ဗောဓိသတ်ဒှ်ဗမၞး
ဒၞဲါဝွံ ကျာ်တြဲသဗ္ဗညုမစိုန်ဒှ်တဴအ္စာမၞိဟ်ဒေဝတဴ ဃောမပဒတဴပ္ဍဲဘာဇေတဝန် ပဟိုတ်ကဵုခမဳမွဲ မလေပ်က္တဵုဗဒှ်ကဵုအမ်သဝ်တုဲ တွံတဴဥဒ္ဒါလကဇာတ်ဝွံရောၚ်။
ခမဳဂှ် ၜိုန်ရပခမဳပ္ဍဲသာသနာကျာ်တြဲ မလေပ်ကဵုတိတ်ဗၠးနူဒဒိုက်ဝဋ်သံသာတုဲကီုလေဝ် တၞဟ်နဖိုပစ္စယ်ပန်က္တဵုဗဒှ်ဝတ္ထုမဂပ်ဝ်အမ်သဝ် မဒှ်တၟေၚ်ဟ်တၞဟ်ဟ်သာ်ရ၊ ကာလဂှ် ခမဳဂမၠိုၚ် သၟိက်သ္ပပြာကတ်မသက္ကဂုဏ်ခမဳဂှ် ဂဇအ်ဒၟံၚ်ပ္ဍဲဇြပ်သ္ဘၚ်ဓရ်တုဲ က္တဵုဗဒှ်ဂလာန်အိုတ်ရ။ ယွံကောန်တၠတံ ခမဳမဟိမုဝွံ သီုမပခမဳပ္ဍဲသာသနာကျာ်တြဲမလေပ်ကဵုတိတ်ဗၠးနူဒဒိုက်ဝဋ်သံသာမၞုံသ္ဘဴမဖှ်သာ်ဝွံ နိဿဲကဵု ပွမသ္ပအမ်သဝ်တုဲ ဂယိုၚ်လမျီုရ၊ ရဴဝွံ က္တဵုဗဒှ်ဂလာန်အိုတ်ရ၊ ကျာ်တြဲသဗ္ဗညုက္ညကၠုၚ်တုဲ ယွံခမဳတံ ပ္ဍဲကာလလၟုဟ်ဝွံ မူရဴနဂလာန်မွဲ ကောံဓရီုဒၟံၚ်အိုတ်ရော ရဴဝွံသၟာန်တုဲ နဂလာန်မဟိမု ကောံဓရီုဒၟံၚ်အိုတ်ရအဴ။ ရဴဝွံ နကြိဂရၚ်ပ္တီနေဝ် ယွံခမဳတံ ပ္ဍဲကာလၟုဟ်ဟေၚ် ခမဳဝွံ လေပ်က္တဵုဗဒှ်ကဵု အမ်သဝ်ဟွံသေၚ်ဏီ ပ္ဍဲကာလတမၠာတေံကီုလေဝ် ခမဳဝွံ လေပ်က္တဵုဗဒှ်အမ်သဝ်ဟေၚ်ရောၚ်၊ ရဴဝွံသ္ဂးတုဲ ဇက်နေၚ်ဇာတ်အတိက်ရ။
ပ္ဍဲကာလအတိက်တေံ ဍုၚ်ဗာရာဏသဳ သၟိၚ်ဗြဟ္မဒတ္တ နကြိပ္ကၚ်ရၚ်ဍုၚ်နေဝ် ဗောဓိသတ်ဒှ်ပြောဟိတ် သၟိၚ်ဗြဟ္မဒတ္တဂှ်ရ၊ နွံကဵုပညာဆိုက်ဗဒက်စဳကၠးရ၊ ပြောဟိတ်ဂှ် နွံကာလမွဲတ္ၚဲ နကြိအာဝေၚ်ဥဒျာန်နေဝ် ညာတ်ညးဗြဴစရာဲဍုၚ် ရုပ်သာ်ကျေဝ်ဂေါဝ်ဗွဲမလောန်မွဲ မၞုံစိုတ်ထၞေန်စပ်တုဲ ပံၚ်ဖက်ကေုာံ ဗြဴစရာဲဍုၚ်ဂှ်ရ၊ ဗြဴစရာဲဍုၚ်ဂှ် နိဿဲကဵုပြောဟိတ်ဂှ်တုဲ ကၠိဂွံဂၠံဂဝ်ရ၊ တီဒဒှ်ဂၠံဂဝ်တန် ဟီုကဵုပြောဟိတ်ဂှ် ယွံတၠအဲ ဂၠံဂဝ်တန်အာရ၊ ပ္ဍဲကာလသၠးဂၠံဂဝ် ကြက်ခုတ်ယၟုရ၊ ဗီုလဵုဂွံခုတ်ယၟု ကုညးဂှ်ရော ရဴဝွံသၟာန်ရ၊ ပြောဟိတ်ဂှ်ချပ် ဟိုတ်နူမက္တဵုဒှ် ပ္ဍဲဗုၚ်ဂၞဴဗြဴစရာဲဍုၚ် တၞဟ်နသ္ပယၟုဂကူဟွံသၟဟ်အစောံရဴဝွံချပ်တုဲ ယွံၝောံ တၞံဆုကျာပိုက်ဒၟံၚ်ဝွံ ဥဒ္ဒါလကမ္ဂးယၟရ။ ဟိုတ်ဒဒှ်မဂဝ်ဝ်ကၠိဂွံပ္ဍဲဒၞာဲဝွံယၟုမ္ဂး ဥဒ္ဒါလက ခုတ်ယၟုကုညးဂှ်ရ၊ ရဴဝွံဟီုတုဲ လစိန်ကီုလေဝ်ကဵုရ၊ ယဝ်ဒှ်ကောန်ဗြဴမ္ဂး နလစိန်ဝွံ မြိမြန်ကောန်ၚာ်ဗြဴဂှ်ညိ၊ ယဝ်ဒှ်ကောန်တြုံမ္ဂး ကာလအာစိုပ်အဝယ်ဗၠာဲ ကောန်ၚာ်သၟတ်ဂှ် ထ္ၜးကုအဲညိ ရဴဝွံဟီုရ။
ဗြဴစရာဲဍုၚ်ဂှ် ပ္ဍဲသွဝ်ကြဴ ၜံၚ်ကောန်တြုံတုဲ ယၟုမ္ဂး ဥဒ္ဒါလကခုတ်ယၟုကုကောန်တြုံဂှ်ရ၊ ဥဒ္ဒါလကဂှ် နကြိအာစိုပ်အဝယ်ဗၠာဲနေဝ် ယွံမိမအံက်အဲညးဂှ်ရော ရဴဝွံသၟာန်မိရ၊ ယွံကောန်သ္ဍိုက် ပြောဟိတ်ရောၚ်၊ ရဴဝွံဟီုရ၊ မအံက်အဲဂှ် ယာံဒှ်ပြောဟိတ်မ္ဂး ကြက်ဗ္တောန်ဗေဒၚ်ရ။ ရဴဝွံလစိန်နူတဲမိကီု သွက်အ္စာကီု ဂိုၚ်ကေတ်တုဲ အာဍုၚ်တက္ကသဵု သီုမကတ်ကွတ်ပ္ဍဲဇရေၚ်အ္စာဒိသာပါမောက္ခ ညာတ်ဂကောံဣသိမွဲတုဲ ပ္ဍဲဇရေၚ်ညးဂမၠိုၚ်ဝွံ ကွတ်မပြဲနွံသဒှ်ရ၊ ကြက်ကတ်ကွတ်ဂှ်ရ၊ ရဴဝွံ ဗွဲအစောံမမဂ်ဂၠက်ပ္ဍဲကွတ် ပခမဳဣသိတုဲ ကၠောန်တဴဒ္ဂေတ်ဝတ်ညးဂမၠိုၚ်ဂှ်တုဲ ယွံအ္စာတံ ကွတ်မၞးတံလေပ်ဂှ် သြဝ်ဗ္တောန်ကဵုအိုတ်ညိ၊ ရဴဝွံဟီုရ၊ ဣသိဂမၠိုၚ်ဂှ် နနဲကွတ်ဇကုဇကုဟေၚ် ကဵုဥဒ္ဒါလကဂှ် ကတ်အိုတ်ရ၊ ပၞောဝ်ဣသိမသုန်ကၠံဂမၠိုၚ် ဣသိမွဲကီုလေဝ် ပညာလောန်လ္တူနူဥဒ္ဒါလကဂှ်ဟွဲ ဥဒ္ဒါလကဂှ်ဟေၚ် ပညာပြဲလောန်လ္တူနူဣသိဂမၠိုၚ်ရ။
