ქუთაისის უნივერსიტეტი

დაარსდა 1991 წელს, ვალერიან ქელბაქიანისა და რევაზ ლაღიძის მიერ. იგი დასავლეთ საქართველოში პირველი კერძო უმაღლესი საგანმანათლებლო დაწესებულება იყო. 2022 წლისთვის 2 ფაკულტეტი: სოციალურ მეცნიერებათა, ბიზნესისა და სამართლის და მედიცინის ფაკულტეტი ფუნქციონირებს. უნივერსიტეტის ამჟამინდელი რექტორია გოჩა თუთბერიძე.

უნივერსიტეტი დაფუძნდა 1991 წელს, როგორც „ქუთაისის სამართლისა და ეკონომიკის ინსტიტუტი“. იგი დასავლეთ საქართველოში პირველი კერძო უმაღლესი საგანმანათლებლო დაწესებულება იყო. 1992 წელს „ქუთაისის სამართლისა და ეკონომიკის უნივერსიტეტი“ ეწოდა, ხოლო 2010 წელს — „ქუთაისის უნივერსიტეტი“.

ქუთაისის უნივერსიტეტი საქართველოს კერძო უნივერსიტეტების ასოციაციის წევრია. 2021 წლის 29 ოქტომბრიდან არის ევროპის უნივერსიტეტების ასოციაციის ინდივიდუალური ასოცირებული წევრი.

უნივერსიტეტს აქვს რექტორის მიერ დამტკიცებული ლოგო, ბეჭედი და ტიტულოვანი ფურცელი.

ქუთაისის უნივერსიტეტში 2 ფაკულტეტი ფუნქციონირებს: სოციალურ მეცნიერებათა, ბიზნესისა და სამართლის ფაკულტეტი და მედიცინის ფაკულტეტი, რომელთა ფარგლებში 8 საგანმანათლებლო პროგრამა ხორციელდება. უნივერსიტეტში როგორც ქართული, ისე ინგლისურენოვანი პროგრამები ფუნქციონირებს.

ყველაზე მოთხოვნად საგანმანათლებლო პროგრამებს უმაღლესი განათლების სამივე საფეხურზე სოციალურ მეცნიერებათა, ბიზნესისა და სამართლის ფაკულტეტი ახორციელებს. ფაკულტეტზე მოქმედებს ჟურნალი „ეკონომიკური პროფილი“, რომელიც სხვადასხვა რეფერირებად ბაზაშია ინდექსირებული. ფაკულტეტის დეკანია თეონა გრიგოლაშვილი. ფაკულტეტზე ფუნქციონირებს სამართლის, ბიზნეს ადმინისტრირების, ტურიზმისა და ეკონომიკის საბაკალავრო საგანმანათლებლო პროგრამები, საბუღალტრო აღრიცხვისა და აუდიტის და ფინანსების სამაგისტრო საგანმანათლებლო პროგრამები და ეკონომიკის სადოქტორო პროგრამა.

მედიცინის ფაკულტეტზე დიპლომირებული მედიკოსის ერთსაფეხურიანი ინგლისურენოვანი საგანმანათლებლო პროგრამა ფუნქციონირებს, რომელიც სამედიცინო განათლების მსოფლიო ფედერაციის (WFME) სტანდარტებს ეფუძნება. მედიცინის ფაკულტეტის დეკანია თამარ პერტაია. ფაკულტეტს აქვს სიმულაციის ცენტრი.

უნივერსიტეტში ფუნქციონირებს კლინიკური უნარ-ჩვევების განვითარების ცენტრი, ბიოქიმიური და ჰისტოლოგიური, ფიზიოლოგიური და მიკრობიოლოგიური/იმუნოლოგიური ლაბორატორიები.

2020 წლის 2 ივლისიდან 29 დეკემბრამდე უნივერსიტეტის რექტორი ლაშა კანდელაკიშვილი იყო. 2022 წლისთვის უნივერსიტეტის რექტორი გოჩა თუთბერიძეა. საერთაშორისო ურთიერთობების მიმართულებით ვიცე-რექტორის მოვალეობას თამარ ზარგინავა ასრულებს, სასწავლო პროცესის ადმინისტრირების მიმართულებით ― ნინო ტალიაშვილი, ხოლო ხარისხის განვითარების მიმართულებით ― სოფიო ხუნდაძე.

უნივერსიტეტის მართვის კოლეგიური ორგანოა ქუთაისის უნივერსიტეტის მმართველი საბჭო, რომელსაც რექტორი თავმჯდომარეობს.

