རྒྱུ་འབྲས་ཀྱི་ཐེག་པའི་བྱེ་བྲག་ཆེན་མོ་

དུས་དེང་སང་གི་གང་ཟག་རྣམས་རྒྱལ་བའི་བཀའ་རྣམས་ལ་ཐོས་པ་དོན་དུ་གཉེར་ཀྱང་དེ་དག་གི་དོན་གྱི་བསམ་པ་ཀུན་དོན་དུ་གཉེར་བར་མ་ལྕོགས་པ་དང་། གང་ལ་གོམས་པ་དེ་ཡི་གཞུང་བཟུང་ནས་གཞན་གྱི་དོན་མ་མཐོང་བཞིན་དུ་རང་གི་ཉམས་དང་སྦྱར་ནས་སྒྲོ་འདོགས་པ་དང་། སྐུར་བ་འདེབས་པར་འགྱུར་རོ། །དེ་ཡི་དབང་གིས་མཚན་ཉིད་ཀྱི་ཐེག་པ་ཆེན་པོ་དང་། གསང་སྔགས་ཀྱི་ཐེག་པ་ལ་ལྟ་བའི་ཁྱད་པར་དང་སྤྱོད་པའི་ཁྱད་པར་དང་མངོན་པར་རྟོགས་པ་མྱུར་མི་མྱུར་གྱི་ཁྱད་པར་དང་འབྲས་བུའི་ཁྱད་པར་ལ་སྒྲོ་སྐུར་དུ་གྱུར་ཏེ། ཁ་ཅིག་ནི་ཐམས་ཅད་ལ་ཁྱད་པར་ཡོད་དོ་ཞེས་ཟེར། ཁ་ཅིག་ནི་སྤྱོད་པའི་ཁྱད་པར་འགའ་ཞིག་མ་གཏོགས་པ་གཞན་ཁྱད་པར་མེད་དོ་ཞེས་ཟེར་ཏེ། དེ་ལྟར་རྩོད་པ་དེས་བསླབ་པར་འདོད་པ་རྣམས་ཀྱི་བློ་ཐེ་ཚོམ་དུ་འགྱུར་ཏེ། འཇུག་པའི་སྒོ་ཡང་འགེག །དད་པ་ཡང་མེད་པར་བྱེད། སྒྲོ་སྐུར་གྱི་སྡིག་པ་ཡང་སོགས་པར་འགྱུར་བས། ༼དེ་དག་གི་དོན་དུ། ༽བདག་གིས་ཕྱོགས་སུ་འཛིན་པའི་བློ་བཏང་སྟེ་གཟུ་བོའི་བློས་མཐུན་ཞིང་ཐུན་མོང་དུ་གྱུར་པ་ནི་མཐུན་པར་སྦྱར། ཁྱད་པར་དུ་གྱུར་པ་ནི་ཁྱད་པར་དུ་དབྱེ་བར་བྱའོ། །དེ་ལ་ལྟ་བ་ལ་ཁྱད་མེད་པ་ནི། དོན་དམ་པར་ཆོས་སརྦ་ཀུན་དང་བྲལ་བར་འདོད་པ་དང་། ཀུན་རྫོབ་སྣང་བ་སྒྱུ་མ་ཙམ་དུ་འདོད་པ་ནི་ཐེག་པ་ཆེན་པོ་ཀུན་མཐུན་ནོ། །སྣང་བ་ཉིད་སེམས་ཀྱི་སྣང་བ་ཡིན་པར་འདོད་པ་ནི། རྣལ་འབྱོར་སྤྱོད་པ་དང་མཐུན་ནོ། །སྤྱོད་པའང་། སྙིང་རྗེ་ཆེན་པོས་སེམས་ཅན་ཡོངས་སུ་མྱ་ངན་ལས་བཟླ་བའི་སྤྱོད་པ་༼ལ་ཞུགས་པ་༽ནི་མཐུན་ནོ། །མངོན་པར་རྟོགས་པ་མྱུར་མི་མྱུར་ནི། གང་ཟག་གི་ཁྱད་པར་དང་། ལམ་གྱི་ཁྱད་པར་དང་། ལམ་གྱི་གནས་སྐབས་ཀྱི་ཁྱད་པར་གྱིས་དབྱེའོ། །འབྲས་བུ་ལ་ཁྱད་པར་མེད་དོ། །མི་མཐུན་པ་ནི་ཁྱད་པར་གྱི་ཞར་ལ་སྟོན་ཏེ་དེ་ལ་ཁྱད་པར་གང་ཞིག་ཞེ་ན། མཚན་གྱི་ཁྱད་པར་གྱི་སྒོ་ནས་བརྩམས་ཏེ་དབྱེ་བར་བྱའོ། །དེ་ལ་མདོ་སྡེ་དང་གསང་སྔགས་ཞེས་གང་གསུངས་པ་ལ། མདོ་ཞེས་བྱ་བ་ནི་བསླབ་པ་གསུམ་དང་ལྡན་པ་ཉན་ཐོས་རྣམས་དང་ཐུན་མོང་དུ་གྲགས་པར་གསུངས་པ་སྟེ། འདི་ལྟར་འཁོར་གྱི་དཀྱིལ་འཁོར་དུ་ཉན་ཐོས་དག་དང་ཐུན་མོང་བ་སྟེ་གྲགས་པ་ཙམ་ཐུན་མོང་བའོ། །བསླབ་པ་ནི་ཐུན་མོང་ཡང་ཡོད་ཐུན་མོང་མ་ཡིན་པ་ཡང་ཡོད་དོ། །གསང་སྔགས་ཞེས་བྱ་བ་ནི། ཐབས་མཁས་པའི་བྱང་ཆུབ་སེམས་དཔའ་རྣམས་ཀྱི་གསང་བའི་སྤྱོད་པ་ཡིན་པ་དང་། རྡོ་རྗེ་འཆང་རྣམས་ཀྱི་གསང་བའི་སྤྱོད་པ་ཡིན་ཏེ། དེ་ལ་ཉན་ཐོས་རྣམས་དང་གྲགས་པ་ཙམ་ཡང་ཐུན་མོང་མ་ཡིན་ནོ། །དེ་ནི་འདི་ལྟར་འཕགས་པ་ཐབས་ཀྱི་ཞགས་པ་ཞེས་བྱ་བ་རྣལ་འབྱོར་གྱི་རྒྱུད་ལས། སངས་རྒྱས་བཅོམ་ལྡན་འདས་རྣམས་ཀྱི་སྤྱོད་ཡུལ་ཉན་ཐོས་དང་ཐུན་མོང་མ་ལགས་པ། ཞེས་གསུངས་ཏེ། ཐབས་མཁས་པའི་བྱང་ཆུབ་སེམས་དཔའ་ནི་མ་བཀག་གོ །བྱང་ཆུབ་ཀྱི་སེམས་སྒོམ་པ་ཞེས་བྱ་བ་རྣལ་འབྱོར་གྱི་མན་ངག་ལས་ཀྱང་། ཐབས་ཆེན་བྱང་ཆུབ་སེམས་དཔའི་གསང་བའི་སྤྱོད་པ་འདི་ཉིད་དོ། །ཞེས་གསུངས་སོ། །ཐབས་མི་མཁས་པའི་བྱང་ཆུབ་སེམས་དཔའ་བཀག་སྟེ། བདུད་རྩིའི་ལུང་ལས། མདོ་སྡེའི་བྱང་ཆུབ་སེམས་དཔའ་མིང་ཡང་མི་གྲགས་པའི་ནང་དུ། ཞེས་གསུངས་སོ། །གསང་སྔགས་ཀྱི་དཀྱིལ་འཁོར་དུ་ཡང་། ཉན་ཐོས་རྣམས་ནི་མ་སྨོས། བྱང་ཆུབ་སེམས་དཔའ་ནི་སྨོས་སོ། །གསང་སྔགས་ཉིད་གང་ཞེ་ན། ཐབས་དང་ཤེས་རབ་ཉིད་ཕུལ་དུ་བྱུང་བས་ཐུན་མོང་མ་ཡིན། ཞེས་བྱ་བའི་དོན་ནོ། །དེ་ལ་ཤེས་རབ་ཕུལ་དུ་བྱུང་བ་གང་ཞེ་ན། ཀུན་རྫོབ་ཙམ་དུའང་བླང་དོར་གྱི་དམིགས་པ་མེད་དོ། །ཐབས་ཕུལ་དུ་བྱུང་བ་གང་ཞེ་ན། དེ་དང་རྗེས་སུ་མཐུན་པའི་ཐབས་ཏེ་འོག་ནས་རིག་པར་བྱའོ། །༼གསང་སྔགས་རང་གི་ངོ་བོ་ཉིད་ནི། ཐབས་དང་ཤེས་རབ་ཕུལ་དུ་བྱུང་བ། སྒོ་ནི་ཡི་གེའི་ཚོགས། རྟགས་ནི་ལྷའི་སྐུ། ཤེས་པ་དང་དཔུང་གཉེན་དུ་ལྡན་པའི་ཕྱིར། གསང་སྟེ་བརྗོད་པའི་ཕྱིར་དང་། གསང་བ་མཆོག་ཏུ་གྱུར་པ་དང་། ཐབས་ལ་མཁས་པ་དང་བློ་གྲོས་དག་གི་སྒོ་ནས་མན་ཏྲ་ཞེས་བསྟན་ཏོ། །༼འདི་མཆན་ཡིན་ཟེར་ཡང་། གསུང་དངོས་ཡིན་སྙམ། འབྲུ་ཆེན་བྲི་ན་ལེགས་སྙམ། ༽ཞེས་རྫོགས་ཆེན་ཤིང་པར་དུ་དུས་ཕྱིས་བཏབ་པའི་རྒྱུག་ཡིག་གི་མཆན་ཆུང་ཞིག་འདུག་ལ། རྨུགས་སངས་པར་མར་དེ་བཞིན་དཀྱུས་སུ་བཅུག་འདུག། ༽ཡང་མཚན་ཉིད་ཀྱི་ཐེག་པ་དང་། རྡོ་རྗེའི་ཐེག་པ། ཞེས་གསུངས་པ་ལ། མཚན་ཉིད་ཅེས་བྱ་བ་ནི། ཀུན་རྫོབ་ཙམ་དུ་ཆོས་རྣམས་ཀྱི་མཚན་ཉིད་གཙོར་བཏོན་ཏེ། འདི་ནི་ཀུན་ནས་ཉོན་མོངས་པའི་མཚན་ཉིད་དོ། །འདི་ནི་རྣམ་པར་བྱང་བའི་མཚན་ཉིད་དོ། །འདི་དག་ནི་སྤང་བར་བྱ་བའི་ཆོས་སོ། །འདི་དག་ནི་ཐོབ་པར་བྱ་བའི་ཆོས་སོ། །འདི་དག་ནི་ཤེས་པར་བྱ་བའི་ཆོས་སོ། །དོན་དམ་པའི་མཚན་ཉིད་ནི་འདི་ལྟ་བུའོ། །ཀུན་རྫོབ་ཀྱི་མཚན་ཉིད་ནི་འདི་ལྟ་བུའོ། །ཞེས་སྟོན་པའོ། །རྡོ་རྗེ་ཐེག་པ་ཞེས་བྱ་བ་ནི། ཀུན་རྫོབ་ཙམ་དུ་ཡང་ཆོས་རྣམས་ལ་མི་གཉིས་པའི་བསམ་པ་དང་སྤྱོད་པ་དག་སྤྱད་དེ། ཐམས་ཅད་དབྱེར་མེད་པར་སྤྱོད་པ་ནི་རྡོ་རྗེའི་ཐེག་པའོ། །དེ་ལྟར་རྡོ་རྗེ་སེམས་དཔའི་སྒྱུ་འཕྲུལ་ལས། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་དུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག ། ཀུན་རྫོབ་ཙམ་དུ་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་གསུངས་སོ། །ཡང་། བླ་ན་མེད་པའི་ཐེག་པ་དང་། ཐབས་ཀྱི་ཐེག་པ་ཞེས་གང་གསུངས་པ་ལ་བླ་ན་མེད་པའི་ཐེག་པ་ཞེས་བྱ་བ་ནི། ཉན་ཐོས་ཀྱི་བྱང་ཆུབ་དང་། རང་རྒྱལ་བའི་བྱང་ཆུབ་ལས་འཕགས་པ། བླ་ན་མེད་པའི་བྱང་ཆུབ་ཆེན་པོའི་ཐེག་པ་ཡིན་ལ། དེ་ཉིད་ལས་ཐབས་ཆེན་པོས་འཕགས་པས་ཐབས་ཀྱི་ཐེག་པའོ། །ཐབས་ཆེན་པོ་གང་ཞེ་ན། ཐབས་མྱུར་བ་དང་། སླ་བ་དང་། མཁས་པ་དང་། མང་བ་སྟེ་འོག་ནས་འཆད་དོ། །ཡང་རྒྱུ་དང་འབྲས་བུའི་ཐེག་པ་ཞེས་གསུངས་པ་ལ། །རྒྱུ་ཞེས་བྱ་བ་ནི། མྱ་ངན་ལས་འདས་པའི་ཆོས་ཀྱི་རྒྱུར་གྱུར་པ་རྣམ་པར་བྱང་བའི་ཆོས་ལམ་དུ་བྱས་ཏེ་ངེས་པར་འབྱུང་བར་འདོད་པ་ཡིན་ལ། འབྲས་བུའི་ཐེག་པ་ཞེས་བྱ་བ་ནི། ཆོས་ཐམས་ཅད་འབྲས་བུའི་ཆོས་ཉིད་དུ་ཡེ་ནས་སངས་རྒྱས་ནས་ལམ་ཡང་དེ་ཉིད་ལ་གནས་ཀྱང་དེ་ཉིད་དོ། །ཞེས་འདོད་པའོ། །དེ་ལྟར་ཡང་གདམས་ངག་འཕོག་པའི་མདོ་ལས། རྒྱུ་ལ་མོས་པར་རྒྱུ་ཡི་ཆོས། །འཁོར་ལོ་ཤིན་ཏུ་བསྐོར་བྱས་ནས། །འབྲས་བུའི་ཐེག་པ་ཉེ་ལམ་ཞིག །ཞེས་བྱ་བ་ལ་སོགས་པ་གསུངས་སོ། །མཚན་ཡང་དག་པར་བརྗོད་པ་ཞེས་བྱ་བ་འཇམ་དཔལ་གྱི་སྒྱུ་འཕྲུལ་ལས། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས་སོ། །ཡང་ཐེག་པ་ཆེན་པོ་དང་། ཆེན་པོའི་ཡང་ཆེན་པོ་ཞེས་གང་གསུངས་པ་ལ། ཐེག་པ་ཆེན་པོ་ནི་ཉན་ཐོས་དག་ལས་ཆེན་པོ་རྣམ་པ་བདུན་གྱིས་འཕགས་པར་གསུངས་ཏེ། འདི་ལྟར་༼ཟབ་ཅིང་རྒྱ་ཆེ་བའི་མདོའི་དོན་ལ། ༽དམིགས་པ་དང་། ༼བདག་གཞན་གཉི་གའི་དོན། ༽སྒྲུབ་པ་དང་། ༼ཆོས་དང་གང་ཟག་བདག་མེད་རྟོགས་པ། ༽ཡེ་ཤེས་དང་། ༼འགྲོ་བའི་དོན་ལ་མི་སྐྱོ་བ། ༽བརྩོན་འགྲུས་དང་། ༼ མཐའ་གཉིས་ལ་མི་གནས་པ། ༽ཐབས་དང་། ༼སངས་རྒྱས་ཀྱི་ཞིང་ཡོངས་སུ་སྦྱངས་པ་དང་སེམས་ཅན་ཡོངས་སུ་སྨིན་པར་བྱ་བའོ། ༽ཕྲིན་ལས་དང་། ༼སྟོབས་དང་ཡེ་ཤེས་དང་མི་འཇིགས་པ་དང་མ་འདྲེས་པ་དང་། སྐུ་དང་ཡེ་ཤེས་ཀྱིས་བསྡུས་པའི་ཆོས་སོ། ༽ཡང་དག་པར་འགྲུབ་པ་ཆེན་པོ་དང་བདུན་ནོ། །གཞན་ཡང་མངོན་པར་རྟོགས་པ་མྱུར་བ་ལ་སོགས་པ་ཇི་སྙེད་པའང་འདི་རྣམས་སུ་འདུས་སོ། །དེ་ལས་གསང་སྔགས་ཀྱི་ཐེག་པ་ཆེན་པོ་རྣམ་པ་བཞིས་འཕགས་པར་བསྟན་ཏེ། གོང་མ་དྲུག་ནི་བཞིར་འདུས་ལ། ཡང་དག་པར་གྲུབ་པ་ལ་ནི་ཁྱད་པར་མེད་པར་བསྟན་ཏོ། །དེ་ལ་བཞི་གང་ཞེ་ན། དམིགས་པ་ཆེན་པོ་དང་། བསྒྲུབ་པ་ཆེན་པོ་དང་། ཡེ་ཤེས་ཆེན་པོ་དང་། ཐབས་ཆེན་པོའོ། །དེ་ལ་དམིགས་པ་ཆེན་པོ་ནི། འདིར་གསང་བ་ཆེན་པོའི་དོན་ཐུན་མོང་མ་ཡིན་པ་ལ་དམིགས་ཏེ། དེ་ཡང་རྣམ་པ་དྲུག་གི་ཚུལ་གྱིས་ཐུན་མོང་གི་མདོའི་དོན་ལས་འཕགས་ཏེ། འདི་ལྟར། དོན་དམ་པ་རྒྱུར་ལྟ་བ་དང་། ཀུན་རྫོབ་འབྲས་བུར་ལྟ་བ་དང་། རྒྱུ་གནས་སུ་ལྟ་བ་དང་། འབྲས་བུ་རྒྱལ་བའི་དལ་དུ་ལྟ་བ་དང་། བྱེད་སྤྱོད་ཚོགས་སུ་ལྟ་བ་དང་། དེ་ལྟ་བུའི་དོན་གྱིས་ཀུན་རྫོབ་ཙམ་དུའང་རྒྱུ་འབྲས་དབྱེར་མེད་དུ་ལྟ་བའོ། །དེ་ལ་སྒྲུབ་པ་ཆེན་པོ་ནི། བདག་དང་གཞན་གཉི་གའི་དོན་བསྒྲུབ་པར་གསུངས་པ་དེ་ལས། རྣམ་པ་གསུམ་གྱི་ཚུལ་གྱིས་འཕགས་ཏེ། འདི་ལྟར་ཚུལ་ཆེན་པོ་དང་། དུས་ཆེན་པོ་དང་། རྫོགས་པ་ཆེན་པོའོ། །ཡེ་ཤེས་ཆེན་པོ་ནི། རྣམ་པ་གཉིས་ཀྱིས་འཕགས་ཏེ། ལས་ཆེན་པོ་དང་། ཡུལ་ཆེན་པོའོ། །ཐབས་ཆེན་པོ་ནི་བཞི་སྟེ། ཐབས་མྱུར་བ་དང་། ཐབས་མཁས་པ་དང་། སླ་བ་དང་། མང་བའོ། །འདི་དག་གིས་ནི་ལྟ་བའི་ཁྱད་པར་དང་། སྤྱོད་པ་དང་། མངོན་པར་རྟོགས་པའི་ཁྱད་པར་རྫོགས་པར་བསྟན་ཏོ། །དེ་ལ་དོན་དམ་པ་རྒྱུར་ལྟ་བ་ནི། རྒྱུ་གནས་སུ་ལྟ་བའི་རྟེན་ཡིན་ཏེ། ནམ་ཡང་ཀུན་རྫོབ་ཀྱི་དམིགས་པ་ལ་རྟེན་པའི་ལམ་མི་འཚོལ་བའོ། །ཀུན་རྫོབ་འབྲས་བུར་ལྟ་བ་ནི། རྒྱལ་བའི་དཀྱིལ་འཁོར་དུ་ལྟ་བ་དང་། ཚོགས་སུ་ལྟ་བའི་རྟེན་ཡིན་ཏེ། ནམ་ཡང་སངས་མ་རྒྱས་པའི་ཆོས་མི་དམིགས་པའོ། །དེ་ལ་སངས་རྒྱས་གང་ཞེ་ན། ཆོས་ཉིད་སངས་རྒྱས་པ་ཡིན་པ་དང་། མི་གཉིས་པའི་ཡེ་ཤེས་སངས་རྒྱས་པ་ཡིན་པ་དང་། དེ་ལས་བྱུང་བའི་གཟུགས་ཀྱི་སྐུ་སངས་རྒྱས་པ་ཡིན། ཞེས་མདོ་ལས་གྲགས་སོ། །དེ་ལ་༼ཆོས་ཉིད་སངས་རྒྱས་མ་ཡིན་ན། དེ་རྟོགས་པའི་གཉའ་ན་འབྲས་བུ་ཐ་རུ་མི་འགྲུབ་པ་ལས། མཆན། ༽ཆོས་ཉིད་སངས་རྒྱས་པས་དེ་རྟོགས་པའི་ཡེ་ཤེས་ཀྱང་སངས་རྒྱས་ཉིད་དུ་གྲུབ་བོ། །དེ་དག་གྲུབ་པས་དེ་ལས་བྱུང་བའི་གཟུགས་ཀྱི་སྐུ་ཡང་སངས་རྒྱས་ཉིད་དུ་གྲུབ་སྟེ། དེ་ཡང་ཆོས་ཉིད་སངས་རྒྱས་སུ་སྒྲུབ་པའི་ཚེ་ན་ཡེ་ཤེས་དང་གཟུགས་ཀྱི་སྐུ་དག་སངས་རྒྱས་མ་ཡིན་པར་དགག་པ་ཡོད། དེ་བཞིན་དུ་ཡེ་ཤེས་སྒྲུབ་པའི་ཚེ་གཟུགས་ཀྱི་སྐུ་དགག་པ་ཡང་ཡོད། གཟུགས་སྐུ་ཉིད་སངས་རྒྱས་སུ་སྒྲུབ་པའི་ཚེ། གང་ཡང་མི་འགོག་པར་གཟུགས་ཉིད་གཙོར་སྟོན་པ་ཡང་ཡོད་དེ། དུས་གསུམ་གྱི་སངས་རྒྱས་རྗེས་སུ་དྲན་པ་སྒོམ་པའི་མདོ་ལས་འབྱུང་བ་ལྟ་བུའོ། །དེ་བཞིན་དུ་གསང་བའི་ཐེག་པར་ཡང་། ༼ཡུལ་སེམས་ལ་ཡོད་པའི་། ༽ཆོས་ཐམས་ཅད་ལ་ཡོངས་སུ་མ་དག་པ་ནི་སྒྱུ་མ་ཙམ་དུའང་ཡོད་པ་མ་ཡིན་པས། ཆོས་ཉིད་སངས་རྒྱས་སུ་བསྒྲུབ་པའི་ཚུལ་དང་མཐུན་པར་སངས་རྒྱས་པར་འགྲུབ་པའོ། །དེའི་ཕྱིར་སེམས་ཀྱི་རྟོག་པ་ཅི་སྐྱེ་ཡང་སྐྱོན་མེད་དེ། དེའི་རང་བཞིན་༼ཆོས་ཉིད། ༽ཡིན་པ་དང་། ༼མ་སྐྱེས་པ་ཉིད་སྒྱུ་མར་སྣང་བ་ཡིན་པས། ༽དེ་ལས་བྱུང་བ་ཡིན་པ་དང་། དེའི་དམིགས་པ་༼འམ་ཤེས་པ། ༽ཡིན་པའི་ཕྱིར། ༼ཅི་ལ་དམིགས་ཀྱང་སྐྱོན་མེད་པ་ཡིན་པས། མདོ་ལས་ཡེ་ཤེས་སངས་རྒྱས་སུ་འགྲུབ་པ་བཞིན་དུ་སེམས་ཉིད། ༽མི་གཉིས་པའི་ཡེ་ཤེས་བཞིན་དུ་སངས་རྒྱས་སུ་འགྲུབ་པའོ། །དེ་ལ་༼ཡེ་ཤེས། ༽ཡུལ་གྱི་རྣམ་པ་གང་སྣང་ཡང་སྐྱོན་མེད་དེ། དེའི་རང་བཞིན་ཡིན་པ་དང་། དེ་ལས་བྱུང་བ་ཡིན་པ་དང་། དེའི་རྗེས་སུ་མཐུན་པ་ཡིན་པའི་ཕྱིར། ༼ཅིར་སྣང་ཡང་ཆོས་ཉིད་ལས་འགལ་བ་མེད་པའི་ཕྱིར། མདོ་ལས་ལུས་ཀྱི་རྣམ་པར་སྣང་བ་ཡང་འབྲས་བུ་ཐ་རུ་འགྲུབ་བོ། །༽གཟུགས་ཀྱི་སྐུ་སངས་རྒྱས་སུ་འགྲུབ་བོ། །དེ་ཉིད་ཀྱིས་ཚོགས་སུ་ལྟ་བའང་འགྲུབ་སྟེ། འཕགས་པ་དང་གཉིས་སུ་མེད་པའི་ཕྱིར་སྤྱོད་པ་རྣམས་སོ། །རྣམ་པར་དག་པའི་ཕྱིར་ཡེ་ཤེས་སོ། །དོན་བསྡུས་ནས་རྒྱུ་འབྲས་དབྱེར་མེད་པར་འགྲུབ་སྟེ། ཆོས་གང་ལའང་དོན་ལ་རང་གི་ངོ་བོ་ཐ་དད་པ་མེད་པའི་ཕྱིར་རོ། །འདི་དག་ལ་༼མཚན་ཉིད་ཀྱི་ཐེག་པ་ཆེན་པོ་དང་། ༽སྒོ་མཐུན་པ་དང་ཚུལ་ཐ་དད་པ་ཅི་རིགས་སུ་སྦྱར་རོ། །དེ་ཡང་ཚུལ་༼ཕར་ཕྱིན་བཅུས་བདག་གཞན་གྱི་དོན་སྤྱོད་པ་དེ་ཡང་། ༽ཆེན་པོ་ནི། ཀུན་ནས་ཉོན་མོངས་པ་དང་རྣམ་པར་བྱང་བའི་ཆོས་དབྱེར་མེད་པའི་ཚུལ་གྱིས་སྤྱོད་པས་བདག་དང་གཞན་གྱི་དོན་སྒྲུབ་པའོ། །དུས་ཆེན་པོ་ནི། དུས་གཅིག་ཏུ་དོན་གཉིས་ཀ་སྒྲུབ་པར་ནུས་པའོ། །རྫོགས་པ་ཆེན་པོ་ནི། ཀུན་ནས་ཉོན་མོངས་པའི་ཆོས་ལ་སྤྱོད་ཀྱང་བྱང་ཕྱོགས་དང་ཕ་རོལ་ཏུ་ཕྱིན་པ་ལ་སོགས་པ་ཡོན་ཏན་བྱ་བའི་ཆོས་ཐམས་ཅད་རྫོགས་པར་ཆུབ་པའོ། །༼མཚན་ཉིད་སྒོ་འགལ། ༽འདི་ལ་ཡང་ཐུན་མོང་དང་ཁྱད་པར་སྔ་མ་བཞིན་འོག་མ་ཀུན་ལ་ཅི་རིགས་སུ་སྦྱར་རོ། །དེ་ལ་ཡེ་ཤེས་ཀྱི་ལས་ཆེན་པོ་ནི་དུས་གཅིག་ཏུ་སྤྱོད་པའོ། །ཡུལ་ཆེན་པོ་ནི་བླང་དོར་མེད་པ་ལ་དམིགས་པའོ། །དེ་ལ་ཐབས་མྱུར་བ་གང་ཞེ་ན། བསམ་པ་དང་སྤྱོད་པའི་ཁྱད་པར་གྱིས་མྱུར་བར་འགྲུབ་སྟེ། དེ་ལ་བསམ་པ་མྱུར་བ་ནི། ༼འཁོར་འདས་སམ་ལུས་སེམས་ལ་སོགས་པ། ༽ ཐམས་ཅད་དབྱེར་མེད་པར་ལྷའི་དལ་དུ་ལྟ་ཞིང་སྒོམ་སྟེ། ནམ་དུ་ཡང་སྐུ་གཟུགས་སུ་གོམས་པར་བྱེད་པ་མི་གཏོང་བའོ། །དེ་ལ་ཡོན་ཏན་གྱི་ཁྱད་པར་ཅི་ཡོད་ཅེ་ན། རྒྱལ་བའི་སྐུར་བསྒོམས་པས་ནི་ཐོག་མ་མེད་པའི་དུས་ཀྱི་༼རྒྱུ་ལྡོག་པས། ༽ སྤྲོས་པའི་བག་ཆགས་མྱུར་དུ་ལྡོག་པ་དང་། ༼འབྲས་བུ། ༽ལས་ཀྱི་རྣམ་པར་སྨིན་པ་མྱུར་དུ་ལྡོག་པ་དང་། བསོད་ནམས་ཀྱི་ཚོགས་ཆེན་པོ་སྐྱེ་བ་དང་། ཆོས་མཉམ་པ་ཉིད་བདག་མེད་པའི་དོན་ལ་རང་བཞིན་གྱིས་འཇུག་པའོ། །དེ་ལ་སྟོབས་བཞིས་༼རྒྱུ་ལྡོག་པས། ༽སྤྲོས་པའི་བག་ཆགས་ལྡོག་པར་འགྱུར་ཏེ། གསང་བའི་ཐེག་པའི་གཞུང་ཐོས་པ་ལ་སོགས་པའི་ཤེས་རབ་ཀྱི་སྟོབས་ཀྱིས་སངས་མ་རྒྱས་པར་མེད་པར་བསམ་པ་ངེས་པར་བྱེད། དད་པས་དེ་མི་གཏོང་ངོ་། །ཡིད་ལ་བྱེད་པས་ཡང་དང་ཡང་དེ་ལ་གཏོད་པའོ། །ཏིང་ངེ་འཛིན་གྱིས་རྩེ་གཅིག་ཏུ་བྱེད་པའོ། །དེའི་ཚེ་བདག་ཏུ་འཛིན་པའི་གནས་མེད་པས་བདག་ཏུ་ལྟ་བའི་བག་ཆགས་ལྡོག་གོ །བདག་ཏུ་མི་འཛིན་ན་རྣམ་པར་མི་རྟོག་པས། མངོན་པར་བརྗོད་པའི་བག་ཆགས་ལྡོག་གོ །རྣམ་པར་མི་རྟོག་ན་ལས་ཀྱི་རྣམ་པར་སྨིན་པའི་རྒྱུ་མི་དམིགས་པས་སྲིད་པའི་ཡན་ལག་གི་བག་ཆགས་ལྡོག །དེའི་ཕྱིར་སྤྲོས་པའི་བག་ཆགས་ལྡོག་པར་འགྱུར་རོ། །སྟོབས་རྣམ་པ་གཉིས་ཀྱིས་རྣམ་པར་སྨིན་པ་ལྡོག་སྟེ། ལྷའི་ཏིང་ངེ་འཛིན་ནི་ཞི་གནས་ལྷག་མཐོང་ཟུང་དུ་འབྲེལ་བར་བསླབ་པས་དེའི་སྟོབས་ཀྱི་ཆོས་ལ་དབང་འབྱོར་བའི་ཏིང་ངེ་འཛིན་ཐོབ་བོ། །དེས་ཆོས་གང་ཡང་གང་ཞིག་ཏུ་བསྒྱུར་བའི་རང་དབང་ཐོབ་པའི་ཕྱིར་རྣམ་པར་སྨིན་པ་ལྡོག་གོ །རྣམ་པ་གསུམ་གྱི་ཚུལ་གྱིས་བསོད་ནམས་ཀྱི་ཚོགས་ཆེན་པོ་སྐྱེ་སྟེ། འདི་ལྟར་རྒྱལ་བའི་སྐུར་བསྒོམས་པས་དེ་ནི་རྟག་ཏུ་སངས་རྒྱས་རྗེས་སུ་དྲན་པ་སྒོམ་པའི་བསོད་ནམས་ཐོབ་པ་དང་། སངས་རྒྱས་ལ་ཤེས་ནས་དད་པ་དང་ལྡན་པའི་བསོད་ནམས་ཐོབ་པ་ནི་དང་པོའོ། །གཉིས་པ་ནི། སྙིང་རྗེ་ཆེན་པོས་སེམས་ཅན་ཐམས་ཅད་བསྒྲལ་བར་དམ་བཅས་པའི་གོ་ཆ་དང་སྦྱོར་བ་དང་མི་འགོང་༼ཡིད་མི་ཞུམ། ༽ཞིང་བརྩོན་འགྲུས་ཆེན་པོའི་སྤྱོད་པས་སངས་རྒྱས་རྣམས་དང་མཐུན་པར་དང་དུ་བླངས་པ་ཡིན་ཏེ། དེའི་ཕྱིར་བསོད་ནམས་ཀྱི་ཚོགས་ཆེན་པོ་ཐོབ་བོ། །གསུམ་པ་ནི། དོན་ཆེན་པོའི་ཆོས་༼ཆོས་རྣམས་ཀྱི་མཆོག །༽ཡིད་ལ་བྱས་པ་ཡིན་ཏེ། བྱང་ཆུབ་སེམས་ཀྱི་བསོད་ནམས་དེ་ལ་གཟུགས་ཡོད་ན་ནམ་མཁའི་ཁམས་ཀྱང་སྣོད་དུ་ཆུང་ཞེས་རྒྱལ་བས་གསུངས་པ་ལྟ་བུའོ། །དེ་ལ་དོན་ཆེན་པོ་ནི་བདག་མེད་པ་སྟེ། ༼ཤེས་རབ་དང་སྙིང་རྗེ་དང་ཏིང་ངེ་འཛིན་ལ་ཟུང་དུ་འབྲེལ་བར་ནུས་པ་སྟེ་དེ་དང་མཐུན་པའི་བསམ་གཏན་གྱི་ཡུལ་གཞན་མེད་པའི་ཕྱིར། ༽ དེ་རྟོགས་པ་ཡང་དོན་ཆེན་པོའི་ཆོས་སོ། །དེ་ཇི་ལྟར་སྒོམ་པར་འགྱུར་ཞེ་ན། མི་གཉིས་པའི་ཤེས་རབ་ཀྱི་སྟོབས་ཀྱིས་སྣང་ཙམ་ན་ཆོས་ཉིད་ལས་མ་༼དེ་དེའི་རང་བཞིན་ཡིན་པའོ། ༽གཡོས་པར་ཤེས་པ་དང་། དེ་ལས་༼བྱུང་བའི། ༽འཕྲུལ་པར་ཤེས་པ་དང་། དེའི་རྗེས་སུ་མཐུན་པར་ཤེས་པའོ། །དེ་ལ་རྗེས་སུ་མཐུན་པ་གང་ཞེ་ན། ཆོས་ཀྱི་སྐུའི་ཡོན་ཏན་གྱི་རྣམ་པར་སྨིན་པ་ཡིན་པ་དང་། ༼ཆོས་སྐུའི་ཡོན་ཏན་གྱི་ཕྱོགས་དང་ཕ་རོལ་ཏུ་ཕྱིན་པ་ལ་སོགས་པ་རྣམ་པར་དཀར་བའི་ལེགས་པའི་ཡོན་ཏན་དུ་བཤད་པ་རྣམས་ཀྱི་རྣམ་སྨིན་གཟུགས་སྐུ་ཡིན། དེའི་ཕྱིར་རྗེས་སུ་མཐུན་ལས་མཛད་པ་དང་མཚོན་པར་ནུས་པའོ། །༽དེའི་ཕྲིན་ལས་གཟུགས་ཀྱི་སྐུ་དེ་ཡང་ཆོས་ཀྱི་སྐུ་དེའི་ཕྲིན་ལས་མཛད་པ་ཡིན་ཏེ། དེའི་ཕྱིར་རྗེས་སུ་མཐུན་པའི་ལས་མཛད་པ་དང་མཚོན་པར་ནུས་པའོ། །༼གཟུགས་སྐུ་དེས་ཀྱང་ཆོས་སྐུ་མཚོན་པར་ནུས་སོ། །༽དེ་ལ་རྣམ་པར་སྨིན་པ་ཡིན་པས་རྗེས་སུ་མཐུན་པ་ནི། གྲུབ་པ་རྟགས་ཀྱི་ཕྱག་རྒྱར་བཤད་༼ཚོགས་ཇི་ལྟ་བུར་བསགས་པ་ལས་སྐུ་ཇི་ལྟ་བུར་འགྲུབ་པ། ༽་ཐམས་ཅད་དོ། །ལས་མཛད་པས་རྗེས་སུ་མཐུན་པ་ནི། མཛད་པ་ལས་ཀྱི་ཕྱག་རྒྱར་༼སྐུ་དེས་སེམས་ཅན་གྱི་དོན་ཇི་ལྟར་བྱེད་པ། ༽བཤད་པ་ཐམས་ཅད་དོ། །དེ་མཚོན་པར་ནུས་པ་རྗེས་སུ་མཐུན་པ་ནི། མཚོན་པ་༼སྐུ་མཚན་མའི་སྒོ་ནས་རྣམ་པར་གྲོལ་བའི་སྒོ་མཐའ་ཡས་པ་མཚོན་པར་བྱེད་པའོ། ༽ཐབས་ཀྱི་ཕྱག་རྒྱར་བཤད་པ་ཐམས་ཅད་དོ། །དེ་ལ་ཆོས་བདག་མེད་པ་ལ་ངང་གིས་འཇུག་པ་ནི། ཇི་ལྟར་དམིགས་པ་བཞིན་གྲུབ་ནས། ཆོས་ལ་རང་གི་ངོ་བོ་ཉིད་མེད་པར་༼ཆོས་ཐམས་ཅད་སེམས་ཀྱི་སྣང་བ་ཙམ་དུ་ངེས་པ་སྐྱེ། ༽རིག་པ་རང་འབྱུང་བའོ། །བསོད་ནམས་ཐོབ་པའི་ཚེ། ༼སྤྱིར་ཚོགས་གཉིས་རྫོགས་པར་འགྱུར་བ་ལས། བདག་མེད་པར་རྟོག་པ་ཉིད་ཀྱི་ཡེ་ཤེས་ཀྱང་འབྱུང་ངོ་། །༽ཡེ་ཤེས་སྐྱེ་བའི་ཚོགས་ནི་འདིར་འདུས་སོ། །དེ་ལ་གསུང་གི་སྙིང་པོ་བརྗོད་པ་དང་། བསྒོམ་པའི་ཡོན་ཏན་བཅུ་གཉིས་ཏེ། རྒྱལ་བའི་བཀའ་དམ་པ་བཏོན་པའི་ཡོན་ཏན་དང་། ཆོས་རྗེས་སུ་དྲན་པ་བསྒོམ་པར་འགྱུར་བ་དང་། ཆོས་ཤེས་ནས་དད་པ་དང་ལྡན་པ་དང་། ངག་བདེན་པའི་ཚིག་འགྲུབ་པ་དང་། ཤེས་རབ་དང་ལྡན་༼གསང་སྔགས། རིག་སྔགས། གཟུངས་སྔགས། ༽པའི་ཐབས་དང་། ཡེ་ཤེས་དྲན་པ་འཐོབ་པ་དང་། རྩེ་གཅིག་པའི་ཏིང་ངེ་འཛིན་ཐོབ་པ་དང་། འཕགས་པ་མཆོད་པར་འགྱུར་བ་དང་། སེམས་ཅན་གྱི་དོན་བྱེད་པ་དང་། ཡེ་ཤེས་ཀྱི་ལྷ་ཉེ་ཞིང་གྲུབ་པར་མྱུར་བ་དང་། ཆོས་ཀུན་གསུང་གི་སྒྱུ་འཕྲུལ་དུ་དབང་བསྒྱུར་བ་དང་། ཆོས་ཀུན་ལ་སྒྲ་བརྙན་ལྟར་སྣང་ལ་རང་བཞིན་མེད་པའི་བློ་འཇུག་པ་དང་། ཆོས་བདག་མེད་པ་ལ་ངང་གིས་འཇུག་པའོ། །དེ་ལ་བཀའ་དམ་པ་བཏོན་པ་ནི། གསང་བའི་སྙིང་པོ་འབྲུ་གཅིག་ཀྱང་ཡོན་ཏན་མཐའ་ཡས་པ་བརྟེན་པའི་སྒོར་འགྱུར་ཏེ། ཟབ་ཅིང་རྒྱ་ཆེ་བའི་མདོ་དག་གིས་ཀྱང་བསྒྲུན་པ་མེད་དོ། །དེ་རྗེས་སུ་དྲན་པ་དང་དད་པ་ནི། གསུང་རབ་དམ་པ་ཡིན་པས་སོ། །ངག་བདེན་པའི་ཚིག་འགྲུབ་པ་ནི། བཀའ་བདེན་པའི་བྱིན་རླབས་དང་བཟླས་པ་གྲུབ་པའི་མཐུས་སོ། །ཐབས་དང་ཤེས་རབ་ཐོབ་པ་ནི། གསང་སྔགས་ཏེ། དེ་སྐྱེ་བའི་གཞི་ཡིན་པས་སོ། །ཤེས་རབ་དང་ཡེ་ཤེས་ཐོབ་པ་ནི། རིག་༼རིག་སྔགས་ཀྱི་ངོ་བོ་ནི་ཤེས་རབ་དང་ཡེ་ཤེས། རྟགས་ལྷ་མོ། སྒོ་ཡི་གེ ། ངེས་ཚིག་མ་རིག་པ་སེལ་བ་དང་། འདི་ལྟར་ཕ་རོལ་ཤེས་པ་དང་། ངག་གི་རིག་པ་ཐོབ་པས་སོ། །༽སྔགས་ཏེ། དེའི་གཞི་ཡིན་པས་སོ། །དྲན་པ་དང་ཤེས་རབ་ཐོབ་པ་ནི། གཟུངས་སྔགས་ཏེ། ༼གཟུངས་སྔགས་ཀྱི་ངོ་བོ་དྲན་པ་དང་ཤེས་རབ། རྟགས་ལྷ་མོ། སྒོ་ཡི་གེ ། ངེས་ཚིག་དོན་མཐུན་འཛིན་པར་བྱེད་པས་སོ། །༽དེའི་སྒོར་གྱུར་པས་སོ། །རྩེ་གཅིག་ཐོབ་པ་ནི། འདི་ལྟར་རྣམ་པར་གཡེང་བའི་གཉེན་པོ་ནི་དབུགས་ཕྱི་ནང་དུ་རྒྱུ་བ་རྗེས་སུ་དྲན་པ་ཡིན་ལ། དེ་ནི་བཟླས་པའི་སྒོ་ནས་མཐར་ཕྱིན་པ་ཡིན་པས་སོ། །འཕགས་པ་མཆོད་པ་ལ་སོགས་པ་གསུམ་ནི། འཕྲོ་འདུའི་མཐུས་སོ། །ཆོས་ལ་དབང་སྒྱུར་བ་ནི། སེམས་སྣང་བ་མཐུར་གྱུར་པའི་སྟོབས་སོ། །སྣང་ལ་རང་བཞིན་མེད་པའི་བློ་འཇུག་པ་ནི། དེའི་སྒོར་གྱུར་པས་སོ། །བདག་མེད་པ་ལ་འཇུག་པ་ནི། དམིགས་པ་གྲུབ་པའི་མཐུའོ། །ཐུགས་ནི་དེ་ཙམ་ཉིད་ན་སྐྱེ་བ་མེད་པའི་དབྱིངས་སུ་རྟོགས་པའོ། །དེ་ལྟར་སྐུ་གསུང་ཐུགས་སུ་གོམས་པར་བྱེད་པ་ནི། ཚུལ་དེ་དེ་ལྟར་མྱུར་བའི་ལམ་ཞེས་བྱ་བའོ། །༼སྐུ་སྒོམ་པ་དང་གསུང་བཟླས་པའི་ཡོན་ཏན་མེད་དམ་ཞེ་ན། ༽ གཅིག་ཏུ་ན་རྒྱལ་བའི་སྐུ་གསུང་ཐུགས་སུ་དུས་གཅིག་ཏུ་གོམས་པར་བྱེད་པའི་ཚེ་རྣམ་པར་ཐར་པའི་སྒོ་༼གཞུང་མཐའ་ཡས་པ་ནས། ༽མཐའ་ཡས་པ་ནས་བསྟན་པའི་ལམ་ཐམས་ཅད་དུས་གཅིག་ཏུ་རང་བཞིན་གྱིས་རྫོགས་པར་འགྱུར་ཏེ། ཏིང་ངེ་འཛིན་རྩེ་གཅིག་ལ་གོམས་པར་བྱས་པ་ལས། ལམ་ཀུན་གོམས་པར་འགྱུར་བའི་ཉེ་ལམ་ཉིད་དོ། །ཇི་ལྟར་ཞེ་ན། རྒྱལ་བའི་སྐུ་གསུང་ཐུགས་ཀྱི་སྤྱོད་ཡུལ་ལས་མི་གཡོ་བའི་ཚེ། ལུས་ཀྱི་སྤྱོད་པ་ཉེས་པ་མི་འབྱུང་སྟེ། དེས་དེ་ལ་མི་གོས་པའི་ལུས་རྡོ་རྗེའི་དམ་ཚིག་གོ །དེ་བཞིན་དུ་ངག་གི་སྤྱོད་པ་དེ་ནི་ངག་རྡོ་རྗེའི་དམ་ཚིག་གོ །དེ་ལྟར་རིག་པ་ནི་སེམས་རྡོ་རྗེའི་དམ་ཚིག་གོ །དེ་ནི་རྒྱལ་བའི་བསྲུང་བ་མེད་པ་གསུམ་དང་མཐུན་པ་ཡིན་ཏེ། དེ་ལ་ཉེས་པ་འབྱུང་བ་མི་སྲིད་པས་བསྲུང་བའི་དམ་ཚིག་རྩ་བ་གསུམ་ཡང་རྫོགས་པ་ཡིན་ནོ། །༼ལྷ་བསྒོམ་པ་དང་སྔགས་དང་ཕྱག་རྒྱ་ལས་མི་འདའ་བས། ༽ སྒྲུབ་པ་ལས་མི་འདའ་བས་སྒྲུབ་པའི་དམ་ཚིག་རྩ་བ་གཉིས་ཀྱང་རྫོགས་པ་ཡིན་ནོ། །ལུས་ངག་གི་ལས་འགྲོ་བའི་དོན་དུ་འགྱུར་བས་སྤྱད་པར་༼སྦྱོར་བ་ལ་སོགས་པ། ༽ བྱ་བའི་དམ་ཚིག་ལྔ་ཡང་རྫོགས་པ་ཡིན་ནོ། །དོར་བར་བྱ་བའི་ཆོས་མི་དམིགས་པས་མི་སྤང་པའི་དམ་ཚིག་༼ཉོན་མོངས་པ་ལྔ། ༽ལྔ་དང་། དང་དུ་བླང་བའི་དམ་ཚིག་༼བདུད་རྩི་ལྔ་གཙང་དམེ་མི་དམིགས་པ། ༽ལྔ་ཡང་རྫོགས་པ་ཡིན་ནོ། །ཤེས་པར་བྱ་བའི་ཆོས་ཐམས་ཅད་འདིར་འདུས་པས་ཤེས་པར་བྱ་བའི་དམ་ཚིག་རྣམས་ཀྱང་རྫོགས་པ་ཡིན་ནོ། །འདི་ལས་གཞན་བསྒྲུབ་པར་བྱ་བ་མེད་པས་གྲུབ་པར་བྱ་བའི་དམ་ཚིག་ལྔ་ཡང་རྫོགས་པ་ཡིན་ནོ། །གཉིས་སུ་མི་འབྱེད་པས་༼དམ་ཚིག༽་ཁྱད་པར་གྱི་དམ་ཚིག་ཉི་ཤུ་རྩ་ལྔ་ཡང་རྫོགས་པ་ཡིན་ནོ། །ཉམས་ང་བ་མེད་པས་བརྟུལ་ཞུགས་༼སྒྲུབ་པ་ཆེན་པོའི་དུས་ཀྱི་རྡོ་རྗེ་སློབ་དཔོན་མི་བསྐྱོད་པ་དང་། ཐབས་ཤེས་རབ་མ་འབྲེལ་པ་ལ་སོགས་པ་རྣལ་འབྱོར་སྤྱོད་པ་སྟེ། ༽ཀྱི་དམ་ཚིག་ཉི་ཤུ་རྩ་གསུམ་ཡང་རྫོགས་པ་ཡིན་ནོ། །༼སྟག་ལྟར་དཔའ་བ་དང་། བྱ་རོག་ལྟར་འཛེམས་པ་དང་། རྒྱུན་གྱི་གཉིད་དང་ཆང་སྤངས་པ་ལ་སོགས། ༽མི་མཐུན་པའི་ཆོས་མི་དམིགས་པའི་༼ལྷག་པའི། ༽ དམ་ཚིག་བཞི་རྫོགས་པ་ཡིན་ནོ། །ལམ་ཐམས་ཅད་དབང་དུ་འདུས་པས་རྩལ་འཕགས་ཀྱི་༼དམ་ཚིག་ལྟ་བ་སྤྱོད་པ་དང་ཡེ་ཤེས་ལ་སོགས་པ་ཡོན་ཏན་བཅུ། ༽ དམ་ཚིག་བཅུ་ཡང་རྫོགས་པ་ཡིན་ནོ། །ཕྱིན་ཅི་མ་ལོག་པའི་དོན་མཐོང་བས་དལ་ཐམས་ཅད་དུ་ཞུགས་པ་ཡིན་ནོ། །༼སེམས་སྒོམ་ལས། མངྷལ་གསང་བར་ཞུགས་ནས་ནི། །སྦྱིན་གནས་དམ་པ་རབ་ཏུ་བསྔགས། །༽༼ཐབས་ཞགས་ལས། སྐུ་གསུམ་ཐོབ་པས་དམ་ཞེས་བསྟན། །༽སྐུ་གསུང་ཐུགས་ཀྱི་ཏིང་ངེ་འཛིན་ལ་གནས་པའི་དབང་ཐམས་ཅད་ཐོབ་པ་ཡིན་ནོ། །༼ཐེག་པ་འོག་མ་པའི་བདེན་པ་ལས་འདས་པ། ༽༼མི་འགྱུར་བ་དང་། ཕྱིན་ཅི་མ་ལོག་པ་དང་། མི་བསླུ་བ་དང་། དབྱིངས་དང་ཡེ་ཤེས་དང་དེ་དག་གི་འཕྲུལ་ལོ། །༽དེ་ཁོ་ན་ཉིད་ལ་གནས་པས་མན་ངག་ཐམས་ཅད་གདིང་དུ་གྱུར་པ་ཡིན་ནོ། །ཡང་བྱང་ཆུབ་སེམས་དཔའི་བསླབ་པ་ཀུན་ཀྱང་རྫོགས་པ་ཡིན་ཏེ། མ་བརྩལ་བའི་སྙིང་རྗེ་ཆེན་པོ་འབྱུང་༼སེམས་ཅན་གྱི་དོན་བྱེད་པའི་ཚུལ་ཁྲིམས་དང་། ༽བ་དང་། རྣམ་པར་དཀར་བའི་ཡོན་ཏན་འདུས་པ་དང་། ཉེས་སྐྱོན་གྱི་ཆོས་༼སྡོམ་པའི་ཚུལ་ཁྲིམས། ༽མེད་པས། ཚུལ་ཁྲིམས་ཀྱི་བསླབ་པ་ཡང་རྫོགས་པ་ཡིན་ནོ། །འདོད་པ་ཙམ་ལ་རག་ལས་པའི་ཏིང་ངེ་འཛིན་ཐོབ་པས། ཏིང་ངེ་འཛིན་གྱི་བསླབ་པ་རྫོགས་པ་ཡིན་ནོ། །ཆོས་གང་ལ་ཡང་མཚན་མར་མི་འཛིན་པས་ཤེས་རབ་ཀྱི་བསླབ་པ་ཡང་རྫོགས་པ་ཡིན་ནོ། །ཕ་རོལ་ཏུ་ཕྱིན་པ་རྣམས་ཀྱང་རྫོགས་པ་ཡིན་ཏེ། འཕགས་པ་མཆོད་པ་དང་འགྲོ་བའི་དོན་བྱེད་པ་ནི་སྦྱིན་པ། མི་གོས་པ་ནི་ཚུལ་ཁྲིམས། མི་འཁྲུགས་པ་ནི་བཟོད་པ། མི་ཉམས་པ་ནི་བརྩོན་འགྲུས། མི་གཡེངས་པ་ནི་བསམ་གཏན། མ་ཆགས་པ་ནི་ཤེས་རབ། བདག་དང་གཞན་གྱི་དོན་དུ་འགྱུར་བ་ནི་ཐབས། མི་མཐུན་པས་ཟིལ་གྱིས་མི་ནོན་པ་ནི་སྟོབས། ཞིང་དང་སྤྱོད་ཡུལ་ཡོངས་སུ་དག་པ་ནི་སྨོན་ལམ། བདག་མེད་པར་ཆུབ་པ་ནི་ཡེ་ཤེས་སོ། །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཀྱང་ཡོངས་སུ་རྫོགས་ཏེ། འཇིག་རྟེན་ཕྱིན་ཅི་ལོག་གི་ལྟ་བ་༼ང་གཙང་སྐྱིད་རྟག །༽བཞི་དག་ཅིང་ཀུན་ནས་ཉོན་མོངས་པ་དང་། རྣམ་པར་བྱང་བ་དབྱེར་མེད་པར་རྟོགས་པས། འཁོར་བ་དང་མྱ་ངན་ལས་འདས་པར་མི་རྟོག་སྟེ། དག་པའི་བདེན་པ་བཞི་ལ་འཇུག་པས་༼ངང་དང་རང་བཞིན་བདག་ཉིད་ཆེན་པོ་གསུམ། ༽དྲན་པ་ཉེ་བར་བཞག་པ་རྫོགས་སོ། །༼དུག་གསུམ། ༽ སྡིག་པ་མི་དགེ་བའི་རྩ་བ་གསུམ་དག་པར་རྟོགས་ཏེ། ཕ་རོལ་ཏུ་ཕྱིན་པ་རྣམས་ཆུབ་པར་རང་རིག་པས་ཡང་དག་པའི་སྤོང་བ་རྫོགས་སོ། །རྟག་ཏུ་མི་ཡེངས་པས་༼ཉེས་པ་ལྔ་རང་བཞིན་གྱིས་མ་གྲུབ་པས། དེ་སྤོང་བའི་འདུ་བྱེད་བརྒྱད་ཆེད་དུ་བརྟེན་མི་དགོས་ཏེ། མི་མཐུན་པ་དང་གཉེན་པོ་དབྱེར་མེད་དུ་རྟོགས་པས་སོ། །༽ལེ་ལོ་མེད་པ་དང་། བརྗེད་པ་མེད་པ་དང་། ཞུམ་རྒོད་མེད་པ་དང་། འདུ་བྱེད་པ་དང་མི་བྱེད་པ་དག་ཀྱང་མེད་དེ། སྐྱོན་རྡུལ་ཙམ་ཞིག་ཚོར་ན་ཡང་། དེ་ཉིད་དེའི་རང་བཞིན་ཡིན་པར་རིག་པས་སྒྲིབ་པས་མི་གོས་པའི་ཕྱིར། རྫུ་འཕྲུལ་གྱི་རྐང་པ་རྫོགས་སོ། །བསམ་པ་མི་ཕྱེད་པ་ནི་དད་པ། དེ་མ་ཉམས་པ་ནི་དྲན་པ། དེ་འཕེལ་བ་ནི་བརྩོན་འགྲུས། དེ་ཡོངས་སུ་གྲུབ་པ་ནི་ཏིང་ངེ་འཛིན། དེ་ཡོངས་སུ་ཤེས་པ་ནི་ཤེས་རབ་སྟེ། དེའི་ཕྱིར་དབང་པོ་དང་སྟོབས་ཀྱང་ཡོངས་སུ་རྫོགས་སོ། །བདེན་པ་རྣམ་པ་གཉིས་དབྱེར་མེད་པར་ཁོང་དུ་ཆུད་པ་ནི་ཆོས་རྣམ་པར་འབྱེད་པ། དེ་ཉིད་ཀྱི་གནས་ནི་དྲན་པ་དང་། ངེས་པར་འབྱུང་བ་བརྩོན་འགྲུས། སྐྱོ་དུབ་མེད་པ་ནི་དགའ་བ། ཉོན་མོངས་བ་ནི་མི་འབྱུང་བས། ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་ཏེ། དེའི་ཕྱིར། བྱང་ཆུབ་ཀྱི་ཡན་ལག་རྣམས་ཀྱང་རྫོགས་སོ། །བདེན་པ་རྣམ་པ་གཉིས་དབྱེར་མེད་པའི་དོན་ལ་ཕྱིན་ཅི་མ་ལོག་པ་ནི། ཤེས་རབ་༼ཡང་དག་པའི་ལྟ་བ་དང་། རྟོག་པའི་ཤེས་རབ་དང་། ངག་དང་ལས་ཀྱི་མཐའ་དང་། ༽ཀྱི་ཕུང་པོ་དང་། ལུས་དང་ངག་གི་སྐྱོན་གྱིས་མི་གོས་པས་ཚུལ་༼འཚོ་བའི་ཚུལ་ཁྲིམས། ༽ ཁྲིམས་ཀྱི་ཕུང་པོ་དང་། རྩེ་གཅིག་པས་ཏིང་༼དྲན་པ་དང་རྩོལ་བ་དང་ཏིང་ངེ་འཛིན་གསུམ་གྱི་ཕུང་པོ། ༽ ངེ་འཛིན་གྱི་ཕུང་པོ་སྟེ། དེའི་ཕྱིར་འཕགས་པའི་ལམ་ཡན་ལག་བརྒྱད་པ་ཡང་རྫོགས་སོ། །༼ཚད་མེད་པ་དང་བསྡུ་བའི་དངོས་པོ་ལ་སྩོགས་པ། ༽ དེ་ལ་སོགས་པ་དཀར་པོའི་ཕྱོགས་མ་ལུས་པ་ཡོངས་སུ་རྫོགས་ཏེ། བདག་དང་སེམས་ཅན་དབྱེར་མེད་པར་ཡང་མཐོང་བས་ནི་བྱམས་པ་འབྲས་བུ་དང་བཅས་པ། དེ་བཞིན་དུ་ཐམས་ཅད་རྒྱས་པར་ཤེས་པ་ནི་སྙིང་རྗེ། བདག་ལ་ཡོན་ཏན་རྫོགས་པ་ནི་དགའ་བ། དོར་བ་མེད་པ་ནི་བཏང་སྙོམས། ཡང་ཡོངས་སུ་མི་འཛིན་པ་ནི་སྦྱིན་པ། ཀུན་དང་མཐུན་པའི་ངག་ཐོབ་པ་ནི་སྙན་པར་སྨྲ་བ། ཀུན་སྟོན་པ་ནི་དོན་མཐུན་པ། སྒྲོལ་བར་བྱེད་པ་ནི་དོན་སྤྱོད་པའོ། །བྱང་ཆུབ་སེམས་དཔའི་ལམ་དུ་ནི་ཉན་ཐོས་ཀྱི་ལམ་འདུས་པར་ཤེས་༼འོ་ན་དེ་ལྟར་ལམ་ཐམས་ཅད་འདུས་ན་ཐེག་པ་འོག་མ་པ་རྣམས་དང་མཐུན་ཏོ་ཞེ་ན། ༽ ཀྱི། དེ་ཉིད་དེ་དག་ལྟར་མངོན་དུ་བྱ་མི་དགོས་སོ། །ཉན་ཐོས་ཀྱི་ལམ་དེར་ནི་མངོན་པར་མཐོ་༼མི་དང་ལྷའི་ལམ། ༽བའི་ལམ་རྣམས་འདུས་པར་ཤེས་ཀྱི། དེ་དག་ལྟར་མངོན་དུ་བྱ་མི་དགོས་སོ། །དེ་བཞིན་དུ་གསང་བའི་ཐེག་པ་དེར་ཡང་། ལམ་དེ་ཀུན་འདུས་པར་ཤེས་པར་བྱེད་ཀྱི། དེ་དག་ལྟར་མངོན་དུ་བྱ་མི་དགོས་སོ། །དེ་ལྟར་ལམ་གཅིག་གིས་ཡོན་ཏན་ཀུན་ཐོབ་པ་དང་ལམ་དེ་ཡང་ཞི་གནས་དང་ལྷག་མཐོང་ཟུང་དུ་འབྲེལ་པར་གྱུར་པས་ཐབས་མྱུར་བ་ཞེས་བྱའོ། །སྤྱོད་པ་མྱུར་བ་ནི། རྣམ་པ་བཞིའི་ཚུལ་གྱིས་ཏེ། འདི་ལྟར་བླང་དོར་མེད་པའི་སྤྱོད་པ་ནི། བསམ་པ་མཉམ་པ་ཐོབ་པའི་གཉའ་གནོན་གྱི་ཚུལ་གྱིས་གྲོགས་སུ་འགྱུར་ཏེ། དེ་ལྟར་ཡང་འཕགས་པ་ཐབས་ཀྱི་ཞགས་པ་ལས། དམ་ཚིག་ཆེན་པོ་ནི་དག་པ་རྣམ་པ་གསུམ་སྟེ། དེ་ཉིད་ཉམས་སུ་ལེན་པར་བྱ་བའི་གཉའ་གནོན་དུ་ཆོས་ལ་དགེ་སྡིག་མེད་པ་དང་། ཟས་ལ་གཙང་སྨེ་མེད་པའི་དམ་ཚིགས་མ་ཉམས་ན། གདུག་པ་ལྔ་ལ་སྤྱད་པས་ཀྱང་དེའི་སྐྱོན་གྱིས་མི་གོས་པ་ནི་ལུས་རྡོ་རྗེ་ཞེས་བྱ་བ་ལ་སོགས་པ་གསུངས་པའོ། །སྒྱུ་འཕྲུལ་ལས་ཀྱང་། མཉམ་ལ་མཉམ་པར་སྦྱོར་བ་ཡིས། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། ཞེས་གསུངས་སོ། །གཉིས་པ་ནི། དཀའ་ཐུབ་དང་སྡོམ་པ་དྲག་པོས་ལུས་སེམས་མ་གཟིར་བར། མཉམ་པའི་ཏིང་ངེ་འཛིན་མྱུར་དུ་ཐོབ་སྟེ། གསང་བ་འདུས་པ་ལས། དཀའ་ཐུབ་སྡོམ་པ་མི་བཟད་པ། །བརྟེན་པས་འགྲུབ་པར་མི་འགྱུར་ཏེ། །འདོད་པའི་ལོངས་སྤྱོད་ཐམས་ཅད་ལ། །བརྟེན་པས་མྱུར་དུ་འགྲུབ་པར་འགྱུར། །ཞེས་གསུངས་སོ། །གསུམ་པ་ནི། དགེ་བའི་ཕྱོགས་དུ་མ་དང་དུ་མི་ལེན་པས། བསམ་པ་མི་གཡེངས་པས་མཉམ་པ་ཉིད་མྱུར་དུ་འཐོབ་ཏེ། དེ་ཉིད་ལས། གལ་ཏེ་བྱང་ཆུབ་མཆོག་འདོད་ན། །གླེག་བམ་བཀླག་པར་མི་བྱ་ཞིང་། །མཆོད་རྟེན་བསྐོར་བར་མི་བྱ་སྟེ། །བྱས་ན་བྱང་ཆུབ་རྙེད་པར་དཀའ། །ཞེས་གསུངས་སོ། །བཞི་པ་ནི། ཆོ་ག་ཐབས་ཀྱི་ཡན་ལག་མི་མཐུན་པ་དང་། ལྟག་འོག་བསྣོལ་བ་དང་། མང་ཉུང་ལྷག་ཆད་སྐྱོན་དུ་མི་ལྟ་བར། གང་ལ་ཡང་ཡིད་གཉིས་མི་ཟ་སྟེ་ཐེ་ཚོམ་མེད་པས་མཉམ་པའི་ཏིང་ངེ་འཛིན་མྱུར་དུ་ཐོབ་སྟེ། སྒྱུ་འཕྲུལ་ལས། །དཀྱིལ་འཁོར་ཀུན་ཏུ་རབ་སྦྱར་བས། །དཀྱིལ་འཁོར་ཐམས་ཅད་འགྲུབ་པར་འགྱུར། །ཆོ་ག་ལྷག་གམ་མ་ཚང་ན། །སྐྱོན་ཉིད་དག་སྟེ་ཉེས་པ་མེད། །ཅེས་གསུངས་སོ། །མདོར་ན་ཆོས་ཐམས་ཅད་མཉམ་པ་ཉིད་ལ། བསམ་པ་མཉམ་པའི་ཉམས་དང་སྦྱར་ཏེ། མཉམ་པའི་དོན་དུ་སྤྱད་པར་གསུངས་ཀྱི། དངོས་པོར་ལྟ་བའི་བསམ་པ་ཅན་རྣམས་ཀྱིས་ནི་དེ་ལྟར་སྤྱད་པར་མ་གསུངས་སོ། །དེ་ནི་ལྟུང་བའི་གནས་སུ་གསང་བའི་རྒྱུད་ཀུན་ལས་གསུངས་སོ། །ཚུལ་འདིས་མངོན་པར་རྟོགས་པ་མྱུར་བ་དང་བུལ་བའི་བྱེ་བྲག་དབྱེ་བར་བྱ་སྟེ། དེ་ཡང་རྣམ་པ་༼དེ་ཡང་ལམ་གྱི་ཁྱད་པར་དང་། གང་ཟག་གི་ཁྱད་པར། གནས་སྐབས་ཀྱི་ཁྱད་པར་རོ། །༽གསུམ་གྱི་ཚུལ་གྱིས་དབྱེ་བར་བསྟན་པ་ལས། ཇི་སྐད་བསྟན་པ་དེ་དག་ནི་ལམ་གྱི་ཁྱད་པར་ཞེས་བྱའོ། །ལམ་ལ་འཇུག་པའི་གང་ཟག་གི་ཁྱད་པར་གྱིས་ནི་མ་ངེས་པར་འགྱུར་ཏེ། གསང་བའི་ཐེག་པར་རིགས་བརྒྱད་དུ་གྲགས་པ་ལས། མི་དང་ལྷའི་རིགས་ཅན་དང་། ཉན་ཐོས་ཀྱི་རིགས་ཅན་དང་། རང་བྱང་ཆུབ་ཀྱི་རིགས་ཅན་དང་། བྱང་ཆུབ་སེམས་དཔའི་རིགས་ཅན་ཐབས་ལ་མི་མཁས་པ་དག་དང་། རིགས་མ་ངེས་པ་དབང་པོ་རྟུལ་པོ་དག་ནི་ལམ་ཡུན་རིང་པོར་འགྱུར་རོ། །ཐབས་མཁས་པའི་བྱང་ཆུབ་སེམས་དཔའི་རིགས་ཅན་དང་། མ་ངེས་པ་དབང་པོ་རྣོན་པོ་དང་། མཉམ་པ་ཆེན་པོའི་རིགས་ཅན་རྣམས་ཀྱིས་ནི་ལམ་ཉེ་བར་འགྱུར་རོ། །ལམ་གྱི་གནས་སྐབས་ཀྱི་ཁྱད་པར་གྱིས་ནི། གཉིས་སུ་འགྱུར་ཏེ། དང་པོ་སེམས་བསྐྱེད་པ་ནས་བཟུང་ནས། ཐ་མ་བདེན་པའི་དོན་སྤྲོས་པ་དང་བྲལ་བ་ཉིད་མངོན་སུམ་དུ་མཐོང་སྟེ་དབང་འབྱོར་བ་ལ་ཐུག་གི་བར་དུ་ནི། གང་ཟག་གི་ཁྱད