Awtodróha je dalokowobchadny puć, kotryž słuži bjez wuwzaća spěšnemu wobchadej a tworowemu wobchadej z motorskimi jězdźidłami.
Wobsteji normalnje z dweju směroweju jězdnjow z wjacorymi jězdnymi ćěrjemi. W Němskej maja awtodróhi znajmjeńša dwě ćěri do kóždeho směra a přidatnje zwjetša nabóčnu ćěr naprawo. Na modernych awtodróhach stej směrowej jězdni přez wobtwjerdźenu srjedźnu smuhu wot so dźělenej. Jězdnja wobsteji zwjetša z betona abo asfalta.
Porno druhim dróham awtodróhi křižowanišćow w prěnjotnym zmysle nimaja. Přechody mjez awtodróhomaj abo mjez awtodróhu a druhimi dróhami so na samsnej runinje njerealizuja, ale z pomocu přijězdow a wotjězdow, mostow a tunlow.
We wjele krajach je wužiwanje awtodróhi jenož z popłatkom móžne. Nimale wšudźe je dowolena spěšnosć zamjezowana, zwjetša na 120 abo 130 km/h. W Němskej tajki powšitkowny limit njeeksistuje. Prěnja zjawna awtodróha Němskeje běše w lěće 1932 wotewrjena dźensniša A 555 mjez Kölnom a Bonnom. Dźensa steja němske awtodróhi zasadnje pod dohladom zwjazka a mjenuja so tuž zwjazkowe awtodróhi, skrótka BAB („Bundesautobahn“). Němska syć wobjimuje něhdźe 13.000 kilometrow a je tuž po chinskej, US-ameriskej a španiskej štwórta najdlěša na swěće.
Přez Łužicu wjedu tři awtodróhi, a to A 4 (Drježdźany–Budyšin–Wrócław), A 13 (Drježdźany–Berlin) a A 15 (Błóta–Baršć).
This article uses material from the Wikipedia Hornjoserbsce article Awtodróha, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wobsah pod CC BY-SA 4.0 k dispoziciji steji, jeli njeje so hinak podało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Hornjoserbsce (DUHOCTRUNGQUOC.VN) is an independent company and has no affiliation with Wiki Foundation.