Panyakik Tangan, Kaki, Jo Muluik: Flu Singaputa

Di Indonesia, panyakik ko biaso disabuik sabagai flu singapura. Biasonyo diawali jo damam sarato raso indak lamak di badan. Dalam ciek atau duo ari sasudahnyo, diikuti jo bintik-bintik atau tonjolan-tonjolan barisi aia di tangan, kaki, jo muluik, dan kadang-kadang di ikua jo salangkangan. Gejala jo tando biasonyo muncua 3 - 6 ari sasudah virus masuak di badan. Ruam-ruam kamerah biasonyo mailang dalam wakatu kiro-kiro sapakan. Kuku-kuku jari tangan jo kaki dapek tangga babarapo pakan kudian, tapi dapek tumbuah baliak.

Panyakik tangan, kaki, jo muluik PTKM
Namo lain	Flu Singapura Enteroviral vesicular stomatitis with exanthem
Lesi nan biaso timbua di sakaliliang muluik anak baumua 11 bulan
Spesialisasi	Panyakik infeksi
Gejala	Damam, ruam-ruam atau bintiak-bintiak baraia that may blister
Komplikasi	Tangga kuku jari samantaro, meningitis virus
Awitan	3–6 ari sasudah paparan
Durasi	Sapakan
Panyabab	Coxsackievirus A16, Enterovirus 71
Diagnosis	Manuruik gajalo, kultur virus
Panagahan	Cuci tangan
Parawatan	Pananganan suportif
Pangubekan	Ubek anti nyeri sarupo ibuprofen
Frekuensi	Bilo wabah
[edit on Wikidata]

Virus-virus panyabab PTKM ditularkan malalui kontak arek jo pandarito, malalui udaro dek basin jo feses dari urang nan tainfeksi. Objek atau benda nan lah takontaminasi dapek pulo jadi media panularan panyakik. Coxackievirus A16 adolah panyabab nan paliang acok, jo enterovirus 71 sabagai panyabab kaduo paliang acok. Tipe lain dari coxackievirus jo enterovirus dapek juo manularan panyakik. Sabagian urang dapek manjadi pambaok jo panular panyakik sajo tanpa mampunyoi tando jo gejalanyo. Binatang-binatang lainnyo indak manjadi panular panyakik ko. Diagnosis dapek ditagakan manuruik gejalanyo. Kadang-kadang, sampel liua atau kotoran dapek dipareso adonyo virus.

Cuci tangan dapek managah panularan, dan urang nan tainfeksi disaranan untuak indak pai karajo, sikolah, panitipan, atau tampek lain nan didatangi urang rami. Alun ado ubek antivirus atau vaksin nan dipakai. Banyak kasus alun mamaraluan ubek atau pananganan khusus. Ubek nyeri sarupo ibuprofen atau gel pamati raso di muluik dapek digunakan. Kadang-kadang, cairan intraven (infus) dapek diagiah untuak anak-anak nan indak dapek cukuik minum. Pado kasus nan jarang dapek tajadi komplikasi co meningitis virus (radang selaput utak) atau ensefalitis (radang utak).

PTKM dapek tajadi di sadoalah wilayah di dunia. Acok tajadi wabah kaciak di sikolah atau panitipan anak. Wabah skala gadang alah tajadi di Asia sajak 1997. Biasonyo tajadi salamo musim semi, paneh, jo gugua. Khasnyo tajadi pado anak-anak umua kurang dari limo taun tapi kadang-kadang dapek juo tajadi pado dewasa. PTKM jan dipusiangan jo panyakik kaki jo muluik (foot-and-mouth disease, nan juo disabuik hoof-and-mouth disease), nan manjadi panyakik binatang taranak.

Kasus PTKM partamo kali dijalehan sacaro klinis di Kanada jo Selandia Baru pado 1957. Panyakik tu dinamoan "Panyakik Tangan, Kaki, jo Muluik", dek Thomas Henry Flewett, sasudah wabah sarupo pado 1960.

PTKM paliang umum tajadi pado anak di bawah umua 10 taun an dapek tajadi dek wabah salamo musim semi, paneh, jo gugua. Hal ko dipicayoi dek angek sarato lamboknyo ari nan mamungkinkannyo mawabah. PTKM labiah umum tajadi di kawasan pakampuangan daripado kawasan pakotaan; namun, status sosioekonomi sarato higienitas diri paralu dipatimbangkan juo. Higienitas nan buruak manjadi faktor risiko PTKM.

Wabah panah tajadi di Cino, Japang, Hongkong, Korea Selatan, Malaysia, Singapura, Thailand, Taiwan, jo Vietnam. PTKM paliang umum manganai anak ketek di bawah umua 10 dan labiah acok pado umua di bawah 5 tahun, tapi baliah dapek juo takanai juo gujalo nan baragam.