་པར་དང་། ལམ་གྱི་ཁྱད་པར་མྱུར་བ་དང་བུལ་བ་ཡོད་དེ། དབང་ཐོབ་པ་ནས་བཟུང་ནས། བུད་ངྷའི་ས་ཉིད་ལ་ཐུག་གི་བར་དུ་ནི། གང་ཟག་དང་ལམ་གྱི་ཁྱད་པར་དག་མེད་དེ། དབང་ཐོབ་པར་འདྲ་བས་འདོད་པ་ཙམ་ལ་རག་ལས་པའི་ཕྱིར། དུས་འདི་ཙམ་གྱིས་བྱང་ཆུབ་ཐོབ་བོ། །ཅེས་ངེས་པ་མེད་དོ། །གསང་སྔགས་ཀྱི་གཞུང་གིས་ཚེ་ལ་དབང་ཐོབ་སྟེ། དེའི་ཚེ་བཅུ་དྲུག་ཏུ་བསྣུར་བས་བྱང་ཆུབ་ཐོབ་བོ། །ཞེས་གསུངས་པ་ཡང་། དེ་ཡན་ཆད་དུ་ཐུན་མོང་ཡིན་ཏེ། བྱང་ཆུབ་སེམས་དཔའ་ཚེ་ལ་དབང་ཐོབ་པས་ཀྱང་འདོད་ན་ཚེ་གཅིག་གིས་བྱང་ཆུབ་མངོན་དུ་བྱེད་པ་ཡིན་ནོ། །དེ་ལྟར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལས་གསུངས་པ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཚུལ་བཞིན་དུ་ཡིད་ལ་བྱས་ན། ཚེ་འདི་ཉིད་ལ་ཆོས་ལ་དབང་བསྒྱུར་བ་ཐོབ་སྟེ། དེའི་ཚེ་བཅུ་དྲུག་ཏུ་བསྣུར་བས་སངས་རྒྱས་ཀྱི་ས་ཐོབ་པར་འགྱུར་རོ། །ཞེས་གསུངས་སོ། །འོ་ན་བསྐལ་པ་གྲངས་མེད་པ་གསུམ་གྱིས་འཐོབ་ཅེས་པའི་དོན་ཅི་ཞེ་ན། མདོ་དེ་དག་དུ་ནི་སྙིང་རྗེ་ཆེན་པོ་གཙོར་བསྟན་པས་འདུལ་བའི་དབང་དུ་གསུངས་པ་སྟེ། འཇིགས་པ་རྣམས་དང་བྲལ་ཞིང་དབང་ཐོབ་པ་ལ། དེ་བས་ལྷག་པར་གནས་ཀྱང་སྐྱོན་མེད་ལ། དེ་བས་ཆེས་མྱུར་ཡང་སྐྱོན་མེད་དོ། །བསྐལ་པ་གྲངས་མེད་པ་གསུམ་༼བསྐལ་པ་ཞེས་པ་དུས་ལ་མ་བཞག་གི་ཉོན་མོངས་པ་ལ་བྱ། ༽ ཞེས་གསུངས་པ་ཡང་། མདོ་ལས། འདོད་ཆགས་ཀྱི་བསྐལ་པ་གྲངས་མེད་པ་དང་། ཞེ་སྡང་གི་དང་། གཏི་མུག་གི་བསྐལ་པ་གྲངས་མེད་པ་གསུམ་འདས་ནས་སངས་རྒྱས་ཐོབ། ཅེས་གསུངས་སོ། །མདོར་ན་ལམ་གྱི་གནས་སྐབས་དང་པོ་༼སེམས་བསྐྱེད་ནས་དབང་འབྱོར་བར་ཐུག་གི་བར་དུ། ༽ལ་ནི། གང་ཟག་དང་ལམ་གྱི་ཁྱད་པར་ཡོད་དོ། །༼དབང་ཐོབ་ནས་སངས་མ་རྒྱས་ཀྱི་བར་དུ། ༽གཉིས་པ་ལ་ནི། ཁྱད་པར་དེ་གཉིས་མེད་ཀྱི། རྒྱུད་ཐ་དད་པས་དོན་བྱེད་པ་དང་། ཞིང་ཁམས་ཐ་དད་པར་བྱེད་པ་དང་། དུས་ཐ་དད་པར་བྱེད་པ་དང་། ཚུལ་ཐ་དད་པར་བྱེད་པ་བཞི་ནི་ཁྱད་པར་ཡོད་དོ། །༼འདུལ་བའི་ཞིང་ཁམས་ཐ་དད་ཡིན། དུས་སོ་སོ་ཡིན་ནོ། །དེ་དག་སངས་རྒྱས་ནས་ཡོན་ཏན་གྱི་ཁྱད་པར་མེད་པར་མ་ཟད། འགྲོ་བའི་དོན་མཛད་པའི་ཚུལ་བཞིའི་ཁྱད་པར་ཡང་མེད་དེ། ཤཱཀྱ་ཐུབ་པ་དང་། བྱམས་པ་ལྟ་བུ་ལ་རྒྱུད་ཐ་དད་པ་མ་ཡིན། སྐུ་མདོག་ལ་སྩོགས་པའི་ཚུལ་ཐ་དད་པ་ཡང་ཡོད་པ་མ་ཡིན་ནོ། །༽མཐར་ཕྱིན་པ་ཆེན་པོ་བརྙེས་པ་ནི། ཡོན་ཏན་མངའ་མི་མངའི་ཁྱད་པར་ཅི་སྨོས་ཀྱི། འགྲོ་བའི་དོན་མཛད་པའི་ཚུལ་བཞིའི་ཁྱད་པར་ཡང་མེད་དེ། འདི་ལྟར་སྒྲིབ་པའི་བག་ཆགས་མ་ལུས་པར་ཟད་པ་དང་། གནས་འགྱུར་བའི་ཆོས་ཀུན་གནས་གྱུར་པ་དང་། ཡོན་ཏན་ཡོངས་སུ་རྫོགས་པའི་ཕྱིར་རོ། །དེ་ལ་བདག་ཏུ་ལྟ་བའི་བག་ཆགས་ཟད་པས་རྒྱུད་ཐ་དད་པས་དོན་བྱེད་པའི་རྒྱུ་མི་མངའ་འོ། །༼དེ་ལ་བདག་ཏུ་ལྟ་བའི་བག་ཆགས་མ་ཟད་པའི་དབང་གིས་གཞན་དུ་ལྟ་བ་འབྱུང་བ་ཟད་དེ། དེ་ལ་བདག་ཏུ་ལྟ་བའི་བག་ཆགས་བྲལ་བས་བདག་གཞན་གྱི་རྒྱུད་དུ་ལྟ་བ་ལྡོག་གོ། ༽མངོན་པར་བརྗོད་པའི་བག་ཆགས་ཟད་པས་༼ཡུལ་དང་དུས་དང་རྣམ་པ་ལ་སོགས་པའི་ཐ་སྙད་འདོགས་པའི་བག་ཆགས་ཟད་པས་དེ་ལྟ་བུའི་རྒྱུ་མི་མངའ། ༽ཞིང་ཁམས་དང་དུས་ཐ་དད་པས་དོན་བྱེད་པའི་རྒྱུ་མི་མངའ་འོ། །སྲིད་པའི་ཡན་ལག་གི་བག་ཆགས་ཟད་པས་༼ཕུང་པོར་སྐྱེ་བའི་བག་ཆགས་ཟད་པས་ལུས་དང་གནས་དང་ལོངས་སྤྱོད་དུ་སྣང་བ་དང་བྲལ་ལོ། །༽ལུས་དང་ལོངས་སྤྱོད་ཀྱི་ཚུལ་ཐ་དད་པས་དོན་མཛད་པ་མི་མངའ་འོ། །ཡང་གཟུགས་ཀྱི་ཕུང་པོ་གནས་༼གཟུགས་གནས་མ་གྱུར་ན་ལུས་དང་ཞིང་ཁམས་གྲུབ་པ་ཞིག་ནའང་། གནས་གྱུར་པའི་ཕྱིར་དག་པའི་ཆོས་ཙམ་མིན་པ་ཞིང་ཁམས་སུ་སྣང་བའི་རྒྱུ་མི་མངའ་འོ། །༽གྱུར་པས་ཞིང་ཁམས་གྲུབ་པའི་རྒྱུ་མི་མངའ་འོ། །ཚོར་བའི་༼ཚོར་བ་གནས་གྱུར་པས་ཉམས་སུ་མྱོང་བ་གནས་འགྱུར་ལ། དེས་ཞིང་ཁམས་དང་ལོངས་སྤྱོད་པ་མི་མངའ་འོ། །༽ཕུང་པོ་གནས་གྱུར་པས་ཞིང་དང་འཁོར་དང་ཆོས་དང་ཡེ་ཤེས་དང་སྐུ་ཐ་དད་པ་ལ་ལོངས་སྤྱོད་པའི་རྒྱུ་མི་མངའ་འོ། །འདུ་ཤེས་ཀྱི་ཕུང་པོ་༼འདུ་ཤེས་གནས་མ་གྱུར་ན་བསམ་པ་ཇི་ལྟ་བ་བཞིན་དུ་ཆོས་སྟོན་པ་རིགས་ན། གནས་གྱུར་པས་བརྗོད་པའམ་ཐ་སྙད་དང་བྲལ་བའི་ཆོས་ཐ་དད་སྟོན་པ་མི་མངའ་འོ། །༽གནས་གྱུར་པས་ཐ་སྙད་ཡོངས་སུ་བྱ་བའི་ཕྱིར་ཆོས་ཐ་དད་པར་སྟོན་པའི་རྒྱུ་མི་མངའ་འོ། །འདུ་བྱེད་ཀྱི་ཕུང་པོ་༼གནས་མ་གྱུར་ན་ལས་མངའ་བ་ཞིག་ན། ༽གནས་གྱུར་པས་ཕྲིན་ལས་ཐ་དད་པར་མཛད་པའི་རྒྱུ་མི་མངའ་འོ། །ཀུན་གཞིའི་རྣམ་པར་ཤེས་པ་༼ཟག་བཅས་ཀྱི་ཆོས་ཐམས་ཅད་ཀྱི་གཞི་ཡིན་པའི་ཕྱིར། ༽གནས་གྱུར་པས་ཐ་དད་པ་ཀུན་གྱི་གཞི་མི་མངའ་འོ། །༼བདག་ཏུ་རློམས་སེམས་པའི་དབང་གིས་ཆོས་སྣ་ཚོགས་རྟོག་པ་ཡིན་པའི་ཕྱིར། ༽ཉོན་མོངས་པ་ཅན་གྱི་ཡིད་གནས་གྱུར་པས་རྒྱུད་ཐ་དད་པའི་དོན་མཛད་པའི་རྒྱུ་མི་མངའ་འོ། །༼བདག་པོའི་རྐྱེན་བྱས་ནས་བདག་དང་གཞན་གྱི་རྒྱུད་འཛིན་པ་འབྱུང་བས། ༽ཡིད་ཀྱི་རྣམ་པར་ཤེས་པ་གནས་གྱུར་པས་ཞིང་དང་དུས་ཐ་དད་པར་སྟོན་པའི་རྒྱུ་མི་མངའ་འོ། །སྒོ་ལྔའི་རྣམ་པར་ཤེས་པ་༼གཟུགས་སྒྲ་ལ། ༽གནས་གྱུར་པས་