Teotihuacan

La formacion de la ciutat acomencèt probablament dins lo corrent dau sègle II avC belèu a l'iniciativa dei Totonaques. Tre lo sègle seguent, venguèt una vila fòrça poblada e un centre intellectuau, culturau e religiós major dau periòde. Conoguèt son apogèu entre lo sègle III e lo sègle VI. Dins lo corrent d'aqueu periòde, sa populacion èra probablament situada entre 100 000 e 200 000 abitants e Teotihuacan èra alora la premiera vila dau continent e la seisena pus importanta dau mond. Èra tanben lo centre religiós pus important de Mesoamerica amb uneis edificis monumentaus, coma lei Piramidas dau Soleu, de la Luna e dau Sèrp de plumas, bastits a l'entorn d'una lònga carriera dicha Cauçada dei Mòrts. Son influéncia intellectuala, culturala e religiosa aguèt de consequéncias importantas sus lei Maias e sus lo desvolopament dei civilizacions ulterioras de la region. En particular, lo Sèrp de plumas e sa forma Quetzalcoatl, divinitat que sembla originària de Teotihuacan, gardèron una importància gròssa fins a la conquista espanhòla au sègle XVI. En revènge, l'existéncia d'un estat ò d'un empèri poderós centrat sus la vila es totjorn l'objècte de debats car, en fòra de l'importància dei vestigis descubèrts, ges d'element permet de l'establir d'un biais segur.

Lo declin de la vila acomencèt dins lo corrent dau sègle VI. Sei monuments principaus foguèron pilhats e cremats e la ciutat abandonada entre lei sègles VII e VIII. Lo scenari classic explicant aqueu declin es basat sus d'invasions dei nomadas chichimècs ò d'autrei vilas de la region. Pasmens, d'estudis pus recentas mòstran tanben la possibilitat d'un afondrament entraïnat per de crisis intèrnas, especialament de crisis agricòlas que semblan venir recurrentas a partir deis annadas 530.

• 
  Fotografia de la Piramida dau Soleu en 2006.
• 
  Fotografia de la Piramida de la Luna en 2006.
• 
  Fotografia de la Piramida dau Sèrp de plumas en 2008.
• 
  Fotografia de la Cauçada dei Mòrts dempuei la Piramida de la Luna. A senèstra, s'observa la Piramida dau Soleu.
• 
  Pintura representant la Granda Divessa de Teotihuacan que sembla èsser estada una divinitat majora deis abitants.
• 
  Masca de maubre (sègles III-VII).
• 
  Representacion possibla de la conquista militara de Teotihuacan per lei soudats de la ciutat de Cacaxtla.

• Mesoamerica.
• Quetzalcoatl.
• Piramida de la Luna.
• Piramida dau Sèrp de plumas.
• Piramida dau Soleu.