Riz Dre Laezh

A-orin kreizaziat eo, met kavet e vez en ur bern broioù dre ar bed rak ur meuz simpl ha mat eo, debret gant ar vugale hag an dud gour.

Kalz doareoù zo d'e aozañ. Ar riz, krenn peurliesañ, a c'hall bezañ bervet pe poazhet er forn.

Setu roll an aozennoù a c'haller kavout :

• ar riz : riz gwenn (krenn pe hir, bruzhun riz, basmati pe thai), riz gell, riz du
• e-lec'h riz e c'haller implijout semoul, boulgour, tapioka, vermisel...
• al laezh : laezh-dienn, laezh-kokoz, dienn, laezh koazhet. Laezh buoc'h, gavr en Italia, kañvalez e Rajasthan (India), yak, bual tibok-tibok er Filipinez. Laezh goell a vez implijet en Azia, ha laezh kaoulet e Rusia, ur probiotik kreñv eo.
• spisoù (kardamom, kraoñ-muskadez, kanell, jinjebr hag all)
• frondoù ha pallennadoù (vanilha, orañjez, sitroñs, dour roz ; pistachez, alamandez, kraoñ-kajou, rezin sec'h, kraoñ hag all)
• ar sukr : sukr gwenn pe rous, mel, laezh koazhet sukret, datez, frouezh pe siros
• vioù a-wechoù

D'an holl bredoù e c'hall bezañ servijet riz dre laezh hervez ar broioù hag an hengounioù. En Europa e vez debret evel un dibenn-pred kentoc'h, pe da verenn-vihan. E Norzh Europa e vez debret da lein, a-wechoù da verenn. Ar farz-riz zo ur wastell graet gant riz dre laezh. Hiziv e vez kinniget riz dre laezh gant ar strolloù gounezvouederezh bras.

Kontañ a ra ar soutraoù boudaat e voe debret ur volennad vras a riz dre laezh gant Gautama Bouddha a-raok tizhout ar sklêrijenn, aozet dezhañ gant ur plac'h anvet Sujata.

Roudoù eus ar riz dre laezh a gaver e bro ar Vongoled evit magañ o c'hezeg. Ul louzoù e oa d'ar Romaned ha d'ar Vizantioned en Henamzer hag er Grennamzer. Meneget eo e Baghdad en X^vet kantved, hag en Iran e Levr ar Rouaned skrivet gant Ferdowsi tro-dro ar bloaz 1000. En iskevandir Indez e vez debret kheer abaoe an XII^vet kantved da nebeutañ.

E Breizh-Veur e kaver roudoù eus ar riz dre laezh ken pell ha mare an tiegezh Tudor. Kaoz zo e Bro-C'hall e 1787 eus riz dre laezh e-touez an 8 doare da aozañ riz gant ar mezeg Pierre-Joseph Buc'hoz. Ur barzhoneg a voe skrivet diwar-benn ar riz dre laezh gant ar Saoz Alan Alexander Milne (1882-1956).

•  
  Riz dre laezh e Makedonia
•  
  Arroz con leche greantel gant kanell
•  
  Riz dre laezh gant safron (Paal payasam eus Kerala en India)
•  
  Teurgoule norman poazhet en ur plad hengounel
•  
  Risalamande, pred Nedeleg e Danmark
•  
  Arroz doce, ur pred Nedeleg e Portugal
•  
  Bubur ketan hitam malaysat
•  
  Kheer indiat, ur meuz hag a sav d'an Henamzer
•  
  Firinda sütlaç (Turkia)
•  
  Sarkarai Pongal tamoul aozet e-pad gouelioù eostoù Tamil Nadu
•  
  Ри́совий пу́динг ukrainat

Sed amañ ur rekipe riz dre laezh klasel :

• riñsit ar riz en dour,
• poazhit eñ en dour berv e-pad 2/3 munut evit lakaat anezhañ da vezañ boukoc'h,
• poazhit eñ gant laezh, vanilha, amann e-pad 15/18 mun,
• ouzhpennit ar sukr.

Da servijout tomm pe glouar.

• teurgoule, ar riz dre laezh norman hag a vez poazhet 5 eur er forn
• ar gwenngaot, ur seurt farz graet gant laezh ha sukr, ha gant bleud riz a-wechoù