Sajak 1997 ado 71 wabah gadang enterovirus nan dilaporan, rami tajadi di Asia Timur jo Asia Tenggara, utamonyo anak-anak. Dari taun 2008 inggo 2014, labiah dari 1 milyar kasus PTKM alah dilaporan di Cino tiok taun.

Wabah

• Pado 1998, ado wabah di Taiwan, utamonyo anak-anak nan takanai. Ado 405 komplikasi barek, jo 78 anak maningga. Total jumlah kasus pado wabah tasabuik mancapai 1,5 juta.
• Pado 2008 wabah tajadi di Cino, dimulai pado Maret di Fuyang, Anhui, inggo 25.000 kasus, jo 42 maningga, pado 13 Mai. Wabah sarupo tajadi juo di Singapura (labiah dari 2.600 kasus per 20 April 2008), Vietnam (2.300 kasus, 11 maningga), Mongolia (1.600 kasus), jo Brunei (1053 kasus dari Juni inggo Agustus 2008)
• Pado 2009 17 anak maningga dek wabah salamo Maret jo April 2009 di Cino timur Provinsi Shandong, jo 18 anak maningga di Heinan, provinsi sabalah. Labiah 115.000 kasus dilaporan di Cino dari Januari inggo April, 773 barek sarato 50 fatal. Di Indonesia, panyakik ko dilaporan dari Jakarta baso salapan anak-anak tatular. Pado akhia April, Dinas Kasehatan Jakarta mandukuang langkah-langkah panagahan, tamasuak panggunoan pamindai suhu (termal scanner) di palabuahan udaro sarato samantaro mahindari pajalanan ka Singapura
• Pado 2010 di Cino, wabah tajadi di Daerah Otonom Guangxi, selatan Cino, di antaronyo di Guangdong, Henan, Hebei, sarato Shandong. Sampai Maret alah 70.756 anak tainfeksi jo 40 maningga. Pado Juni, puncak musim panyakik, 537 maningga.
• WHO malaporan antaro Januari inggo Oktober 2011 (1.340.259 kasus) alah manurun asusnyo di Cino inggo kiro-kiro 300.000 dari 2010 (1.654.866 kasus), jo kasus baru maningkek pado Juni. Ado 437 maningga, turun dari 2010 (537 kamatian).
• Pado Desember 2011, Departemen Kasehatan Masyarakaik Kalifornia maidentifikasi bantuak kuek dari virus, Coxsackievirus A6 (CVA6), dimano kuku tangga pado anak umum tajadi.
• Pado 2012 di Alabama, AS tajadi wabah panyakik jo tipe nan indak biaso. Tajadi pado musim dimano biasonyo indak muncua sarato manganai remaja jo urang baliah. Ado sabagian nan dirawaik dek panyakik tapi indak ado nan maningga.
• Pado 2012 di Kamboja, 52 dari 59 kasus tatinjau nan tajadi pado anak dilaporan maningga dek panyakik misterius nan sabalunnyo didiagnosis jo PTKM nan virulen. WHO malaporan, "Manuruik hasia laboratorium takini, sacaro signifikan dari sampel nan diuji positif enterovirus 71 (EV-71), nan manyababan PTKM. Virus EV 71 alah tanamo manyababkan komplikasi barek pado pasien."dilaporan
• PTKM mainfeksi 1.520.274 urang jo labiah 431 maningga nan dilaporan inggo akhia Juli 2012 di Cino.

Virus-virus nan dapek manyababkan panyakik adolah nan dari kalompok Picornaviridae. Coxsackievirus A16 adolah panyabab paliang umum PTKM. Enterovirus 71 (EV-71) marupoan panyabab kaduo tabanyak. Banyak strain (ragam virus) dari coxsackievirus jo enterovirus nan manjadi panyabab.

Transmisi

PTKM marupokan panyakik nan amaik manular dan ditransmisikan dek sekresi (buangan) nasofaring (hiduang tenggorok) sarupo aia liua atau ingus, sacaro kontak lansuang, cairan nan kalua dari bintiak nan timbua, atau transmisi anal-oral (ikua ka muluik).

Tampek panitipan anak marupokan tampek paliang umum tajadi panularan PTKM dek pamakaian toilet, panggantian popok, dan kabiasoan anak nan mamasuakan tangannyo ka muluik. Anak-anak nan indak ikuik pra sikolah atau taman kanak-kanak ditamukan labiah mudah takanai panyakik.

