Уладзімер Пырачкін: беларускі кардыёляг

1954, Лоша, Астравецкі раён, Гарадзенская вобласьць, цяпер Беларусь) — беларускі кардыёляг.

Аўтар навуковых працаў пра ўльтрагукавую дыягностыку і лячэньне хваробаў сэрца і крывяносных судзінаў. Доктар мэдычных навук (2003), выдатнік аховы здароўя Беларусі (2005) і прафэсар (2009).

У 1971 годзе скончыў Астравецкую сярэднюю школу і паступіў у Гарадзенскі дзяржаўны мэдычны інстытут, які скончыў у 1977 годзе паводле спэцыяльнасьці «лекарская справа». У 1978—1985 гадох працаваў у 1-й гарадзкой клінічнай лякарні Горадні. У 1985—1991 гадох займаў пасаду загадніка аддзяленьня рэанімацыі Гарадзенскага абласнога кардыялягічнага дыспансэру. У 1986 годзе абараніў кандыдацкую дысэртацыю.

У 1991—1993 гадох выкладаў у Гарадзенскім дзяржаўным унівэрсытэце на катэдры асноваў мэдычных ведаў спачатку старэйшым выкладнікам, а затым у якасьці дацэнта. У 1993 годзе перайшоў у Гарадзенскі дзяржаўны мэдычны ўнівэрсытэт на лекавы факультэт, дзе працаўладкаваўся на катэдру факультэцкай тэрапіі. Спачатку працаваў асыстэнтам катэдры. У 1996 годзе заняў пасаду дацэнта, а ў 1997-м атрымаў адпаведную навуковую годнасьць. У 1999—2001 гадох праходзіў падрыхтоўку ў дактарантуры, пасьля якой у 2003 годзе абараніў доктарскую дысэртацыю пра дыягностыку магістральных артэрыяў у хворых.

У 2001—2020 гадох быў загаднікам 1-й катэдры ўнутраных хваробаў, якая да 2003 году называлася катэдрай шпітальнай тэрапіі.

• Жонка — Алена Ўладзімераўна Мірончык (нар. 1951). Рэўматалягіня. Кандыдатка мэдычных навук.
• Сын — Аляксандар Пырачкін (нар. 1979). Кардыёляг. Кандыдат мэдычных навук.