Robert Burns

Y wordt algemêen bekeekn lik de nasionoale dichtre van Schotland en y is weirldbefoamd. Y is de best gekende van de dichtrs die in 't Schots geschreevn ên, aloewel y ook veele in 't Iengels ê gewerkt en in e lichte Schotsche streektoale, die gemakklik te begrypn is vo nie-Schotn. Y schrêef ook standoard-Iengls, en in die geschriftn wastn dikkers ip ze stoetst mê zyn polletieke of burgerlikke kommentoar.

Y wordt anziene vor êen van d' êeste romantiekrs, en achtre zyn dôod wierdn 'n inspiraosje-bronne vo de stichtrs van 't liberalisme en van 't socialisme, en e kulturêel uutangbord in Schotland en oendre de Schottn de weirld roend. 't Boffn mê zyn leevn en werk was bykans e kultuus in de 19e en 20e êewn, en zyn invloed ip de Schotsche litterateure ê lange tyd grôot gewist. In 2009 wierd y uutgekoozn lik de grotste Schot deur 't Schotsch publiek in e stemmienge die angestierd was deur de Schotsche Tilleviesjezendre STV.

Burns makte nie allêene ôorsproenklik werk, y verzoamlde ook volkszangn uut hêel Schotland, en y paste deeze an. Zyn gedicht (en liedje) "Auld Lang Syne" wordt dikkers gezoengn ip Hogmanay (de latste dag van 't joar), en "Scots Wha Hae" da lange tyd ê gediend vor 'n oenoffisiêel nasionoal volkslied van 't land. Andre gedichtn en liedjes van Burns die wêlbekend zyn oovre de weirld teegnwôordig, omvattn : "E Rô, Rô Rôoze"; "A Man's a Man for A' That"; "To a Louse"; "To a Mouse"; "The Battle of Sherramuir"; "Tam o' Shanter"; en "Ae Fond Kiss".

Ofbeeldiengn die ier by passn ku je vien in de categorie Robert Burns van Wiki Commons.