Supremasi Putih

Supremasi putih mulabukané saka rasisme ing jagat kawruh kang kerep gumantung marang argumèn-argumèn saka mayawidya (pseudoscience). Kaya déné obah-obahan (movement) kang sairib aran néyo-Nazisme, kang nggilut supremasi putih racaké ora nampa wong saka ras liya lan wong Yahudi minangka warganing obah-obahané.

Tembung iki uga racaké kanggo ngarani idhéyologi pulitik kang nglanggengaké lan nyengkuyung lelakon supaya wong putih tansah kuwasa ing babagan sosial, pulitik, sajarah, utawa bebadan (kaya kang kacetha ing tatanan sosiyopulitik kontèmporèr lan kapungkur, contoné ya iku dol-tinuku batur ing Atlantik, pranata Jim Crow ing Amérikah Sarékat, lan apartheid ing Aprikah Kidul). Manéka rupa supremasi putih duwé panemu kang béda-béda babagan sapa kang kagolong wong kulit putih. Manéka golongan supremasi putih nitik sawatara golongan ras lan budaya minangka mungsuhé kang pokok.

Ing jagat akadhemik, mligi ing téyori ras kritis utawa Intersèksiyonalitas, tembung "supremasi putih" uga ngemu teges tata pulitik utawa sosiyoékonomi, kang ménakaké wong putih minangka pribadi utawa golongan ing siji tatanan (privilése) déné ngiwakaké golongan ètnis liyané.