Tando jo gujalo umum nan timbua pado PTKM di antaronyo damam, mual, muntah, badan taraso latiak, ilang salero makan, jo gelisah pado balita jo anak-anak. Lesi pado kulik biasonyo muncua babantuak ruam-ruam data nan barubah warna sarato manonjol nan bisa diikuti jo bintiak baraia nan padiah pado talapak tangan, tapak kaki, ikua, kadang-kadang pado bibia. Ruam jarang gata pado anak-anak, tapi bisa manjadi sabana gata pado baliah. Luko nan padiah, bintiak baraia, atau lesi dapek bakambang pado iduang atau muluik jo sakitarnyo. PTKM biasonyo dapek cegak surang sasudah 7-10 hari. Pado banyak kasus panyakiknyo tagolong ringan, tapi komplikasi sarupo ensefalitis, meningitis, jo paralisi nan maniru atau saroman jo gujalo polio dapek tajadi.

•  
  Ruam-ruam pado talapak tangan
•  
  Ruam-ruam pado tangan jo kaki laki-laki baumua 36 tahun
•  
  Ruam-ruam pado tapak kaki anak

Diagnosis dapek dibuek jo tando sarato gujalonyo sajo. Kok diagnosis alun dapek tagak, usapan tenggorok atau sampel buangan dapek diambiak untuak manamuan virus jo biakan (kultur). Periode inkubasi nan dibutuahan (wakatu antaro infeksi jo awitan gujalo) iyolah dari tigo inggo anam ari. Deteksi dini PTKM amaik pantiang dalam managah wabah pado populasi anak.

Langkah-langkah panagahan tamasuak mahindari kontak lansuang jo urang nan tainfeksi (tamasuak manjago anak tainfeksi di rumah), mambarasiahan paralatan basamo sacaro patuik, mandesinfeksi pamukoan nan tapapar, sarato manjago kabarasiahan tangan sacaro bana. Langkah-langkah ko alah manunjuakan efektivitasnyo untuak mangurangi transmisi (panularan) virus PTKM.

Kabiasoan manjago diri tamasuak mancuci tangan sarato desinfeksi area bamain. Manyusu ASI juo manunjuakan efektivitasnyo dalam manurunkan kaparahan PTKM, walau indak manurunkan risiko tainfeksi.

Vaksin

Vaksin nan dikana sabagai vaksin EV71 alah tasadio untuak managah PTKM di Cino pado Desember 2015. Indak ado vaksin nan kini tasadio di Amerika Sarikat.

Ubek biasonyo indak diparaluan pado PTKM dek inyo panyakik virus nan biasonyo dapek cegak surang. Kini ko, indak ado ubek spesifik pado PTKM. Manajemen panyakik biasonyo bafokus pado mailangin gujalo sajo. Nyeri pado lesi atau luko dapek diilangan jo pamakaian ubek analgesik (antiradang). Infeksi pado anak gadang, remaja, jo baliah biasonyo ringan sarato balansuang kiro-kiro inggo sapakan, tapi kadang-kadang dapek mamanjang . Pailang damam sarato mandi aia angek ngilu kuku dapek manurunan suhu tubuah.

Saketek urang jo PTKM nan paralu dirawaik di rumah sakik dek komplikasi saroman paradangan utak, paradangan salapuik utak, atau lumpuah lamah badan akut. Komplikasi non saraf sarupo paradangan jantuang, cairan pado paru, atau padarahan pado paru dapek juo tajadi.

Komplikasi pado PTKM jarang tajadi, tapi paralu pananganan medis sagiro kok nyampang tasuo. Infeksi PTKM dek infeksi Enterovirus 71 nan samakin manjadi-jadi bakamungkinan untuak mampunyoi komplikasi saraf atau jantuang tamasuak kamatian daripado infeksi dek Coxsackievirus A16. Pado kasus jarang, meningitis aseptis atau virus dapek tajadi dan dicirikan jo damam, sakik kapalo, kaku kuduak, atau nyeri pungguang. Kondisi ko biasonyo ringan dan jaleh tanpa barubek; namun, parawatan jangko pendek tatap paralu. Komplikasi PTKM serius lainnyo tamasuak ensefalitis (bangkak pado utak), atau lumpuah lamah badan pado kasus jarang.

Tangga kuku jari kaki jo tangan dilaporkan tajadi pado anak 4-8 minggu sasudah takanai PTKM. Hubuangan antaro PTKM jo tajadinyo tangga kuku jari alun lai jaleh; namun, hal ko tajadi samantaro dan kuku tumbuah baliak jo indak paralu pangobatan.

Komplikasi ringan dek gujalo dapek tajadi, misanyo dehidrasi, karano palukoan di muluik manyababan indak nyaman sangkek malulua makan atau minum.

Agen antivirus takini untuak managah sarato maubek infeksi virus pado PTKM alun baitu dikambangkan. Panalitian pandauluan manunjuakan baso inhibitor (paambek) dari kapsid virus EV-71 mampunyoi aktivitas antivirus nan kuek.

•   Media tantang Panyakik tangan, kaki, jo muluik di Wiki Commons
•   Kaba tantang Highly contagious Hand, foot and mouth disease killing China's children di Wikinews