ကာလဂှ် ဣသိဂမၠိုၚ် ကောံဓရီုအိုတ်တုဲ အရာအ္စာဂှ်ကဵု ကုဥဒ္ဒါလကဂှ်ရ၊ ကာလဂှ် ဣသိဥဒ္ဒါလက ဟီုကုဣသိဂမၠိုၚ် ယွံမၞးတံ မၞးတံညးဂမၠိုၚ် ယၚ်ဒဒှ်မၞုံအာဟာရ သစ္ဆုရိုဟ်ဆုဂြိုပ်လၟိုန်ဂှ်ဒှ်တုဲ ပ္ဍဲဂြိုပ်ဟေၚ် ပဒတဴအိုတ်ရ။ မူဟိုတ်ဟွံအာဍုၚ်မၞိဟ်အိုတ်ရော၊ ရဴဝွံဟီုရ၊ ယွံတၠဣသိ မၞိဟ်ဂမၠိုၚ်မ္ဂး ကဵုဒါန်ဇၞော်တုဲ ကဵုသ္ပအနုမောဒနာအိုတ်ရ၊ ကဵုဟီုဂလာန် ဓရ်အိုတ်ရ သၟာန်ပြဿနာအိုတ်ရ၊ ပိုယ်ညးဂမၠိုၚ် ဟိုတ်နူပရိုက်ဘဲဂှ် ဟုံအာဒၞာဲဍုၚ်မၞိဟ်အိုတ်ရ ရဴဝွံဟီုအိုတ်ရ။
ယွံတၠဣသိတံ ၜိုန်ရသၟိၚ်စက္ကဝဝ်လဝ်ကဵုဒှ်အိုတ်ရ၊ ကေတ်ဏာအဲအိုတ်ညိ၊ ပွမဟီုမ္ဂးဂှ် တာလျိုၚ်အဲရောၚ်၊ မၞးတံလ္ပဖေက်အိုတ်ညိ၊ ရဴဝွံဟီုတုဲ မွဲဟာန်ကေုာံဣသိ ဂမၠိုၚ်ဂှ် သီုမဂေတ်ဂ္ၚေၚ်တဴဗွဲလၟေၚ်ၚ် စိုပ်အာဍုၚ်ဗာရာဏသဳ မံၚ်ပ္ဍဲဥဒျာန်သၟိၚ်တုဲ ဥဒ္ဒါလကဂှ် ပ္ဍဲတ္ၚဲယးဂတမွဲဟာန် ကေုာံ ဣသိဂမၠိုၚ်အိုတ်သီု တၞဟ်နဒုၚ်ပိဏ္ဍပါတ် ပ္ဍဲကွာန်တြၚ်ဍုၚ်အာရ၊ မၞိဟ်ဂမၠိုၚ် ကဵုဒါန်ဇၞော်အိုတ်ရ၊ ဣသိဂမၠိုၚ် ပ္ဍဲယးဂတလုပ်အာဍုၚ်အိုတ်ရ။ မၞိဟ်ဂမၠိုၚ် ကဵုဒါန်ဇၞော်အိုတ်ရ၊ ဣသိဥဒ္ဒါလက သ္ပအနုမောဒနာဒါန်ရ၊ ဖ္ဍောတ်မ္ၚဵုရ၊ သွဟ်ပြဿနာရ၊ မၞိဟ်ဂမၠိုၚ် လျုၚ်ဇြုၚ်သ္ဍိုက်အိုတ်တုဲ နပစ္စယ်ဂမၠိုၚ်ဗွဲမဂၠိုၚ် ကဵုဒါန်အိုတ်ရ၊ အလုံဍုၚ်မွဲ ဣသိအ္စဂိုဏ်တၠပညာစိုပ်ကၠုၚ်ရ၊ ရဴဝွံသၟာန်တုဲ မိၚ်မံၚ်ဒၟံၚ်ပ္ဍဲဥဒျာန်တုဲ ခိုဟ်သန်ရ၊ တ္ၚဲဏအ် ကြက်အာဗဵုလ္ၚောဝ်ဣသိဂှ်ရ။ ရဴဝွံဟီုရ၊ တြုံသ္ကံသၟိၚ်မွဲအာတုဲ သၟိၚ်ဇၞော် ကြက်ကၠုၚ်ဗဵုလ္ၚောဝ်ရ၊ ရဴဝွံဟီုလဴစ ဣသိဥဒ္ဒါလကရ။
ဣသိဥဒ္ဒါလကဂှ်ကီုလေဝ် ကော်ဂကောံဣသိတုဲ ယွံတၠဣသိတံ သၟိၚ်ကြက်ကၠုၚ်ရဂး သၟိၚ်မ္ဂးဂှ်တုန် အယာမာတ်မွဲတ္ၚဲ နကြိသ္ဍိုက်မၠိုက်ကဵုနေဝ် စဵုလ္အိတ်လမျီုတၞဟ်နဂယိုၚ်လမျီု သၟဟ်အစောန်မာန်ရ၊ ရဴဝွံဟီုရ။ ယွံအ္စာပသာ်သ္ဂောံရော