Дзмітрый Яўгенавіч Шаўцоў

Дэпутат Палаты прадстаўнікоў Нацыянальнага сходу Рэспублікі Беларусь V, VI і VIII скліканняў.

Дзмітрый Яўгенавіч Шаўцоў
руск.: Дмитрий Евгеньевич Шевцов
Нараджэнне	3 лістапада 1973(1973-11-03) (50 гадоў) Жлобін, Жлобінскі раён, Гомельская вобласць, БССР, СССР
Член у	Беларускае Таварыства Чырвонага Крыжа
Адукацыя	Гомельскі дзяржаўны медыцынскі ўніверсітэт
Дзейнасць	палітык, урач
Месца працы	Беларускае Таварыства Чырвонага Крыжа
Прыналежнасць	рэжым Лукашэнкі
Узнагароды	Ганаровая грамата Нацыянальнага сходу Рэспублікі Беларусь Ганаровая грамата Міністэрства аховы здароўя Рэспублікі Беларусь[d]

Генеральны сакратар Беларускага таварыства Чырвонага Крыжа з 10 верасня 2021 года. За публічную падтрымку Шаўцовым уварвання Расіі ва Украіну і вываз украінскіх дзяцей з акупаваных тэрыторый членства Беларускага таварыства Чырвонага Крыжа ў Міжнароднай федэрацыі таварыстваў Чырвонага Крыжа і Чырвонага Паўмесяца (МФТЧКіЧП) было прыпынена^[⇨].

Скончыў Гомельскі дзяржаўны медыцынскі інстытут па спецыяльнасці «Лячэбная справа»; Беларускую медыцынскую акадэмію паслядыпломнай адукацыі па спецыяльнасці «Арганізатар аховы здароўя»; Акадэмію кіравання пры Прэзідэнце Рэспублікі Беларусь па спецыяльнасці «Дзяржаўнае кіраванне сацыяльнай сферай»; аспірантуру ДУ «РНПЦ медыцынскіх тэхналогій, інфарматызацыі, кіравання і эканомікі аховы здароўя» па спецыяльнасці «Грамадскае здароўе і ахова здароўя».

Пасля заканчэння медыцынскага інстытута працаваў урачом-анестэзіёлагам-рэаніматолагам, намеснікам галоўнага ўрача па медыцынскім абслугоўванні насельніцтва раёна дзяржаўнай установы «Жлобінскае тэрытарыяльнае медыцынскае аб’яднанне»; намеснікам галоўнага ўрача па арганізацыйна-метадычнай рабоце, галоўным урачом установы аховы здароўя «34-я цэнтральная раённая клінічная паліклініка» г. Мінска.

Быў дэпутатам Жлобінскага раённага Савета дэпутатаў дваццаць чацвёртага склікання і Мінскага гарадскога Савета дэпутатаў дваццаць шостага склікання. Старшыня ГА «Беларуская асацыяцыя ўрачоў».

З 2009 года супрацоўнік тэлевізійнага канала АНТ, удзельнік перадач пра здароўе і палітыку.

У 2012—2016 гадах дэпутат Палаты прадстаўнікоў Нацыянальнага сходу Рэспублікі Беларусь V склікання. У 2016—2019 гадах — дэпутат Палаты прадстаўнікоў Нацыянальнага сходу Рэспублікі Беларусь VI склікання.

У 2020 годзе прызначаны галоўным урачом 1-й гарадской клінічнай бальніцы горада Мінска.

На прэзідэнцкіх выбарах 2020 года ў Беларусі быў старшынёй Мінскай гарадской выбарчай камісіі, якую ўзначальвае з 2015 года. Пасля пачатку палітычнага крызісу працягнуў падтрымліваць рэжым Лукашэнкі. Назваў акцыі пратэсту «правакацыяй». Назваў «тэрарыстам» забітага 28 верасня 2021 года Андрэя Зельцэра.

Генеральны сакратар Чырвонага Крыжа. Незаконны вываз украінскіх дзяцей

 

10 верасня 2021 года абраны генеральным сакратаром Беларускага таварыства Чырвонага Крыжа. 18 кастрычніка 2022 года назваў гомасексуальнасць псіхічнай хваробай, якую трэба лячыць. У ліпені 2023 года як генеральны сакратар Беларускага таварыства Чырвонага Крыжа наведаў акупаваныя Расіяй тэрыторыі Украіны, дзе хадзіў з шаўронам з літарай «Z», якая ёсць сімвалам рашызму і падтрымкі ваеннага ўварвання Расіі ва Украіну. Публічна прызнаўся ва ўдзеле ў вывазе ўкраінскіх дзяцей у Беларусь з украінскіх тэрыторый, акупаваных Расіяй, што ёсць парушэннем Жэнеўскіх канвенцый. Міжнародная федэрацыя таварыства Чырвонага Крыжа асудзіла дзеянні Шаўцова:

«Надзвычайныя абставіны гэтага візіту, уключаючы выкарыстанне сімвала, які асацыюецца з адным з бакоў міжнароднага ўзброенага канфлікту ва Украіне, закранаюць асноўныя прынцыпы міжнароднага руху Чырвонага Крыжа і Чырвонага Паўмесяца. Візіт і звязаныя з ім мерапрыемствы не былі ўзгодненыя з іншымі кампанентамі руху, як таго патрабуюць нашы ўнутраныя правілы і прадпісанні.

19 ліпеня 2023 года міністр замежных спраў Украіны Дзмітрый Кулеба заклікаў Міжнародны крымінальны суд выдаць ордар на арышт Шаўцова.

У ліпені 2023 года Дзмітрый Шаўцоў у эфіры беларускай прапагандысцкай тэлеперадачы прапанаваў «намякнуць» краінам Захаду пра магчымасць ужывання тактычнай ядзернай зброі Беларуссю.

7 верасня 2023 года Дзмітрый Шаўцоў аднагалосна быў пераабраны на пасаду генеральнага сакратара Беларускага таварыства Чырвонага Крыжа. 8 верасня стала вядома, што Міжнародная федэрацыя таварыства Чырвонага Крыжа рэкамендавала Шаўцову адысці ад спраў на час расследавання ў дачыненні да яго ў сувязі з ягонай паездкай на акупаваныя Расіяй тэрыторыі Украіны.

3 кастрычніка 2023 года Міжнародная федэрацыя таварыстваў Чырвонага Крыжа і Чырвонага Паўмесяца (МФТЧКіЧП) апублікавала вынікі расследавання ў дачыненні да Дзмітрыя Шаўцова. Камітэт па выкананні прававых нормаў і пасярэдніцтве МФТЧКіЧП правёў расследаванне абвінавачанняў, выкліканых афіцыйнымі заявамі Генеральнага сакратара Беларускага Чырвонага Крыжа, у тым ліку аб ядзернай зброі і перамяшчэнні дзяцей у Беларусь, а таксама ў сувязі з яго візітам у Луганск і Данецк. Паводле вынікаў расследавання праўленне МФТЧКіЧП заклікала Беларускае таварыства Чырвонага Крыжа адхіліць Дзмітрыя Шаўцова ад пасады да 30 лістапада 2023 года, у выпадку калі гэта не будзе зроблена — МФТЧКіЧП спыніць фінансаванне і прыпыніць членства Беларускага чырвонага крыжа ў МФТЧКіЧП.

1 снежня 2023 года МФТЧКіЧП прыпыніла членства Беларускага таварыства Чырвонага Крыжа ў федэрацыі праз невыкананне патрабавання пра зняцце Дзмітрыя Шаўцова з пасады. Дзмітрый Шаўцоў у каментарыях для БелТА негатыўна адзначыў, што МФТЧКіЧП апублікавалі рашэнне пра прыпыненне членства не толькі па-англійску і па-руску, але і на беларускай мове:

Хоць афіцыйныя мовы Міжнароднай федэрацыі — англійская, французская, іспанская, арабская, тэхнічная мова — руская. Апублікаванне на ўкраінскай і беларускай мовах — каб дагадзіць украінскім уладамі, якія закліка́лі Шаўцова ў Міжнародны суд, і каб дагадзіць беларускай апазіцыі, якая таксама крычала, што Шаўцоў удзельнічае ў дэпартацыі дзяцей з Данбаса. Арыгінальны тэкст (руск.)   Хотя официальные языки Международной федерации — английский, французский, испанский, арабский, технический язык — русский. Опубликование на украинском и белорусском языках — в угоду украинских властей, которые призывали Шевцова в Международный суд, и в угоду белорусской оппозиции, которая тоже кричала, что Шевцов участвует в депортации детей из Донбасса.

9 студзеня 2024 года выданне «Buromedia» апублікавала расследаванне аб грашовых злоўжываннях кіраўніцтва Беларускага чырвонага крыжа ў міжнародных паездках за часамі кіравання Дзмітрыя Шаўцова.

З 2024 года Дзмітрый Шаўцоў дэпутат Палаты прадстаўнікоў XVIII склікання.

Узнагароджаны медалём «За працоўныя заслугі», граматай Беларускага фонду міру, Ганаровай граматай Беларускага Таварыства Чырвонага Крыжа, Падзякай Прэзідэнта Рэспублікі Беларусь (2020), ганаровымі граматамі Палаты прадстаўнікоў Нацыянальнага сходу Рэспублікі Беларусь, Міністэрства аховы здароўя Рэспублікі Беларусь, адміністрацыі Савецкага раёна г. Мінска, Рэспубліканскага прафесійнага саюза работнікаў аховы здароўя. Удастоены нагруднага знака «Выдатнік аховы здароўя Рэспублікі Беларусь». Мае падзячныя лісты Прэзідэнта Рэспублікі Беларусь.

Унесены ў санкцыйныя спісы краін Балтыі пасля выбараў 2020 года.

5 снежня 2023 года быў унесены ў спіс спецыяльна прызначаных грамадзян і заблакіраваных асоб ЗША.

У лютым 2024 года аб санкцыях супраць Шаўцова абвясцілі ўлады ЕС. У сакавіку да гэтага пакета санкцый далучыліся Швейцарыя, Албанія, Боснія і Герцагавіна, Ісландыя, Ліхтэнштэйн, Малдова, Нарвегія, Паўночная Македонія, Украіна, Чарнагорыя. 24 лютага 2024 года ў свой санкцыйны спіс Шаўцова ўнесла і Аўстралія.

Жанаты, выхоўвае двух сыноў.