Жан ле Рон д'Аламбер, фр.
Жан ле Рон д'Аламбер | |
---|---|
фр. Jean le Rond d'Alembert | |
Д'Аламбер, меццотинта од П. М. Аликса | |
Имя при уроджѣню | Жан ле Рон |
Познатый як | филозоф, математік, фізік, музикознавець, перекладатель, писатель, теоретик музики, Encyclopédistes, инженер, астроном, лексикограф, інтелектуал |
Горожанство | Франція, Королівство Франція |
Уроджѣня | новембра 16, 1717 Париж, Франция |
Упокоеня | октобра 29, 1783 (65 р.) Париж, Франция |
Причина | одказ од операции камѣнной хвороты |
Похованя | Катакомби Парижа |
Научна робота | |
Сферы наук | математика, физика, астрономия, филозофия |
Ученый ступень | рядный член Академии |
Alma mater | Французска Академия Наук |
Главны роботы | парадокс Даламбера, Даламбертіан, Енциклопедія, або Тлумачний словник науки, мистецтва й ремесел |
Узнаня | |
Членство в | Берлинской Академии Наук Петербургской Академии Наук, Французской Академии Наук, Америцкой Академии Умѣлств |
Одзнакы | |
член Лондонского Кралевского Общества | |
Жан ле Рон д'Аламбер на Викискладѣ VIAF:46756283; GND:11850178X; LCCN:n50059010; FAST:18569; BNF:118883708; OL:OL1155860A; |
Жан ле Рон д'Аламбер родив ся 16. новембра 1717 в Парижу яко копылча. Его мати, писателька и салоньерка баронка де Тансен (de Tencin), по породѣ лишила го под дверми парижской церкви Сен-Жан-Ле-Рон, одты при крестѣ достав имя Жан Ле Рон. Его отець, офицер канонѣрства шевалье Детуш (Destouches), не быв того часу в Парижу, слабе дѣтинча дали на воспитаня женѣ скларя, мадам Руссо (Rousseau), а в той родинѣ пак жив около 50 рокы. Его природный отець тайно заплатив за его добру выуку, а при смерти своей (1726) в тестаментѣ одказав му доживотне утримованя 1200 ливры рочно, хоть до отцьовства ся не признав. Жан выбрав собѣ призвиско д'Аламбер, коли мав ся записати до школы. Учив ся в Collège Mazarin, котрый вели янсенисты, де ексцеловав своим наданьом до математикы. По зысканю ступня Бакалавра умѣлств (1735) и понукали му священничу карьеру, котру не хотѣв. Выштудовав право в правничой высокой школѣ и року 1738 достав диплому адвоката.
Але ани то не стало ся его поволаньом. В року 1738, пак в 1739 подав двѣ математичны роботы до Академии Наук, а тоты были вызнаны за так важны, же в року 1741, 23-рочный, зостав дописным членом Академии. В року 1746 за роботу о теории вѣтру зыскав награду Берлинской Академии Наук и зостав выбраный за ей дописного члена. Найвекшу славу му принесли его статьи, написаны про Енциклопедию, котру робив въедно з Дени Дидро (первый том появив ся року 1751), и зостав выбраный за рядного члена Академии (1754). В року 1759 вшак лишать роботу в Енциклопедии по острой критицѣ 7. тома, де была редагована ним статья о Протестансткых Церквах, подана Волтером. В року 1764 быв выбраный за чужоземного честного члена Петербургской Академии Наук, а в року 1781 за члена Америцкой Академии Умѣлств.
Хоть жив скромно у своей невластной матери, не прияв позваня российской императрицѣ Катарины Великой и прусского короля Фридриха ІІ. прийти там на добру платню.
Умер року 1783, одказавши ся од операции мочокамѣнной хвороты. Через незгоду з Церквов погребеный без службы и в неозначеном гробѣ.
17.-18. ст. были часом бурного формованя модерной математикы. Албер Жирар в року 1629 сформуловав основну теорему алгебры, але доказати ю не было в силѣ тогдышной математицѣ. Д'Аламбер быв первый, кто доказав тоту теорему (1748), хоть и не цѣлком строго.
В року 1768 установив критерий збѣговости числовых рядох, котрый днесь познають в математицѣ яко д'Аламберов критерий.
Главны математичны выгледованя д'Аламбера были в области диференциалного числѣня, де он найшов метод рѣшѣня волновой ровницѣ, едной зо закладовых ровниць математичной физикы. Такы вырахункы потребны в акустицѣ, електродинамицѣ, при математичном моделованю гравитачных волн.
В року 1743 д'Аламбер понукнув так званый д'Аламберов принцип, котрый дозволив генерализовано привести задачи руху неслободной системы (машины, механизмы и т. п.) ку задачам статикы. Тот принцип дозволив рѣшати компликованы задачи вырахованя руху небесных тѣл.
Занимав ся и теориев гравитации. Великый принос зробив до небесной механикы.
В филозофии д'Аламбер быв путаный и недослѣдный. Не став на позициях материализма, але зачавши од сенсуализма, хылив все май до скептицизма. Яко скептик, д'Аламбер подтримовав неприятельске становиско Волтера и Дидро ку христианству, але змагав ся быти осторожный, обы не наразив ся Церкви. Авшак выгнаня йезуитох зоз Франции подвигло го публиковати «од несторонного автора» раз анонимно, а пак отворено, статью О спустошѣню йезуитох во Франции (Sur la destruction des Jésuites en France, 1765), де змагав ся указати, же йезуиты, при их заслугах, як ученых и воспитательох, скраховали через свою надмѣрную жадность ку власти.
Межи найвекшыма подѣями в просвѣтительствѣ 18. ст. была Енциклопедия, або толковник наук, умѣлств и ремесел (Encyclopédie ou Dictionnaire raisonné des sciences, des arts et des métiers, Paris, 1751-1772) — 28 томы, де д'Аламбер написав вступне слово и высше як 1000 статей, главнѣ з математикы и физикы.
Писав тыж на темы музикы, истории, литературы. В послѣдных роках, яко добрый знатель латины, робив товмачѣня з Тацита, котры высоко оцѣнив Дени Дидро.
Потомкы не потвердили думку тых сучасникох, котры поставили д'Аламбера в еден ряд з Волтером. Наперек свому приносу в математичны наукы, интелектуална несмѣлость не дала его литературно-филозофской роботѣ досягти вершин. Мимо того, научна основа помогла му вывинути филозофию наукы, з рационалистичным идеалом конечной единости всякого знаня. И в животѣ, и в роботѣ крачав з достойностев и серйозным смыслом. В особном животѣ быв простый и скромный, никда не жадав богатства и роздавав хариту, коли то было можне, фурт уважав, обы зостав честный и независимый, и все ужив свой вплыв як водну краины, так и в заграничу, обы заохотити просвѣтительство.
This article uses material from the Wikipedia Русиньскый article Жан ле Рон д'Аламбер, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Обсяг є доступный під CC BY-SA 4.0, кідь не є вказане інше. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Русиньскый (DUHOCTRUNGQUOC.VN) is an independent company and has no affiliation with Wiki Foundation.