Académia Ligùstica Do Brénno

«CONVINTI ch'o segge questo o tempo in to quæ chi peu deve spende a sò parolla a tutëla do dialetto zeneize;
CONVINTI che o dialetto zeneize o segge .un patrimonio da difende perché o l'é o mézzo, o strumento, a condission perché a ligusticitae a segge sempre spirito fecondo in mëzo a-e gente;
CONVINTI che difende o zeneize segge anche nutrî tutti i dialetti da Liguria;
CONVINTI, in fin di conti, che questa a segge a sola voxe adatta pe'a gente ch'a vive in te questo versante d'universo ch'o s'avanza prepotente in sciö mâ robusto,
INVITANDO tutti quelli che – poae co'i figgi, figgi co'i poae – sàn arvïse parlando zeneize, e capîse parlando zeneize e no vergognâse de parlâ in zeneize,
PROPONEMMO de fondâ unn-a «ACCADEMIA LIGUSTICA DO BRENNO» ch'a riporte o zeneize a-a dignitae de lingua de 'na gente libera.

COMPITI DE L'ACCADEMIA

Sensa inventâ ninte, sensa scrovî l'umiditae in ti possi e sensa tiâ feua de cöse neuve, codificâ a grafìa zeneize, ciù che ätro in riferimento a-a dimenscion fonetica de vocali, deuviando tutti i moderni mézzi a disposission pe documentâ i soìn ciù caratteristichi e a còcina.
Tiâ zù - in to moddo ciù semplice - 'na gramatica da lingua zeneize.
Mette insemme un dissionäio italian-zeneize con un "glossario" de parolle zeneixi ciù interessanti e pe'e quae gh'è a minaccia de l'abbandon e do malinteiso. In te voxe do dissionäio doviâ ëse presentòu i diversci termini, con e sò giuste pronunçe e a sò posission riguardo a l'uso.

L'ACCADEMIA LIGUSTICA DO BRENNO a travaggia sotta i auspìci e con i boìn uffiçi de « A Compagna », da quae a l'é unn'emanassion e in casa da quae a l'ha a sò sede naturale.

A no gh'ha organi direttivi; un moderatô o saiâ nominòu de votta in votta a ogni riunion. E riunioìn saian de duï tipi:
- assemblee de travaggio almeno una votta a'o méize;
- assemblee de studio o de comunicassion (almen ogni tréi meixi).

I socci de l'Accademia saiàn:
- Socci Zeneixisti,
- Socci Uditoï.

A-e assemblee do primmo tipo partecipiâ de diritto tutti i Socci Zeneixisti; e decisioìn saian piggiae a maggioranza assoluta; a convocassion a vegniâ fissâ de votta in votta, o proposta da-o moderatô de l'ultima assemblea, o richiesta da almeno trei Socci.

L'Assemblea de travaggio a peu nominâ un Segretaio, con manscioìn esecutive in sén a l'Accademia.

Quande gh'é maggioranza assoluta e questioìn vegnan sottoposte a l'Assemblea de Studio o de Comunicassion pe un pài consultivo e, in segonda istansa, approvae con qualunque maggioransa.

No vegne fissòu nisciun ordine do giorno, a meno ch'o no riguarde l'organizzassion de l'Accademia maexima, e in te 'sto caxo o dev'ëse portòu a conoscensa de tutti i Socci Zeneixisti almeno eutto giorni primma de 1'Assemblea.

A-e Assemblee de studio o de comunicassion ghe saiâ, oltre a-i Socci Zeneixisti, anche tutti i inscrïti a "A Compagna", che son de diritto Socci Uditorï, e i Socci Uditorï eventualmente nominae.

O Prescindente e o Gran Cançellê de "A Compagna" son de diritto, pe-a càrega, Socci Zeneixisti.

NOMINA DI SOCI

A nomina di Socci Zeneixisti a vegne faeta o pe ciamâta o in sce domanda (da parte de Socci Uditorï) da l'Assemblea de travaggio con 'na maggioransa di tréi quarti di Socci.

A nomina di Socci Uditorï - pe-i non inscrïti a "A Compagna" - a vén faeta sempre da l'Assemblea de travaggio, 'na votta sentìo o pài vincolante de "A Compagna" maexima.»