Baangok

Sadoalah makhluk aerobik mambutuahan oksigen untuak respirasi seluler, nan manggunoan oksigen untuak mamacah makanan untuak mandapekan energi jo mambuek karbondioksida sabagai produk buangan. Baangok, atau "respirasi eksternal", mambaok udaro ka paru-paru tampek patukaran gas tajadi di alveolus malalui difusi. Sistem paredaran darah tubuah mangangkuik gas-gas iko ka dan dari sel-sel, tampek "resprasi seluler" tajadi.

Baangok untuak sadoalah vertebrata nan mampunyoi paru-paru tadiri dari siklus baulang inhalasi jo ekshalasi malalui sitem tabuang atau saluran udaro bacabang nan mangarah dari hiduang ka alveolus. Jumlah siklus baangok per menit adolah laju respirasi, jo marupokan salah ciek dari ampek tando vital utamo kahidupan. Dalam kondisi normal, kadalaman jo laju baangok dikandalian sacaro otomatih jo indak sadar dek babarapo mekanisme homeostatis nan manjago takanan parsial karbon dioksida jo oksigen dalam darah arteri konstan. Manjago takanan parsial karbon dioksida dalam darah arteri indak barubah di bawah babagai kaadaan fisiologis, maagiah kontribusi signifikan tahadok kontrol nan ketat pH cairan ekstraseluler. Baangok nan balabiahan (hiperventilasi) jo kurang baangok (hipoventilasi), nan masiang-masiang manurunan jo maningkekan takanan parsial arteri karbondioksida, manyababkan kanaikan pH ECF pado kasus partamo, jo panurunan pH pado kasus nan kaduo. Kaduonyo manyababkan gajalo nan manyakikan.

Baangok mampunyoi fungsi pantiang lainnyo. Baangok manyadiokan mekanisme untuak wicara, galak jo ekspresi emosi nan sarupo. Baangok juo digunoan untuak refleks sarupo manguok, batuak jo basin. Hewan nan indak dapek malakuan termoregulasi jo karingek, karano hewan tasabuik indak mampunyoi kalenjar karingek nan cukuik, dapek mambuang hangek malalui panguapan jo tarangah-angah.

Paru-paru indak talok mangambang surang, dan akan magambang hanyo jiko tajadi paningkatan volume rongga dado. Pado manusia, sarupo halnyo pado mamalia lainnyo, hal iko dicapai tarutamo malalui konstraksi diafragma, dan juo dek konstraksi otot interkostal nan maelo tulang rusuak ka ateh jo ka arah lua. Salamo mahiruk angok sacaro paso, otot-otot aksesori inhalasi, nan mahubuangan tulang rusuak jo tulang dado ka tulah lihia jo dasar tangkurak, dalam banyak kasus malalui parantaroan palakekan pado tulang salangka, mampagadang gerakan gagang pompa jo gagang ember, sahinggo tajadi parubahan volume rongga dado nan labiah gadang. Salamo mahambuihan angok (baangok), kutiko istirahat, sadoalah otot-otot untuak baangok manjadi rileks, mambaliakan dado jo paruik ka posisi nan disabuik "posisi istirahat", nan ditantuan dek elastisitas anatomisnyo. Pado titiak iko, paru-paru barisi kapasitas siso fungsional udaro, nan pado manusia dewasa mampunyoi volume sakitar 2,5-3,0 liter.

Salamo baangok barek (hiperapnea) sarupo, misalnyo katiko baolahraga, baangok disababkan dek relaksasi sadoalah otot-otot untuak baangok (jo carnan samo sarupo katiko istirahat), tapi sabagai tambahan otot-otot paruik, alih-alih pasif, kini bakontraksi dengan kuaik sahinggo manyababkan tulang rusuak tatarik ka bawah (muko jo sampiang). Hal iko indak hanyo mangurangi ukuran tulang rusuak tatapi juo mandorong organ-organ paruik ka ateh malawan diafragma nan akibeknyo manonjol jauah ka dalam dado. Volume paru-paru akhir baangok kini labiah saketek udaro dibandiangan jo "kapasitas residu fungsional." Namun, pado mamalia normal, paru-paru indak dapek dikosongan sapanuahnyo. Pado manusia dewasa, salalu ado satidaknyo ciek liter udaro residu nan tasiso di paru-paru sasudah mahambuihan angok sacaro maksimal.

Baangok diafragma manyababkan paruik mambuncik sacaro kalua jo masuak sacaro bairamo. Dek karano itu, acok disabuik sabagai "baangok paruik". Istilah-istilah iko acok digunoan sacaro bagantian karano manggambaran tindakan nan samo..

Katiko otot aksesori baangok diaktifkan, tarutamo salamo baangok, tulang salangka dielo ka ateh, sarupo nan dijalehan di ateh, Manifestasi eksternal dari panggunoan otot aksesori iko kadang-kadang disabuik sabagai baangok klavikula, taliek tarutamo salamo serangan asma jo pado urang jo panyakik paru obstruktif kronik.