ქუთაისის უნივერსიტეტის სოციალურ მეცნიერებათა, ბიზნესისა და სამართლის ფაკულტეტზე ფუნქციონირებს ეკონომიკის კვლევითი ინსტიტუტი, რომლის ფარგლებშიც საერთაშორისო რეფერირებადი ჟურნალი „ეკონომიკური პროფილი“ გამოიცემა. უნივერსიტეტის სტრუქტურული ერთეულია ბიბლიოთეკა, რომლის ფონდის კატალოგი ელექტრონულ საბიბლიოთეკო პროგრამაში, Openbiblio, არის ასახული.

საერთაშორისო ასოციაციები

ქუთაისისი უნივერსიტეტი ევროპის უნივერსიტეტების ასოციაციის ინდივიდუალური ასოცირებული წევრია. საქართველოს მასშტაბით, იგი მეხუთე კერძო უნივერსიტეტია, რომელიც ასოციაციაში გაწევრიანდა. უნივერსიტეტი ინოვაციების გლობალური საუნივერსიტეტო ქსელის მუდმივი ინსტიტუტციური წევრი, Businet გლობალური ქსელისა და ევროპის სამედიცინო განათლების ასოციაციის (AMEE) წევრია.

საერთაშორისო პარტნიორები

ურთიერთთანამშრომლობის მემორანდუმების ფარგლებში ქუთაისის უნივერსიტეტი 15 სახელმწიფოს 27 უნივერსიტეტთან თანამშრომლობს.

ქვეყანა	უნივერსიტეტი	ქვეყანა	უნივერსიტეტი
უკრაინა	ხმელნიცკის ეროვნული უნივერსიტეტი ხარკივის ეროვნული სამედიცინო უნივერსიტეტი ცენტრალური უკრაინის ეროვნული ტექნიკური უნივერსიტეტი ზაპოროჟიის სახელმწიფო სამედიცინო უნივერსიტეტი ლვივის ფიზიკური კულტურის სახელმწიფო უნივერსიტეტი ხარკივის სამედიცინო აკადემია ხორტიციის განათლებისა და რეაბილიტაციის ეროვნული აკადემია	პოლონეთი	ვისტულის უნივერსიტეტი პოზნანის საბანკო საქმის უმაღლესი უნივერსიტეტი დომბროვა-გურნიჩის საბანკო საქმის უმაღლესი უნივერსიტეტი ვროცლავის ბიზნესის უნივერსიტეტი
ბულგარეთი	ვარნის მენეჯმენტის უნივერსიტეტი ვარნის თავისუფალი უნივერსიტეტი	რუმინეთი	დიმიტრი კანტემირის ტარგუ მარეს უნივერსიტეტი ტიმიშოარის დასავლეთ უნივერსიტეტი
ლიეტუვა	ვიტაუტას დიდის უნივერსიტეტი კლაიპედის უნივერსიტეტი	ლატვია	რიგის სტრადინიშის უნივერსიტეტი
ესპანეთი	სანტიაგო-დე-კომპოსტელის უნივერსიტეტი	საფრანგეთი	დასავლეთ ბრეტანის უნივერსიტეტი
ჩეხეთი	ფინანსებისა და ადმინისტრირების უნივერსიტეტი (ჩეხეთი)	ხორვატია	PAR საუნივერსიტეტო კოლეჯი (ხორვატია)
ჩინეთი	სინძიანის სამედიცინო უნივერსიტეტი (ჩინეთი)	ინდონეზია	სტეკომის უნივერსიტეტი (ინდონეზია)
ავსტრია	ბურგენლანდის გამოყენებითი მეცნიერებების უნივერსიტეტი	ყირგიზეთი	საერთაშორისო უნივერსიტეტი ალატოო
აშშ	კალიფორნიის ბაპტისტური უნივერსიტეტი

საერთაშორისო პროექტები

ქუთაისის უნივერსიტეტი ჩართულია ევროკავშირის ერაზმუს+ პროექტებში: „უნივერსიტეტების როლი რეგიონის განვითარებაში“ (RURD) და „სტუდენტთა ფსიქოლოგიური კონსულტაციის ცენტრების შექმნა საქართველოს უმაღლეს სასწავლებლებში“ (E-PSY).

სინძიანის სამედიცინო უნივერსიტეტთან თანამშრომლობის ფარგლებში ქუთაისის უნივერსიტეტში შექმნილია „კონფუცის კლასი“.

• ოფიციალური საიტი