Piipl taak bout tuu touzn languij ina hAfrika.
Di languijdem muosli bilang ina faib mieja languij fambili : Naija-Kanggo, hAfro-hIejiatik, Koi-San, Nailo-Sa'aaran, ah hAschroniijan.
Naija-Kanggo languij taak ina muos a Sob-Sa'aaran Afrika, ah a praps wan a di muos daivoers languij fambili ina di wol. Di fambili hingkluud tuu mieja branch: Naija-Kanggo A ah Naija Kanggo B, we nuo az Bantu tu. Di faama taak pah di Wes Afrikan kuos, ah Jumiekan akchuali get nof a igrama ah ab wah fier amount a wod frah demaya languij. Wan egzampl a "niam", frah Twi eniam, ar Wolof nyam. Bantu taak ina di res a sob-Sa'aaran Afrika, ah ingkluud uoliip a repiutebl Afrikan languij, laka Suayili, Kikonggo, ah Zuulu. Alduo deh no ab az griet a himpak pah Jumiekan az Naija-Kanggo A languij, soh fyuu wod we yuuz bai Konggo piipl uu chried wid di Yuropiandem ina Jumiekan languij, laka di wod "kombolo" frah Kikonggo kombula.
Ina naat ah naatwes Afrika, hAfro-hIejiatik languijdem taak aaluoba. Deh ingkluud Arabik, Iityuopian, di Boerba languijdem, Hausa, ah Somali.
Di Koisan languij taak ina soutwes Afrika, ina di riijan a di Kala'aari Dezat. Deh bes nuo fi di yuus a klik kansanant az fuoniim, we rait wid leta laka ǃ ah ǂ.
A Nailo-Sa'aaran languij taak ina nof paat a Naat Afrika, muosli rong di opa paat a di Nail ah Chari Riba.
Aschroniijan languij taak pah di ailan a Madagiaska.
Indo-Yuropiyan languijdem, we kyaa gaa hAfrika juurin di koluonial piiriad, laka hIngglish, French, Puotigiis, ah Panish, yuuz az linggua frangka. Aalso, Afrikaans, we taak ina Sout Afrika, a waneda Yuropiyan languij ina hAfrika.
This article uses material from the Wikipedia Jumiekan Kryuol article Languij a hAfrika, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Kantent avielobl fi anda CC BY-SA 4.0 anles nuot adawaiz. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Jumiekan Kryuol (DUHOCTRUNGQUOC.VN) is an independent company and has no affiliation with Wiki Foundation.