Reciclaige ye l porcesso de cumberson de çperdício an materiales ó perdutos de potencial outelidade.
Este porcesso permite reduzir l cunsumo de matérias-primas, d'outelizaçon de einergie i la poluiçon de l'aire i de l'auga, al reduzir tamien la necidade de tratamiento cumbencional de lhixo i l'eimisson de gases de l'eifeito stufa. La reciclaige ye un cumponente eissencial de la geston de resíduos moderna i ye l terceiro cumponente de la hierarquia de ls resíduos "reduzir, reutelizar i reciclar".
Antre ls materiales reciclables stan dibersos tipos de bidro, papel, metal, plástico, tecido i cumponentes eiletrónicos. La cumpostaige ó reutelizaçon de detritos biodegradables, cumo lhixo de cozina ó de jardin, tamien ye cunsidrada reciclaige.Ls materiales para séren reciclados son trasportados para un centro de reciclaige ó recolhidos puorta la puorta i depuis apartados, lhimpos i reprocessados an nuobos materiales para porduçon andustrial.
An sentido strito, la reciclaige dun material porduzirie idéntico material an bruto; por eisemplo, papel de scritório ousado serie cumbertido an nuobo papel de scritório, ó spuma de poliestireno an nuobo poliestireno. Inda assi, esto ye giralmente cumplexo ó mais caro quando cumparado cula porduçon de raiç de l mesmo material, pul que la reciclaige de muitos perdutos ó materiales amplica la sue reutelizaçon na porduçon de materiales defrentes; por eisemplo, l papel puode ser cumbertido an carton. Outra forma de reciclaige ye la separaçon i recolha de materiales a partir de perdutos cumplexos, quier debido al sou balor monetairo (p.i. chombo de bateries outomobles ó ouro de cumputadors), quier debido a la sue natureza nociba (p.i. remoçon de mercúrio de bários perdutos).
This article uses material from the Wikipedia Mirandés article Reciclaige, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Cuntenido çponibelizado ne ls termos de la CC BY-SA 4.0, salbo andicaçon an cuntrairo. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Mirandés (DUHOCTRUNGQUOC.VN) is an independent company and has no affiliation with Wiki Foundation.