Urzh Herberc'hourien Sant-Yann Jeruzalem, Rodez ha Malta eo anv klok an urzh katolik a vez graet Urzh Sant Yann Jeruzalem anezhañ peurvuiañ.
Anavezet eo ivez dindan an anv a Urzh an Herberc'hourien, Urzh an Ospital, pe e anv latin Ordo Hospitalis sancti Johannis Ierosolimitani.
Ken kozh hag an XIvet kantved e vefe pa oa aet d'en em staliañ da Jeruzalem marc'hadourien kêr Amalfi en Italia. Tier-herberc'h hag ospitalioù a savas en Douar Santel evit degemer perc'herined klañv. Met evel ar Venec'h Ruz, Menec'h an Templ, e teuas an Herberc'hourien da vezañ soudarded kerkoulz ha menec'h, evit difenn ar glañvourien en ospitalioù er penn kentañ met evit en em gannañ a-enep ar Sarrazined da c'houde. Goude bezañ bet skarzhet diouzh an Douar Santel ez eas an urzh d'en em staliañ da gKiprenez a-raok aloubiñ Enez Rodez. O roud o deus lezet un tamm pep lec'h en Europa o sevel klañdioù a zegemere ar berc'hirined klañv. E Breizh e kaver meur a hini evel hini Sant Yann e Plougastell-Daoulaz
Galloudus e teuas da vezañ an urzh er Mor Kreizdouarel o terc'hel da vrezeliñ a-enep ar Sarrazined. Pa voe skarzhet gant an Impalaeriezh Otoman e kavas bod an urzh en Enez-Valta a voe roet dezho gant an Impalaer Charlez V.
Ur galloud a-bouez e teuas da vezañ e Kreiz ar mor Kreizdouarel ha mestr e chomas an urzh war an enezenn betek ma voe skarzhet o Mestr-Meur gant Bonaparte en anv ar Republik Gall. Gwarezet e voe an urzh neuze gant ar Tsar Paol Iañ Rusia. Goude ur prantad diskar e voe renevezet an urzh dindan anv Urzh Malta. Dont a reas da vezañ un aozadur denegour oberiant tre, dilezet gantañ an armoù hag o lakaat nebeutoc'h a bouez war ar relijion.
This article uses material from the Wikipedia Brezhoneg article Urzh Sant Yann Jeruzalem, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Danvez a c'haller implijout dindan CC BY-SA 4.0 nemet ha notet e vefe ar c'hontrol. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Brezhoneg (DUHOCTRUNGQUOC.VN) is an independent company and has no affiliation with Wiki Foundation.