Bittor Kapanaga Elorza (Otxandio, Bizkaia, 1925eko urriaren 15a - Gasteiz, Araba, 2011ko uztailaren 14a) euskaltzalea eta euskal idazlea zen.
Bittor Kapanaga | |
---|---|
Kapanaga (lehena ezkerretik) Aita Oinandia eta Laspiurrekin, Arantzazun, 1963an | |
Bizitza | |
Jaiotza | Otxandio, 1925eko urriaren 15a |
Herrialdea | Bizkaia, Euskal Herria |
Heriotza | Gasteiz, 2011ko uztailaren 14a (85 urte) |
Hezkuntza | |
Hizkuntzak | euskara gaztelania |
Jarduerak | |
Jarduerak | idazlea |
Aita eta ama euskaldunak zituen, aita kaletarra eta ama baserritarra. Bost urtedun, amak erdara apur bat irakatsi eta eskolara joan zen, dena erdaraz ikasten zen garaian. Zortzi urte zituela aita hil zitzaion, zorte txarreko ebakuntza baten ondoren. Ama hiru seme-alabekin geratu zen bakarrik.
Hamar urte zituela gerra hasi zen, hegazkinetatik ihesi aititak Berrizen zuen baserriraino heldu zen. Bertan bederatzi hilabete eman eta gero Otxandioko baserri erre suntsitura itzuli ziren kale-baserri bizitzara, behi pare bat eta lur batzuekin.
Hogei urtedun, Eibarrera joan zen lanera. Egunez, fabrikan aritzen zen, eta gauez, Armeria Eskolan. Industria-maisu ikasketak egiten zebilela, herri hartako gerraosteko euskal mugimendua sortu zuen, beste zenbait euskaltzalerekin batera. Gauez, euskara irakasten hasi zen Klub Deportiboan. 1953an, Euzko Gogoa aldizkarian hasi zen idazten; geroago, Zeruko Argian, Anaitasunan eta beste batzuetan. 1978an, Euskera erro eta gara liburua argitaratu zuen, euskararen erroen bila joanda.
Eibarren 13 urte egin eta Otxandiora itzuli zen kooperatibak sortu eta antzeko beharretara, beti ere hiru zaletasun hauekin: euskaraz idatzi, hizkuntza ikertu eta baratza zaindu.
Bittor Kapanagak eta Gontzal Mendibilek elkarrekin sortu zuten Bagare euskal abesti ezaguna, 1974ko negualdean: Kapanagak jarri zizkion hitzak, eta Mendibilek musika.
This article uses material from the Wikipedia Euskara article Bittor Kapanaga, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Eduki guztia CC BY-SA 4.0(r)en babespean dago, ez bada kontrakoa esaten. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Euskara (DUHOCTRUNGQUOC.VN) is an independent company and has no affiliation with Wiki Foundation.