Høgfartsbaner I Thailand

Fram til 2019 var det bygd omlag 3,5 kilometer bane.

I oktober 2010 godkjende nasjonalforsamlinga i Thailand førebels planar for eit høgfartsbane-nettverk. Fem baner som skulle kunna handsama tog på opptil 250 km/h skulle stråla ut frå Bangkok.

Bana mellom Nong Khai og Bangkok

Anleggsfase 1

Strekninga mellom Nakhon Ratchasima og Bangkok er under utbygging. I 2021 vart det rapportert at bana kunne vera i drift i 2026. Prosjektet er thai-kinesisk.

Andre stoppestadar vil vera Ayutthaya og Saraburi. Farten skal etter planen komma opp i 250 km i timen.

Anleggsfase 2

 

Bana frå riksgrensa til Nakhon Ratchasima var venta å vera i drift frå 2028, ifølgje rapportar i 2021. Finansieringa for heile strekninga frå Nong Khai (i Nong Khai-fylket) til Nakhon Ratchasima, er ikkje klar. Det er planlagt stoppestadar i Khon Kaen, Udon Thani, Nong Khai.

Per april 2019 jobbar ein med å planlegge anleggsfase 3: ei bane mellom hovudstaden i Laos og Nong Khai (i Thailand), Nong Khai-Vientiane Railway Connecting Line.

«Flytog» mellom fylka Rayong, Chonburi, Chachoengsao, Samut Prakan og Bangkok

 

Ei høgfartsbane mellom U-Tapao-flyplassen i Rayong-fylket og Bangkok kjem tidlegast i drift i 2025 eller 2026. Bana skal ha endestasjon på flyplass i Bangkok (Don Mueang-flyplassen) og i Rayong-fylket, og bana skal òg ha stasjon tilknytt Suvarnabhumi-flyplassen i Samut Prakan-fylket. Avgjersla om å bygga høgfartsbana vart teken av regjeringa den 28. mars 2018. Bana skal ha ni stasjonar: Don Mueang, Bang Sue, Makkasan, Suvarnabhumi, Chachoengsao (hovudstaden i Chachoengsao-fylket), Chon Buri (hovudstaden i Chonburi-fylket), Sri Racha, Pattaya og U-tapao. Den foreslåtte bana vert kalla ein Eastern Economic Corridor (EEC) high-speed railway.