Conservatoire Vun Der Stad Lëtzebuerg

 

 

Duerch e Gesetz vum 22. Mee 1902, dat d'Schafe vun engem Museksconservatoire an der Stad Lëtzebuerg betraff huet, an dem Arrêté Grand-Ducal dozou vum 11. Mäerz 1904 gouf de legale Kader fir de Conservatoire gesat. Ma eréischt 1906 gouf de Conservatoire gegrënnt, an dat mat Hëllef vun engerm Don vun der Madame Eugénie Dutreux-Pescatore. D'Gebai war domols an der rue du St. Esprit 14-16, am fréiere Refuge vun der Abtei Orval, a war grouss genuch fir ongeféier 300 bis 400 Schüler. Den éischten Direkter war de Belsch Victor Vreuls.

Nom Zweete Weltkrich ass d'Zuel vun de Schüler an d'Luucht gaangen, a schonn an der Mëtt vun den 1960er Jore gouf dovu geschwat, a méi grouss Raimlechkeeten ze plënneren, mä et sollt bis 1984 daueren, bis an dat neit Gebai um Geesseknäppchen geplënnert konnt ginn.

Dëse Gebaierkomplex (dee, wéi säi Virgänger, de Spëtznumm Quatsch huet) ass vun den Architekte Robert Heintz-Sturm a Conny Lentz, dt-8 Planungsgruppe a Büro Bussmann & Haberer. De Concerts-Sall huet eng Westenfelder-Uergel.

2021 ginn eng 3.800 Elèven an de Consevatoire. 170 Enseignante ginn do ronn 7.000 Coursen d'Woch. Direkter ass zanter dem 1. September 2011 de Marc Meyers. Virdru war dat 16 Joer laang de Fernand Jung.

• 1906 - 1926: Victor Vreuls
• 1927 - 1940: Lucien Lambotte
• 1940 - 1944: Hans Herwig
• 1944 - 1953: Lucien Lambotte
• 1953 - 1953: Richy Muller (directeur ff)
• 1953 - 1959: Walter Kolneder
• 1959 - 1965: Jean-Pierre Schmit (directeur ff)
• 1965 - 1989: Josy Hamer
• 1989 - 1995: Roland Hensgen
• 1995 - 2011: Fernand Jung
• zanter 2011: Marc Meyers

• 100e anniversaire du Conservatoire de Musique de la Ville de Luxembourg. Luxembourg 2006.

• Museksschoulen zu Lëtzebuerg

Commons: Conservatoire vun der Stad Lëtzebuerg – Biller, Videoen oder Audiodateien

• Websäit vum Stater Conservatoire