Propaganda

Laes hie wie v'r mit de versjillende saorte Limburgs ómgaon.

Propaganda is 'n bepaoldje vorm van kómmunikaasje wobie de publieke opinie wuuertj beïnvloodj veur aanhengers te winne veur bepaoldje opvattingen of standjpuntje. Propaganda kènmirk zich döks door 't systematisch gaeve van einziejige informatie die al dan neet (deils) ónwaor is, wobie selectief bepaoldje feite waere benaodrök en anger bewós achterwaenge waere gelaote. d'n Initiatiefnummer is meistes neet-commercieel en kump groeatendeils veurt oet maotsjappelike, kirkelike of politische stèlsele. In dees zin is euverlap mit sociaal marketing en marketing van organisaasjes zónger winsougmirk.

't Waord "propaganda" vindj zienen oearsprónk in 't Letiense propagare det "oetbreie" of "veurtplantje" beteikentj. Oearsprunkelik mèndje propaganda den ouch 't verbreie van 'n boeadsjap. 't Ieëste gebroek van 't waord is wersjienlik gewaes inne naam vanne Congregatio de propaganda fide door Paus Gregorius XV: de congregatie t'r verbreijing van 't geluif. Langentied woort 't waord slechs in godsdeenstige zin gebroek; pas inne litste twieëhóngerdj jaor ouch daoboete.