Kentelioù An Noz

E 1985 e oa bet savet ar gevredigezh Kentelioù an Noz gant Gweltaz Adeux, Roland Mogn ha Gwenola Rossinyol.

E-pad pell ez eus bet graet skol vrezhoneg d'an dud deuet gant he c'helennerien e Naoned hepken.

E 2001 e oa aet an traoù kalzik war-raok pa oa bet krouet ur post a-vicher (implijad yaouank). Dre-se e oa bet ledanaet an dachenn kelenn d'al Liger-Atlantel a-bezh (eus Erbigneg betek Gored e-kichen Klison) ha divizet e oa bet diorren an obererezhioù tro-dro d'ar brezhoneg (sport, c'hoarioù-dudi, keginañ...).

D'an 29 Kerzu 2003 e oa bet roet ar gratadur Yaouankiz ha Sportoù dezhi.

E 2007 e oa deuet da vezañ ur gengevredigezh. Krouet eo bet Kentelioù an Noz - Gwinieg e miz Mezheven 2008 el Lavreer-Botorel, Kentelioù an Noz - Chapel-Erzh e miz Kerzu 2008, ha Kentelioù an Noz - Gwerzhav e miz Kerzu 2008 ivez.

E 2008 ez eus 17 kelenner oc'h ober skol vrezhoneg da noz pe war an deiz, ha dre se eo ar framm brasañ e Breizh e-keñver niver a gelennerien.

Ouzhpenn stajoù e Naoned hag er Poulgwenn e voe graet he staj kentañ ganti e Bro-Raez, e Kerverner-Raez, d'an 9 C'hwevrer 2009.

E 2010 e oa 250 ezel gant ar gevredigezh. Krouidigezh ur gevredigezh lec'hiel ouzhpenn Kentelioù an noz - Ar Groazig.

E 2011 : savet eo bet Kentelioù an noz - Reudied ha Kentelioù an noz - Kastell-Briant. Digoret ez eus bet kentelioù e Nozieg.

E miz Gouere 2013 eo bet dilennet Kevin Caillaud da brezidant, e penn ur c'huzul-merañ cheñchet penn da benn. En diskar-amzer e voe digoret ur strollad e Ankiniz, brasañ kêr reter Bro-Naoned, evit ar wech kentañ.

E miz Gouere 2014 e voe aozet pemp troad d'ar maout! gant Kentelioù an Noz. Ar wech kentañ e oa d'ur c'hamp vakañsoù evit ar vugale a oar brezhoneg bezañ aozet e Bro-Naoned, e Gweltaz-Lambrizig. E miz Gouere 2015 e voe aozet ar staj adarre: e kambr ar stered a voe graet anezhañ.

E 2015 eo tregont vloaz Kentelioù an Noz. A vloaz da vloaz eo aet ar gevredigezh war vrasaat, rak tost 300 ezel he deus. Gallout a ra ar re-se heuliañ kentelioù sizhuniek (24 c'hentel war 5 live e 2015) pe kemer perzh en obererezhioù niverus aozet ingal.

E miz Gwengolo 2015 e voe roet lañs da gentelioù brezhoneg e Santez-Lusenn, er reter da Naoned, a-drugarez d'ar gevredigezh lec'hel Kentelioù an Noz - Santez-Lusenn.

E 2016 e tivizas ar gevredigezh aozañ ur staj ur sizhunvezh evit an dud deuet hag a voe aozet e miz Gouere e Sant-Enion, war vord al Lenn-Veur. Paul-Henri Morin zo dilennet da brezidant.

E 2023 e kinnig ar gevredigezh kentelioù en Naoned, e Sant-Ervlan, e Sant-Nazer, en Antr, hag el Lavreer-Botorel.

• Live 1: 7 strollad
• Live 2: 2 strollad
• Live 3: 2 strollad
• Kentel Komz: 4 strollad
• Tolpad Koñz: 1 strollad

• Abadennoù tañva (gallaoueg, golf, radio...)
• Bodadoù-komz
• Bodad-lenn
• Bodad-liorzhañ
• Baleadennoù
• Beilhadegoù kontet
• Kamp vakañsoù-hañv evit ar vugale
• Kentelioù kembraeg
• Kentelioù ha stajoù kanañ
• Kentelioù evit prientiñ arnodenn vrezhoneg ar vachelouriezh
• Skol gouren
• ar Skrivadeg, da-geñver Sizhunvezh ar brezhoneg
• Strollad c'hoariva
• Stalioù keginañ
• Tro ha Bistro, evit bodañ an izili en un davarn bep miz

• ASB 44, an Ajañs Sevenadurel Breizhek
• Yezhoù ha Sevenadur, kreizenn degemer ha diorren sevenadur Breizh el Liger-Atlantel
• KDSK, mediaoueg brezhonek, breizhek ha keltiek diazezet e Sant-Ervlan
• Hentoù Breizh, kevredigezh o lakaat sevenadur Breizh war-wel e Bro Ankiniz
• DAO

• 2003 : Priz rannvroel dazont ar brezhoneg (aozet gant Kuzul-rannvro Breizh hag Ofis ar Brezhoneg)
• 2004 : Priz al labour a-youl-vat (aozet gant Banque populaire Atlantique)
• 2005 : Priz rannvroel dazont ar brezhoneg (aozet gant Kuzul-rannvro Breizh hag Ofis ar Brezhoneg)

• Lec'hienn ofisiel