ཚུལ་ཐ་དད་པར་སྟོན་པའི་རྒྱུ་མི་མངའ་འོ། །ཡོན་ཏན་ཡོངས་སུ་རྫོགས་པའི་ཕྱིར་ཡང་ཁྱད་པར་མི་མངའ་སྟེ། སེམས་ཅན་ཐམས་ཅད་ཀྱི་དོན་དུ་བསོད་ནམས་ཀྱི་ཚོགས་ཚད་མེད་པ་བསགས་པ་ཡོངས་སུ་རྫོགས་པས། ནམ་མཁའི་ཁམས་ཀྱིས་ཁྱབ་པའི་སེམས་ཅན་གྱི་༼སེམས་ཅན་གྱི་དོན་བྱེད་པ་ལ་རྒྱ་ཆེ་ཆུང་དང་ཡུན་རིང་ཐུང་མི་མངའ་སྟེ། སྨོན་ལམ་གྱི་མཐུ་ཡོངས་སུ་རྫོགས་པར་འདྲ་བའི་ཕྱིར། ༽དོན་མཛད་པ་དང་། འཁོར་བ་ཇི་སྲིད་པར་དོན་མཛད་པའི་མཐུ་མངའ་འོ། །དེའི་ཕྱིར་ཐ་དད་པ་བཞིའི་ཚུལ་གྱིས་དོན་མཛད་པ་མི་མངའ་འོ། །ཡང་དང་པོ་བྱང་ཆུབ་ཏུ་ཐུགས་བསྐྱེད་ནས་སེམས་ཅན་འགའ་ཞིག་གི་ཕྱིར་སྨོན་ལམ་མ་བཏབ། བསྐལ་པ་འགའ་ཞིག་གི་ཕྱིར་སྨོན་ལམ་མ་བཏབ། བསྟན་པ་འགའ་ཞིག་གི་ཕྱིར་སྨོན་ལམ་མ་བཏབ་སྟེ། ཡོངས་སུ་མ་ཆད་པའི་སྨོན་ལམ་བཏབ་པ་ཡོངས་སུ་རྫོགས་པའི་ཕྱིར། འགྲོ་བའི་དོན་སོ་སོར་མཛད་པ་མི་མངའ་འོ། །གདུལ་བྱ་རྣམས་ལ་ནི་ཐ་དད་པ་བཞིའི་ཚུལ་དུ་སྣང་སྟེ། ༼སངས་རྒྱས་རྣམས་སེམས་ཅན་ལ་ཆོས་ཐ་དད་དུ་སྣང་སྟེ་ཤཱཀྱ་དང་བྱམས་པ་ལྟ་བུའོ། །༽ སྒྲིབ་པའི་བག་ཆགས་མ་ཟད་པ་དང་། གནས་མ་གྱུར་པའི་ཆོས་དང་ལྡན་པ་དང་ཡོན་ཏན་མ་རྫོགས་པའི་ཕྱིར་རོ། །གལ་ཏེ་ཡེ་ཤེས་ཀྱི་རྒྱུད་སོ་སོས་དོན་མ་མཛད་ན་ཇི་ལྟར་བཅོམ་ལྡན་འདས་ཤཱཀྱ་ཐུབ་པས། འདས་པའི་སངས་རྒྱས་རྣམས་ཀྱང་ང་ཡིན་ནོ། །ཞེས་གང་གསུངས་པ་དག་ལ། དེའི་དགོངས་པ་ལུང་སྟོན་པའི་མདོ་ལས། དེ་ནི་མཉམ་པ་ཉིད་ལ་དགོངས་པ་ཡིན་ཏེ། སངས་རྒྱས་རྣམས་སྐུ་དང་གསུང་དང་ཆོས་དང་ཡི་གེ་མཚུངས་ཏེ། དེའི་ཕྱིར་ང་ཡིན་ནོ། །ཞེས་གསུངས་ཀྱི། དེ་ཡང་ངའི་རྒྱུད་ཡིན་ནོ། །ཞེས་ནི་ལུང་མ་བསྟན་ཏོ་ཞེ་ན། དེར་ནི་ལུང་མ་བསྟན་པའི་དོན་ཉིད་ངེས་པའི་དོན་ཡིན་ཏེ། ལུང་བསྟན་པ་ནི་བཀྲི་བའི་དོན་ཡིན་ནོ། །ཇི་སྐད་དུ། གདམས་ངག་འཕོགས་པའི་མདོ་ཞེས་བྱ་བ་གསང་བ་ལུང་སྟོན་པའི་མདོ་ལས། དགོངས་པས་ལུང་བསྟན་རྣམས་ལ་ཡང་། །ལུང་མ་བསྟན་པ་ངེས་ཡོད་དོ། །དེའི་ཕྱིར་རྒྱལ་བའི་བཀའ་རྣམས་ལ། །གསང་སྔགས་ཆོས་ཀྱི་མེ་ལོང་ཡིན། །ཞེས་གསུངས་པ་ལྟ་བུ་ཡིན་ནོ། །རྒྱུད་སོ་སོའི་དོན་སོ་སོར་མཛད་ན། སྐུ་གསུམ་གྱི་འདུལ་བའི་ཞིང་རྣམ་པར་བཞག་པ་མེད་པར་འགྱུར་རོ། །གསང་སྔགས་ཀྱི་རྒྱུད་དང་མན་ངག་རྣམས་སུ། སངས་རྒྱས་ཀྱི་སའི་ཁྱད་པར་མང་དུ་གསུང་བ་འདི་ལྟར། ཀུན་ཏུ་འོད་ཅེས་བྱ་བ་དང་། དེ་བཞིན་དུ་རྡོ་རྗེ་འཆང་གི་ས་དང་། སྟུག་པོ་བཀོད་པའི་ས་དང་། པདྨ་ཅན་གྱི་ས་དང་། ཡི་གེ་འཁོར་ལོ་ཚོགས་ཆེན་གྱི་ས་དང་། ཀུན་ཏུ་བཟང་པོ་དབྱེ་བ་མེད་པའི་༼རྡོ་རྗེ་འཆང་ཆེན་པོའི་ས་ལ་སོགས་པ་ནམ་མཁའི་འོད། རིན་ཆེན་འོད་དེ་ལ་སོགས་པ་བཅུ་གཉིས་གསུངས་པ་ལྟ་བུའོ། །༽ས་ཞེས་བྱ་བ་ལ་སོགས་པ་གསུངས་པ་དང་། སྐུ་ཡང་དག་པའི་སྐུ་དང་། བསྔགས་པའི་སྐུ་ཞེས་འབྱུང་བ་དང་། ཡེ་ཤེས་ཀྱང་རང་བྱུང་གི་ཡེ་ཤེས་དང་། ཡོངས་སུ་བསྐྱེད་པའི་ཡེ་ཤེས་ཞེས་འབྱུང་བ་དེ་དག་ནི། ཁ་ཅིག་ལམ་དང་ལྟ་བའི་ཁྱད་པར་༼འདི་ལ་བྱེད། ༽ དང་། ཁ་ཅིག་མིང་སོ་སོར་གྲགས་པའི་ཁྱད་པར་ཏེ་འབྲས་བུ་ཆེ་བའི་ཡོན་ཏན་ལ་དགོངས་པ་ཡིན་ནོ། །དེ་ལྟར་མངོན་པར་རྟོགས་པའི་ཞར་ལ། འབྲས་བུ་ལ་ཁྱད་པར་མེད་པ་བསྟན་པ་ཡིན་ནོ། །དེ་ལ་ཐབས་སླ་བ་གང་ཞེ་ན། འདོད་པའི་ཡོན་ཏན་མི་སྤོང་སྟེ་རྒྱུ་མི་བདེ་༼དཀའ་བ། ༽བའི་སྒོ་ནས་མི་བསྒྲུབ་པས་སོ། །དེ་ལ་ཐབས་མཁས་པ་གང་ཞེ་ན། ཀུན་ནས་ཉོན་མོངས་པ་ལ་སྤྱད་ཀྱང་ཚོགས་སུ་འགྱུར་བར་ཤེས་པའོ། །དེ་ལ་ཐབས་མང་བ་གང་ཞེ་ན། གདུལ་བྱ་རྣམས་ཀྱི་འདོད་པ་སྤྱོད་པ་མི་ཟློག་པར་སྒོ་མཐའ་ཡས་པས་འགྲུབ་པར་ཤེས་པའོ། །དེ་ལྟར་ཡང་འཕགས་པ་ཐབས་ཀྱི་ཞགས་པ་ལས་དམིགས་པ་ཆེན་པོར་གསུངས་པ། བདེན་གཉིས་རྒྱུ་དང་འབྲས་བུའི་ཚུལ། །དེ་བཞིན་ཉིད་ལ་གནས་བཅས་ནས། །ཕྱི་ནང་སྣོད་བཅུད་རྣམ་པར་དག །བྱེད་སྤྱོད་ཐམས་ཅད་ཚོགས་གཉིས་འགྱུར། །ཞེས་གསུངས་སོ། །བསྒྲུབ་པ་ཆེན་པོའང་དེ་ཉིད་ལས། །ཕ་རོལ་ཕྱིན་བཅུ་རྫོགས་པ་སྟེ། །ས་བཅུ་རིམ་གྱིས་བཀོད་པ་ལ། །མཉམ་ཉིད་རིག་པའི་རྡོ་རྗེ་ཡིས། །ས་རྣམས་མཉམ་པ་ཉིད་དུ་སྦྱོར། །ཞེས་གསུངས་སོ། །ཡང་ཡེ་ཤེས་ཆེན་པོ་ཡང་དེ་ཉིད་ལས། རྡོ་རྗེ་ལྟ་བུའི་ཡེ་ཤེས་ཀྱིས། །ཆོས་ཀུན་སྒྱུ་མར་རིག་པའི་ཕྱིར། །དངོས་དང་དངོས་མེད་བག་ཆགས་བསྲེགས། །ཡང་ན་ཡེ་ཤེས་མེ་ཞེས་བྱ། །ཞེས་སོ། །ཐབས་ཆེན་པོའང་གསུངས་པ། ལམ་གྱི་ནང་ན་ཉེ་ལམ་བདེ་རྫོགས་པ། །ཐབས་ཀྱི་ནང་ན་མ་ནོར་དམ་པ་སྟེ། །བསྒྲུབ་ན་ཚེ་འདིར་སངས་རྒྱས་ཆེ་བ་ཡང་། བླང་དོར་མེད་པའི་སྐུ་གསུམ་རྡོ་རྗེ་ཐོབ། །ཅེས་གསུངས་སོ། །བྱ་བ་དང་སྤྱོད་པའི་རྒྱུད་དག་ཏུ་ནི། རྣལ་འབྱོར་གྱི་བསམ་པ་དང་། སྤྱོད་པ་ཚད་དུ་ཆུད་པར་མ་གསུངས་པས། དེའི་དབང་གིས་དབྱེ་བ་ནི་མི་བརྩམས་ཏེ། དངོས་པོ་ལ་གཙོར་བྱེད་པ་དང་། སྒོ་བསྟུན་པར་ཟད་དོ། །འདི་དག་ཙམ་གྱིས་ཐུན་མོང་ཁྱད་པར་ཤེས། །འདི་ལྟར་སྨྲས་ན་སྒྲོ་དང་སྐུར་བ་མེད། །འདི་ལྟར་ཤེས་ན་ཡིད་གཉིས་རྣམ་པར་བྲལ། །རང་གི་འདོད་པ་མ་ཡིན་གཟུ་བོའི་ཚིག ། ཐེག་པའི་བྱེ་བྲག་ཆེན་པོ་ངྷརྨ་བྷ་དྲས་མཛད་པ་རྫོགས་སོ། །མི་སྤེལ་ལོ། །