонида Ильча Брежнева суть 72 найвысшы вызнаменаня не лем од СССР, але и од Аргентины, Афганистана, Болгарии, Вьетнама, Гвинеи, ГДР, Етиопии, Индонезии, Йемена, КЛДР, Кубы, Лаоса, Мадярщины, Монголии, Перу, Польщи, Финландии, Чехословакии, Югославии.

Брежнев штырикрат Герой Совѣтского Союза (1966, 1976, 1978, 1981), другый по маршалови Жукову, штырикрат Герой Болгарии (1973, 1976, 1978, 1981), трикрат Герой Чехословакии (1970, 1976, 1981), Герой Кубы (1981), Герой Лаоса (1981), Герой Монголии (1976).

• Украинский советский энциклопедический словарь в трех томах. / Кудрицкий А.В. и др. (ред.). Главная редакция Украинской Советской Энциклопедии им. М.П. Бажана. К., 1988. Том 1. ISBN 5-88500-001-8
• Leonid Brezhnev, president of Union of Soviet Socialist Republics. //Encyclopaedia Britannica.
• Брежнев Леонид Ильич. //Справочник по истории Коммунистической партии и Советского Союза 1898 - 1991