ရဴဝွံနကြိသၟာန်နေဝ် ဣသိဥဒ္ဒါလကဂှ် ရဴသာ်ဝွံ ဟီုရ။ ပၞောဝ်မၞးတံညးဂမၠိုၚ် ညးလ္ၚဵုဂမၠိုၚ်ဒ္ဂေတ်တဴညံၚ်ရဴကဝအိုတ်ရ။ ဣသိလ္ၚဵုဂမၠိုၚ် ဒ္ဂေတ်မံၚ်လက်ဂဇုန်ဂှ် ဒ္ဂေတ်အိုတ်ညိ၊ ဣသိလ္ၚဵုဂမၠိုၚ် တိက်ပ္ဍဲဇၠအိုတ်ရ၊ ဣသိလ္ၚဵုဂမၠိုၚ် ပွမကတဴမသုန်ပြကာဂှ် ကဵုကတဴအိုတ်ညိ၊ ဣသိလ္ၚဵုဂမၠိုၚ် ကေၚ်ကာမစှေ်ဍာ်ဂှ် သြဝ်သ္ပအိုတ်ညိ၊ ဣသိလ္ၚဵုဂမၠိုၚ် ပ္ဍဲဒၞဲါဂှ်ဂှ် သှ်ဇျာဲဗေဒၚ်အိုတ်ညိ၊ ရဴဝွံဟီုရ။ ဣသိဂမၠိုၚ် မသုန်ကၠံဂှ် အတိုၚ်ဣသိဥဒ္ဒါလကဂှ် ဟီုသ္ပတဴအိုတ်ရ။ ဇကုတုန် ဣသိမၞုံကဵုပညာဂမၠိုၚ် ဒ္စာံကီု စှ်ကီု ဂိုၚ်ကေတ်တုဲ ပ္ဍဲဇိုၚ်ဗဗေက်မရာၚ်ဆာဲ မဂပ်ဝ်လဟိၚ်စိုတ် တၚ်စွံလဝ်လိက်မဂပ်ဝ်လဟိၚ်တုဲ သီုမတွဳပွိုၚ်လဝ် ဂကောံကွးဂဇအ်ဒၟံၚ် ပ္ဍဲသၞာမဂပ်ဝ်လးလဝ်ရ။
ပ္ဍဲခဏဂှ် သၟိၚ်ဂိုၚ်ကေတ်ပြောဟိတ်တုဲ နဗော်သွးဂမၠိုၚ်မဂၠိုၚ် အာဥဒျာန်တုဲ ညာတ်ဣသိဂမၠိုၚ် ဒ္ဂေတ်ဒၟံၚ်ဒ္ဂေတ်မိစ္ဆာအိုတ်တုဲ စိုန်တိတ်ဗၠးနူဘဲအပါယ်တုဲအိုတ်တုဲရ၊ ရဴဝွံလျုၚ်ဇြုၚ်သ္ဍိုက်တုဲ အာဇရေၚ်ဣသိဥဒ္ဒါလက သ္ပပွမဟီုဂလာန်တုဲ နကြိမံၚ်ပ္ဍဲဥဒျာန်ဌာန်မဗဗွဲတုဲနေဝ် မၞုံကဵုစိုတ်သ္ဍိုက်မၠိုက်တုဲ သၟိက်ဟီုဂလာန် ကေုာံ ပြောဟိတ်သ္ဂးတိုန် ဂါထာကိုပ်ကၠာဝွံရ။
This article uses material from the Wikipedia မန် article ဥဒ္ဒါလကဇာတ်, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ပရောပရာတၚ်လညာတ်တၞဟ်ယဝ်ရဟွံမွဲတှ်ေပ္ဍဲ CC BY-SA 4.0 မဒုၚ်ကေတ်မာန်ရ။ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki မန် (DUHOCTRUNGQUOC.VN) is an independent company and has no affiliation with Wiki Foundation.