Étika térã tekoporã rembikuaa ha'e arandupykuaapy vorekue oipyguaráva avareko, mba'e ojehechakuaáva hekokatuha ramo ha umi ojehechakuaáva hekope'ỹha ramo, iporãva ha ivaíva, tekoporã (jepokuaa ha tembiapoukapy ojehechakuaáva iporãha ramo), tekomarangatu, vy'apavẽ ha umi mba'e jajapo va'erã jaiko oñondivepa hag̃ua.
Ko étika javegua oñemohakã mbohapýre: metaétika ha'e upe oipyguaráva mba'éichapa oñepyrũ ha mba'épa he'ise opamba'e étika reheguáva, étika ohekome'ẽva ha'e upe ohekáva mba'épa ikatu ohechaukaite mba'épa hekokatúva ha hekope'ỹva avarekópe ha upe étika purupyrã katu oipyguara mba'e oñombohováiva ha apañuái ikatu jajuhu jaikóvo étika he'iháicha.
Sapy'ánte oĩ ombojehe'áva térã oiporu ñe'ẽ he'isejojáva ramóicha ko'ã étika ha tekoporã, jepémo étika ha'e tekoporã ikatu ojehechakuaáva heta avano'õme térã oparupi yvy ape ári, tekoporã katu ojehecha peteĩ avano'õntepe, upe rire étika ha'e avei tembikuaaty oipyguaráva tekoporã. Étika nomoheñóiri umi apañuái ikatúva ou tekoporãgui, opy'amongeta katu hese. Étika ojesareko umi tembiapo tekoporã rehegua, ha'éva mba'e jajapóva jajaposégui, taha'e ha'éva ñane'añórõ, jaikojoapárõ térã jaikórõ opavave renondépe. Étika ndaha'éi omombe'umínte térã omañamínte umi tembiapo rehe, oñeha'ãmba katu ohekávo iporãrõ térã ivaírõ, ojepy'amongetávo ha oñemongetávo avareko rehe.
Étika ñehesa'ỹijo oñepyrũ oikoraẽ oipyguaráva arandupykuaaty Gyrésia Ymaguarépe, ha oñemyasãi opaichaguápe marandeko pukukuévo, ikatu jahecha hembiasakue rupive iñambueitehague mba'éichapa oñemyesakã ha oñeikũmby étika ha tekoporã opaichaguáva oñemoĩva yvypóra rekove apytépe.
Jepémo akóinte étika ojehecha arandupykuaaty rakã ramo, oñemyasãi avei heta tembikuaa rupi, umíva apytépe jajuhu avakuaaty, tekovekuaaty, virurekokuaa, marandeko, jokuaikuaa, avarekokuaa ha tupãkuaaty.
This article uses material from the Wikipedia Avañe'ẽ article Étika, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Kuatia retepy ojeguereko CC BY-SA 4.0 guýpe, ndaha'éiramo oje'éva ambue mba'e. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Avañe'ẽ (DUHOCTRUNGQUOC.VN) is an independent company and has no affiliation with Wiki Foundation.