Miriam Si Sveglia A Mezzanotte
C'l artìcul chè 'l è scrit in Miranduléś
Miranduléś The Hunger | ||
| Miriam si sveglia a mezzanotte | ||
 La Catherine Deneuve in na figùra dal film | ||
| La Miriam la s darséd a Meśanòt 1983 | ||
|---|---|---|
| Regìa: Tony Scott | ||
| Scritōr: Whitley Strieber • Ivan Davis Michael Thomas | ||
| Atōr: Catherine Deneuve • Susan Sarandon David Bowie • Cliff De Young • Dan Hedaya Bessie Love • Beth Ehlers • Suzanne Bertish Rufus Collins • Shane Rimmer • Willem Dafoe James Aubrey • Ann Magnuson • Peter Murphy | ||
| Müsica: Michel Rubini • Danny Jaeger | ||
| Léngua: Ingléś | ||
| Dürä dal film: 100 minüt | ||
| Nasiōṅ: Stat Unî • Régn Unî | ||
Miriam si sveglia a mezzanotte (La Miriam la s darséd a Meśanòt) 'l è 'n film ad scarésa dal 1983 ad Tony Scott, fradèl più pìcul ad Ridley Scott, chè a 'l sò debùt, trat da 'n rumànś ad Whitley Strieber. Al tìtul uriginàŀ 'l è The Hunger e al s riferìs a la fam, ch'la fà vgnir in mènt la vója 'd un quèl da cavàr-'s a tut i cóst, cuma quéla di vampîr p'r al sangṿ. In dal film i rècitan la Catherine Deneuve, David Bowie e la Susan Sarandon, cun di camèo ad Peter Murphy di Bauhaus ('l è 'l cantànt ch'al s śibìs a 'l inìsi in dla discutéca cantànd Belalugosi's dead) e 'd un śōvan Willem Dafoe ('l è 'l ragàs ch'al dmanda a la Sarah 'd lasàr libra la cabìna dal telèfun). C'n al pasàr dal tèmp al film 'l è dvintâ un cult movie .
'L è stâ preśentâ fóra cuncōrs a 'l 36śum Fèstival ad Cannes. I custùm dla Deneuve i èṅ 'd Yves Saint-Laurent.
Sunt
La Miriam (Catherine Deneuve) l'è na vampìra ch'l'à gh'à da piò ad trimìl'an in sal cupét. Quànd i pàsan dū o tri sècui però la gh'à sèmpar da cambiàr al sò cumpàgn ad vita parchè quél ch'la s sarnìs ad vòlta in vòlta al taca a dvintàr vèć tut 'd un cólp méntar lē la rèsta sèmpar śóvna. Par vìvar la gh'à da tōr al sangṿ a 'l sò vitmi e la 'l fà druànd la cróś egìsia ("ankh") dla sò cadnìna ch'la s vèra dvintànd un curtlèṅ bòṅ par tajàr al góli. Quànd al sò muróś John (David Bowie) al và incóntar anca lò a cal destîṅ lè, al s fà védar da la dutōra Sarah Roberts (Susan Sarandon) par tintàr ad far-la franca ma a n gh'è gnint da far. In cal méntar la Miriam la gh buta i òć adòs e la s la pòrta a lèt, faghénd-la pò dvintàr na vampìra anc lē tirànd-ag di murśgòt a 'l còl e a i bras.
La Sarah però la n vōl pròpria briśa vìv'r acsè, la s vargóggna ad quél ch'l'è dvintàda, e dònca la próa a tōr-'s la vita. La Miriam la pòrta la Sarah in dal tasèl mòrt in du i èṅ tut i sò vèć amànt ardùt a di cadàvar tarulî ma, pròpria in cal méntar, chi lōr i s darsédan e i gh vaṅ incóntar, faghénd-ag ciapàr un cōlp. La Miriam la strabùca śò p'r al scali e, méntar l'è drē a murìr, i cadàvar i tàcan a śbrandlàr-as piàn piàṅ, dand un taj finalmènt a la sò maledisiòṅ. A gh rèsta sōl la Sarah ch'la tōś acsè 'l pòst dla Miriam: dand 'n òć ad fóra da 'l bśól dal palàs, par lē la taca na vita nóva.
Culòna sunóra
- Bela Lugosi is Dead - Bauhaus
- Dôme épais le jasmin (dall'opera Lakmé) - Léo Delibes
- Miserere - Gregorio Allegri
- Trio in Sol Minore Opera 100 - Franz Schubert
- Suite n.1 per violoncello solo in sol maggiore, Preludio, I movimento - Johann Sebastian Bach
- Partita n.3 in Sol-Maggiore 'Gavotte en Rondeau' - Johann Sebastian Bach
- Atto I, Scena 2: Duetto Viens Mallika...Dôme épais le jasmin - Léo Delibes
- Piano Trio No. 1 in C - Edouard Lalo
- Sonata per pianoforte in si bemolle maggiore D 960. Andante sostenuto (2nd tèmp) - Franz Schubert
- Le Gibet da Gaspard de la Nuit - Maurice Ravel
- Funtime - Iggy Pop (David Bowie/Iggy Pop)
- Nightclubbing - Iggy Pop
Gl'ùndas braṅ dla sountrack ad Michel Rubini e Danny Jaeger:
- Schubert: Trio in E Flat, Op. 100 (Estràt)
- Beach House (Rubini/Jaeger) a la vóś: Stefany Spruill
- Bach: Suite #1 for Solo Cello in G-Major, Preludium (Estràt)
- Waiting Room / Flashbacks (Rubini/Jaeger)
- Sarah's Panic (Rubini/Jaeger)
- The Arisen (Rubini/Jaeger)
- Bach. Partita #3 in E-Major, Gavotte En Rondeau (Estràt)
- Delibes: Lakme (Estràt)
- Sarah's Transformation (Rubini/Jaeger)
- The Final Death (Rubini/Jaeger)
- Schubert: Trio in E-Flat, Op. 100 (Estràt)
Culegamènt estéran
- (EN) La schéda dal film in s'l IMDb
- (IT) La schéda dal film in sal FilmTV
- (IT) La schéda dal film in sal sit 'd IlSole24Ore
Nòti
This article uses material from the Wikipedia Emiliàn e rumagnòl article Miriam si sveglia a mezzanotte, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contenuto è disponibile in base alla licenza CC BY-SA 4.0, se non diversamente specificato. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Emiliàn e rumagnòl (DUHOCTRUNGQUOC.VN) is an independent company and has no affiliation with Wiki Foundation.