Fernanda Tollemeto (Nardò, 16 zùgno 1943) a l'é 'n'artista, mozaicista e scultrice italiànn-a.
ZE | Quésta pàgina a l'é scrîta in léngoa zenéize A Grafîa adeuviâ a l'é quélla de l'Académia Ligùstica do Brénno |
Fernanda Tollemeto a l'é nasciûa a Nardò a-i 16 de zûgno do 1943 e visciûa into Salénto scin'a-o 1959, dond'a l'à frequentòu l'Institûto d'Àrte de Lécce e dòppo, aprêuvo a sò seu ch'a s'êa trasferîa a Rómma pe studiâ mêxìnn-a, a s'é inscrîta a l'Institûto Statâle d'Arte de Rómma e a l'à precedûo de quarche anno a definitîva traslocaçión de tùtta a sò famìggia. Scìn da sùbito a l’à manifestòu l'interèsse pò-u mozàico e a n'à aprofondîo o stùdio co-o frequentâ o prìmmo di córsci institoîi e tegnûi a Parìggi a-a fìn di anni '50 da-o méistro Gino Severini e co-o Ricardo Licata: into gîo parigìn a l'à incontròu i ciù conosciûi artìsti de quélli ténpi into gîo artìstico e leterâio. Da-o 1961 a-o 1965 a l'à frequentòu l'Académia de Bèlle Arte de Rómma, e a l'à studiòu Stöia de l'Arte comm'alêva do Mario Rivosecchi e do Ferdinando Bologna e a s'é diplomâ co-o màscimo di vôti e con löde in Scultûa, sott'a-a goìdda do scultô Pericle Fazzini e, cómme têxi de làorea, a l'à portòu "O mozàico do Nîlo de Palestrìnn-a".
Abilitâ a l'insegnaménto de "Diségno e Stöia de l'Àrte", a l'à insegnòu da-o 1962 a-o 1983 inte tante Schêue Médie, Licêi, Institûti profescionâli e artìstichi de Rómma e do Làçio; da-o 1983 a-o 2000 a l'à insegnòu Disciplìnn-e Artìstiche e Stöia de l'Àrte inte l'Universcitæ Sperimentâle Decentrâ e inte l'Universcitæ Provinsâ pi-a Tèrsa Etæ de Rómma. A l'é stæta Prescidénte inte tante Comiscioìn d'Ezàmme de Stâto e ménbro de Comiscioìn giudicànti pe Concórsci pùblichi pe tìtoli e ezàmmi tra o 1979 e o 1989.
A produçión artìstica da Tollemeto a coménsa into 1958: da-o méistro Gino Severini a l'inprénde o concétto rivoluçionâio, rigoàrdo a-a tradiçión do mozàico da sécoli consolidâ, de fâ in cangio 'na persónn-a sôla do progetìsta do travàggio (ròllo do pictor imaginarius) e do realizatô do travàggio (ròllo do pictor musivarius). Da-a scitoaçión stòrico-artìstica do Nêuveçénto nasce o sò destàcco da-a raprezentaçión scinbòlica do sogètto, ch'o no l'é ciù imitaçión reâ ò ritræto ma ciufîto 'na riçèrca pe provocâ 'n'emosción in chi amîa o travàggio, comunicàndo atravèrso e sensaçioìn che de figûe astræte aregòrdan. Chi l'é inportànte a mescciûa de coî e i inbàtti e-e fórme mæxime di tascélli de Muràn, di quæ l'artìsta a l'abandónn-a ògni princìpio de regolaritæ: o sò avixinaménto a-a ténica do mozàico o l'é do tùtto nêuvo, e defæti lê a no se lìmita a dêuviâ i tascélli do mozàico cementæ inta malta, ma inti anni a gh'azónze materiâli de lóngo ciù despægi cómme menìssi de schêuggio e avànsi de fàbriche de véddri artìstiche de Muràn, e co-o sfrutâ a lûxe naturâle ò artifiçiâle ch'a vén da-o derê do mozàico, che de spésso o divénta 'na scultûa a træ dimenscioìn.
A dêuvia prîe vulcàniche ascì (òscidiànn-e, prîe prìmixe, zìmme), ænn-e de spiâge de vàrie localitæ de mâ e de dezèrti, e ascì lamêe e spêgi che riflètan l'inmàgine do vixitatô, lûxe e rexisténse elétriche che dàn efètti vixîvi e che se peu tocâ, che tìan a mêzo o spetatô. I spàççi vêui ascì creæ tra i tascélli són 'na sò inovaçión da-a quæ vén l'agetîvo "tollemetiano" riferîo a-o sò stîle inti scrîti di crìtichi d'arte. Inta sò ativitæ sperimentâle de riçèrca artìstica, inti ànni '80 a l'à fondòu l'asociaçión "Mosaico Oggi" (Mozàico Ancheu) e a "Museo Mosaico Oggi-Fondazione Fernanda Tollemeto”. I sò mozàichi, che raprezéntan galàçie, pertûxi néigri, mùxiche, poexîe e ritræti ìntimi de personàggi, són raxón de stùdio into camìn de formaçión artìstica e són stæti l'argoménto de dötræ têxi de làorea.
O Gino Severini o gh'à dæto into 1972 a direçión artìstica da refæta di sò mozàichi into Palàçio de l'Espoxiçión Universâle de Rómma (EUR). O poêta Giuseppe Ungaretti o l’à invitâ into 1964 a parteçipâ a-a Quadrienâle IX de Rómma. L'Alberto Moravia, òspite de 'na móstra personâle de l'artìsta a Rómma, inte l'Arvî do 1973, o l'à descrîto a capaçitæ da Tollemeto de “sentî e trasmétte co-i sò mozàichi atravèrso a strània unión “mozàico-poexîa”. O Carlo Levi o gh'à dæto publicaménte a medàggia d'öo do Prescidénte da Repùblica into novénbre do 1973 (Prémio “Çitæ Etèrna”, Galerîa Naçionâle d’Àrte, 11/11/1973), co-o riconóscighe 'na “libertæ esprescîva ch'a renêuva l'antîga ténica do mozàico” Into 2003 l'ANFACI (scindacâto di prefetti) e a SSAI (Scheua do ministêro de l'interno) gh’àn domandòu di sò travàggi pe regalâli (in particolâ a "Stêle 2002") inte quello anno a-o Prescidénte da Repùblica Carlo Azeglio Ciampi, a-o Prescidénte do Conséggio di Minìstri Silvio Berlusconi e a-o Minìstro de l’Intèrno Giuseppe Pisanu.
This article uses material from the Wikipedia Lìgure article Fernanda Tollemeto, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). O contegnûo o l'é disponìbile in sciâ bâze da licénsa CC BY-SA 4.0, se o no l'é diversaménte specificòu. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Lìgure (DUHOCTRUNGQUOC.VN) is an independent company and has no affiliation with Wiki Foundation.