تاج محل
تاج محل ات‌سری قَورِ نوم هسته که آگرا، اوتارا پرادش، هند دله درنه.
تاج محل ره هند مغول سلسله بساتنه و شاه جهان (حکومت ١۶٢٨–۵٨) ونه بساتن دستور ره هدا تا ونه زنا ممتاز محل، که سال ١۶٣١ وچه بزائن گدر بمرده، ره اونجه چال هکنن. تاج محل ِمعماری خله خاص هسته و ونه دله تناسب و قرینه بی‌ین خار-خار رعایت بیّه. تاج محل ره مغول معماری ِبتترین نمونه‌ها جه دونّه که اتا پشو-بزه معماری هسته که ایرانی و هندی و اسلامی معماری شیوه‌ئون ونه دله هئی‌بزه هستنه. تاج محل بنا خله دنیا دله معروف هسته و هر سالنه میلیون‌ها نفر اِنّه که وه ره نزدیک جه هارشن. سال ١٩٨٣ تاسا هم یونسکوی جهونی میراث لیست دله دره.
تاج محل ताज महल (هٮندی) تاج مَحَل (اردو) تاج محل (فارسی)  
|
این سری بنائون ِپلان ِطراحی ره خله معمارون جه نسبت هدانه ولی احتمالاً ونه اصلی معمار نوم إستا احمد لاهوری بی‌یه که اتا ایرانی‌تبار مردی بی‌یه. مجموعه دله پنج‌تا اصلی عنصر درنه که اصلی دروازه، باغ، مسجد، جواب (بنایی که مسجدِ دیم‌به‌دیم و آینه‌مونا هسته) و مقبره (که چارتا گلدسته دارنه) هستنه. ونه بساتن حدود سال ١۶٣٢ شروع بیّه و بیش از ٢٠٠٠٠ کارگر که هند، ایران، عثمانی و اروپا جه اِمونه، حدود سال‌های ١۶٣٨-١۶٣٩ استخدام بَینه. تا سال ١۶۴٣ بکشی‌یه که وصله‌بزه ساختمون‌هایِ کار هم تموم بوو و تزئینات ِکار هم اقلاً تا سال ١۶۴٧ ادامه داشته. سرجمع این مجموعه ١٧ هکتار گتی دارنه و ونه بساتن ٢٢ سال طول بکشی‌یه.
اتا آسنی دره که گنه شاه جهان خاسته اتا اینتی کاخ دستوری، روخنه‌یِ اون وَر سمت بساجه که ونه مصالح سیو مرمر سنگ بوئه و وه ره اونجه چال هاکنن ولی سال ١۶۵٨ ونه ریکا اورنگ زیب وه ره کنار بزوئه و شاه بیّه و شه پی‌یر ره تا آخر عمری آگرای قلعه دله زندونی داشته.
منابع
This article uses material from the Wikipedia مَزِروني article تاج محل, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). محتوا جه تحت CC BY-SA 4.0 دسترسی دارنی، مگر اینکه ونه خلاف ثابت بَواشه. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki مَزِروني (DUHOCTRUNGQUOC.VN) is an independent company and has no affiliation with Wiki Foundation.