Хакейны Клюб Віцебск: віцебскі хакейны клюб (Беларусь)

Двухразовы ўладальнік Кубка Беларусі.

Віцебск
Заснаваны	1959
Адкуль	Віцебск, Беларусь
Пляцоўка	Віцебскі палац спорту Зьмяшчальнасьць: 1790
Фарм-клюб	Мядзьведзі
Дырэктар	Руслан Салодкін
Чэмпіянат	Экстраліга
Галерэя здымкаў у Вікісховішчы
vitebsk.hockey.by

Напрыканцы 1999 году быў пабудаваны Віцебскі палац спорту, але горад сваёй хакейнай каманды ня меў. Тым ня менш, арэнай скарыстаўся наваполацкі «Палімір», чый фарм-клюб «Хімік»-ШНСМ базаваўся ў Віцебску на сэзон 2000—2001 гадоў чэмпіянату Беларусі. За тую каманду дэбютавалі ў прафэсійным хакеі такія будучыю зоркі, як то Андрэй Касьціцын і Аляксандар Жыдкіх. Па сканчэньні сэзону 20 жніўня 2001 году на грунце гэтае каманды на загад Віцебскага аблвыканкаму быў створаны хакейны клюб «Віцебск». Першым дырэктарам клюбу быў прызначаны Пётар Дарашкевіч, а пасаду галоўнага трэнэр заняў Уладзімер Катаеў. У новай камандзе ўжо не было Касьціцына, які вярнуўся ў Наваполацак, але засталіся Жыдкіх, Дзяніс Тыднюк ды іншыя. Таксама да «Віцебску» далучыўся шэраг гульцоў наваполацкай дружыны.

 

Каманда займала месцы ў другой палове табліцы, а ў 2004 годзе пасьля пашырэньня колькасьці ўдзельнікаў плэй-оф упершыню прабілася ў вырашальны турнір. У чвэрцьфінале «Віцебск» двойчы саступіў менскаму «Кераміну» і скончыў свой шлях у тым сэзоне. У настыпныя два гады «паўночнікі» замыкалі турнірную табліцу. У студзені 2007 году галоўным трэнэрам каманды быў прызначаны расеец Васіль Сьпірыдонаў, зь якім вынікі клюбу палепшыліся. Касьцяк каманды сфармаваўся яшчэ ў папярэднім сэзоне, але згуляцца паміж сабой яны здолелі толькі ў другім сваім сэзоне. Акрамя беларусаў Рамана Раманенка, Дзьмітра Мільчакова і Івана Вусенкі і расейца Аляксандра Вусенкі, галоўнымі зоркамі былі ўкраінцы Юры Наварэнка, Васіль Паланіцкі і Арцём Гнідэнка. «Віцебск» скончыў рэгулярны сэзон на чацьвертым месцы, а ў чвэрцьфінале вырагуляў жлобінскі «Мэталюрг». Аднак, на шляху віцяблянаў паўстаў «Керамін», які не пакінуў шанцаў камандзе. Пасьля сэзону адбылася трэнэрская ракіроўка, то бок галоўны трэнэр моладзевай зборнай Беларусі Андрэй Расолька ачоліў віцебскую каманду, а ягонае месца заняў Сьпірыдонаў. Таксама клюб ня здолеў утрымаць шэраг сваіх лідэраў, але ў сэзоне 2009—2010 гадоў клюб зноў прасунуўся ў плэй-оф, саступіўшы ў чвэрцьфінале «Юнацтву». Фінансавыя цяжкасьці прымусілі клюб зноў стаць аўтсайдэрам айчыннага першынства. Пад кіраўніцтвам Дзьмітра Дудзіка «Віцебск» пасьля доўгага перапынку ў 2015 годзе зноў прасунуўся ў плэй-оф Экстралігі. Гэтая падзея была азмрочаная сьмерцю генэральнага дырэктара клюбу Ўладзімера Базекі. Пасьля сэзону клюб пакінулі ня толькі галоўны трэнэр Дудзік, але і шэраг лідэраў каманды, як то ўласны выхаванец Мікіта Ядроец. «Віцебск» працягваў патанаць у запазычанасьцях, таму чакаць посьпехаў не выпадала.

