Omgong Fan Frankryk 2007

De start wie yn Londen, de haadstêd en grutste stêd fan Grut-Brittanje en fan Ingelân. It wie de earste kear dat de omgong úteinsette yn Ingelân. De prolooch en de earste etappe hiene yn dit lân plak foar't de omgong fierder gie op de fêste wâl fan Europa.

Op 19 july 2007 makke it Deenske hurdfytsbûn bekend dat Michael Rasmussen, dy't op dat momint al trije dagen yn de giele trui fytste, út de Deenske nasjonale ploech set wie. Dêrtroch koe er net meidwaan oan it WK hurdfytsen 2007 yn Stuttgart, noch oan de Olympyske Simmerspelen 2008 yn Peking. Neffens it Deenske hurdfytsbûn krige Rasmussen twa warskôgings om't er net op tiid melde wêr't er op ferskillende tiidstippen ferbleau, en dêrtroch mooglik dopingkontrôles omsylde. Trije warskôgings waarden beskôge as in positive dopingkontrôle. Rasmussen mocht lykwols gewoan fan start gean yn de alfde etappe, sa besleat Tour-baas Christian Prudhomme, dy't de timing fan it bekend meitsjen fan it foarfal troch it Deenske hurdfytsbûn fertocht fûn.

Yn de 16e etappe, op 25 july, wûn Rasmussen mei in foarsprong fan 20 sekonden op Levi Leipheimer en 35 sekonden op syn foarnaamste konkurrint Alberto Contador. Dêrmei wie er de favoryt foar de toeroerwinning. Lykwols, dy jûns waard Rasmussen, dy't noch altyd yn de giele trui fytste, troch de direksje fan de Rabobank-ploech út de Tour helle en op steande foet ûntslein fanwegen it oertrêdzjen fan ynterne regels. Rasmussen soe op 13 en 14 juny 2007 yn de Dolomiten traind hawwe en net, sa't hysels bewearde, yn Meksiko. Dêrtroch soe er twa dopingkontrôles yn it foarseizoen mist hawwe. Rasmussen soe neffens syn ploechlieding tajûn hawwe yndied yn Itaalje traind te hawwen. Troch it ûntslach fan Rasmussen fytste Alberto Contador yn de 17e etappe yn de giele trui. Hy soe de Omgong fan 2007 ek winne.