Mixen, lûdsmixing, audiomixing of miksaazje is in proses wêrby't ferskate soarten lûden kombinearre wurde yn ien of mear lûdskanalen.
Dêrby wurde folumenivo, frekwinsje-ynhâld, dynamyk en panoramyske posysje manipulearre en ferbettere. Dy praktyske, estetyske of kreätive behanneling wurdt tapast om in einferzje fan it lûd te berikken dy't noflik is om nei te harkjen. Mixen wurdt dien by muzykopnames, films, tillefyzje en live-lûd. It wurdt ornaris ferrjochte troch in mixingtechnikus dy't in audiomixingpaniel of in digitaal audiowurkstasjon ta syn foldwaan hat.
Foar de ynfiering fan multitrackrecordingtechniken moasten alle lûden en lûdseffekten dy't diel útmeitsje moasten fan in lûdsopname, yn ien kear trochinoar mixt wurde by in live-optreden. As de lûdsmix net nei 't sin wie, of as ien muzikant in flater begie, moast it hiele muzykstik oerdien wurde oant eltsenien der tefreden oer wie. Soks heart tsjintwurdich lykwols ta it ferline. Troch multitrackrecording kinne alle ûnderdielen fan 'e úteinlike lûdsmix by it mixen fan muzyk apart faninoar opnommen wurde om letter yn 'e studio mixt te wurden. Dy fernijing hat de muzykyndustry radikaal feroare. De produksjefaze bestiet no yn 'e regel út trije stadia: opname, overdubbing en mixdown.
It mixen fan lûd foar films en tillefyzjeprogramma's is in proses dat diel útmakket fan 'e postproduksje. Dêroan giet de lûdsmontaazje foarôf, wêrby't trije soarten lûden opboud wurde: dialooch, lûdseffekten (eftergrûnlûden) en filmmuzyk. By de lûdsmixing wurde dy trije soarten lûden gearmongen ta ien floeiend gehiel.
It mixen fan live-lûd is it proses fan it gearmingen fan ferskate lûdsboarnen by in live-optreden troch it gebrûk fan in audiomixingpaniel. De lûdsboarnen kinne de muzyk wêze dy't troch ôfsûnderlike ynstruminten produsearre wurdt, mar ek sjongstimmen en foarôf opnommen materiaal. Live-discjockeys wurkje útslutend mei yn it foar opnommen materiaal.
Boarnen, noaten en/as referinsjes: |
Foar boarnen en oare literatuer, sjoch ûnder: References, op dizze side. |
This article uses material from the Wikipedia Frysk article Mixen (lûd), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Ynhâld is beskikber ûnder CC BY-SA 4.0, at net oars neamd wurdt. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Frysk (DUHOCTRUNGQUOC.VN) is an independent company and has no affiliation with Wiki Foundation.