У 2018 годзе была зробленая рэарганізацыя лігі, якая была падзеленая на Экстралігу А і Б. Праз дрэнныя вынікі «Віцебск» адразу быў пераведзены ў Экстралігу Б, дзе ў першы ж сэзон заняў апошні радок. Сытуацыя паўтарылася і ў сэзоне 2019—2020 гадоў. У траўні 2021 году дысцыплінарны камітэт Фэдэрацыі хакею Беларусі, базуючыся на зьвестках Сьледчага камітэту Рэспублікі Беларусь, пастанавіў дыскваліфікаваць 5 хакеістаў «Віцебску» за дамоўныя матчы. Было ўстаноўлена, што ў сэзоне 2018—2019 і 2019—2020 гадоў Раман Стрэльнікаў, Віталь Сапега, Аляксандар Паліцынскі, Кірыл Сачыўка і Антон Мядзведзь неаднаразова забясьпечвалі паразу ўласнае каманды з карысьлівым намерам. У 2021 годзе фармат беларускага першынства зноў зьмяніўся і «Віцебск» вярнуўся да Экстралігі. Ачоленая Раманам Юпатавым, клюб пачаў умацоўвацца дасьведчанымі гульцамі, гэтак да каманды вярнуўся Ядроец, а таксама далучыліся Аляксандар Ляўко, Вадзім Яроха, Валеры Кубракоў, Ягор Ягораў, Уладзіслаў Кавалевіч. Каманда ўдала правяла рэгулярны сэзон, двойчы перагуляўшы грандаў — «Юнацтва», «Нёман», «Шахцёр», «Гомель». На думку журналіста Аляксея Рагалевіча віцебскі клюб таў адкрыцьцём сэзону. Упершыню за доўгі час каманда прабілася ў плэй-оф, але там у чвэрцьфінале саступіла «Шахцёру». У чэрвені 2022 году да шыхтаў клюбу далучыўся Віктар Туркін, Максім Малюцін, Яўген Дадонаў і Антон Алісеенка, а ў жніўні 2022 году «Віцебск» здабыў свой першы трафэй у гісторыі, перагуляўшы ў фінале Кубка Беларусі «Гомель». У Экстралізе клюб зноў трапіў у плэй-оф, саступіўшы ў ім «Юнацтву». Улетку з каманды сышоў Алісеенка, а ў жніўні другі раз запар «Віцебску» скарыўся Кубак Беларусі.

Паводле стану на 4 лютага 2024 году

Брамнікі
25		Максім Малюцін	16.09.1988	35		Арцём Шпілёў	14.06.1997
Абаронцы
5		Андрэй Герашчанка	13.12.1995	14		Мікалай Філановіч	02.03.2003
22		Арцём Сьмірноў	05.01.1996	55		Данііл Місюль	02.07.2002
68		Міхаіл Лістападаў	17.06.2003	73		Вадзім Яроха	03.08.1991
89		Максім Возераў	23.03.1998
Нападнікі
4		Максім Міхайлаў	04.11.2005	7		Павал Шалкоўскі	19.01.2006
8		Валянцін Дземчанка	01.04.2002	9		Аляксандар Ганчароў	17.07.2000
11		Яўген Дадонаў	07.08.1992	12		Аляксандар Ляўко	22.04.1992
13		Ахмэд Гімбатаў	14.03.1994	15		Глеб Шкапцоў	05.03.2000
17		Васіль Мядзьведзеў	04.04.2002	18		Ігар Карабанаў	05.05.1992
19		Мікіта Ядроец	01.10.1992	23		Яўген Саламонаў	09.05.1990
27		Артур Гільманаў	18.09.1996	33		Ягор Сьцяпанаў	13.04.1990
57		Магамэд Гімбатаў	11.11.1990	71		Віктар Гаўрыленка	19.03.1997
87		Канстанцін Клюквін	17.02.2002	88		Ільля Камбовіч	03.03.1989
91		Аляксей Невідзіцын	06.02.1998

• Афіцыйны сайт