Linguas Trans-Gine Nova

Lo es posible la familia tre en grandia en la mundo en cuantia de linguas. La cor de la familia es considerada establida, ma sua bordas e membria es nonserta. La linguas es parlada par sirca tre milion persones.

La plu de linguas trans-gine nova es parlada par no plu ca un poca mil persones, con sola sinco - melpa, enga, dani ueste, macasae e ecari - parlada par plu ca 100 mil. La lingua la plu poplosa estra la tera xef de Gine Nova es macasae de Timor este, con sirca 100 mil parlores tra la parte este de la pais.

La informa sur la linguas de Gine-Nova es limitada a presente. La evidentes per un familia depende multe sur la similes de sintatica, morfemolojia, e fonetica. Ma la linguiste Malcolm Ross ia developa un metodo de compara la pronomes otenable per posible membros de un familia. Per trans-gine nova, el ia reconstrui la pronomes per la protolingua per esta familia:

me	*na	nos	*ni
tu	*ga	vos	*gi
el	*(y)a, *ua	los	*i

On ave un forma relatada ma min comun per "nos" - *nu, e ance per "vos" - *ja, cual Ross sujeste pote es un forma cortes. Plu, on ave sufisas per dual *-li e *-t, e un sufisa plural *-nV, e sufisas *-pi (dual) e *-m- (plural) cual funsiona como "nos" incluinte cuando usada en la person un.

Ross, Malcolm (2005). "Pronouns as a preliminary diagnostic for grouping Papuan languages". In Andrew Pawley; Robert Attenborough; Robin Hide; Jack Golson. Papuan pasts: cultural, linguistic and biological histories of Papuan-speaking peoples. Canberra: Pacific Linguistics. pp. 15–66.