La Carta Ouropeia de las Lhénguas Regionales ó Minoritairas, Carta Ouropeia de las Lénguas Regionales ó Minoritairas (an sendinés), ó Carta Ouropeia de las Lhénguas/Lénguas Regionales ou Minoritairas (an pertués: Carta Europeia das Línguas Regionais ou Minoritárias, an anglés: European Charter for Regional or Minority Languages, i an francés: Charte européenne des langues régionales ou minoritaires) ye un tratado ouropeu (CETS 148) adotado pul Cunseilho de la Ouropa an Estrasburgo a 5 de nobembre de 1992, que antrou an bigor a 1 de márcio de 1998, pa la defénsia i pormoçon de las lhénguas regionales i minoritairas stóricas de la Ouropa, bien cumo las lhénguas sien território i las lhénguas oufeciales menos outelizadas.
Solo ye aplicable nas lhénguas outelizadas tradecionalmente (cun eiceçon antoce, de las lhénguas ampregadas pula eimigraçon reciente de ls outros cuntinentes ó dialetos de la lhéngua oufecial de l Stado an causa), que ténen defréncias segneficatibas cula lhéngua meioritaira ó oufecial.
Las lhénguas que son oufeciales an regiones ó porbíncias de ounidades outónomas nun Stado nó central (cumo l catalan, galhego, basco i l aragonés an Spanha) nan stan classeficadas cumo lhénguas oufeciales de l Stado, i antoce, puoden se beneficiar de la carta. Por outro lhado, hai l causo de la República de la Eirlanda que nó pudo assinar eilha an fabor de la sue lhéngua mai (anque seia minoritaira), porque l gaélico eirlandés ye defenido cumo lhéngua oufecial de l Stado. Mas, l Reino Ounido ratificou la carta an fabor desta lhéngua (antre outras, tales cumo l córnico, manés, scocés i l gaélico scocés), ua beç que tamien ye falada na Eirlanda de l Norte.
An 2017, l cunceilho pertués de Miranda de l Douro fui scuolhido cumo lhocal de acolhimiento de l Ancuontro Ouropeu de las Lhénguas Minoritairas, que tubo ls repersentantes de l Cunseilho de la Ouropa, gobierno pertués i studiosos pa la abaluaçon de la antrada de la lhéngua mirandesa na carta.
This article uses material from the Wikipedia Mirandés article Carta Ouropeia de las Lhénguas Regionales ó Minoritairas, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Cuntenido çponibelizado ne ls termos de la CC BY-SA 4.0, salbo andicaçon an cuntrairo. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Mirandés (DUHOCTRUNGQUOC.VN) is an independent company and has no affiliation with Wiki Foundation.