Футбольны Клюб Ворша: беларускі футбольны клюб

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Ворша (неадназначнасьць).

Колеры — сіня-белыя. З 2015 году выступае ў Першай лізе чэмпіянату Беларусі.

Ворша
Поўная назва	Футбольны клюб «Ворша»
Заснаваны	1951
Горад	Ворша, Беларусь
Стадыён	Гарадзкі Умяшчальнасьць: 2582
Чэмпіянат	Першая ліга
· 2023	14 месца

Адну зь мянушак «раёншчыкі» клюб атрымаў праз тое, што раней у горадзе адбываліся масавыя бойкі паміж жыхарамі розных раёнаў. Больш нэўтральная мянушка — «ільняныя» — нарадзілася праз тое, што ў горадзе працуе буйны ільнокамбінат.

Заснаваны ў 1951 годзе пад назвай «Труд». Большую частку сваёй гісторыі клюб выступаў пад назвай «Старт». Выступаў у чэмпіянаце БССР, пераважна ў найвышэйшым дывізіёне. У 1971 годзе дайшоў да фіналу Кубка БССР, але атрымаў у ім паразу ад жодзінскага «Тарпэда». У тым жа годзе гуляў супраць ленінградзкага «Дынама» ў 1/16 фіналу Кубка СССР сярод аматарскіх калектываў і выбіў суперніка. Але ў 1/8 фіналу саступіў рыскаму клюбу зь лікам ВЭФ 1:3. Меў назвы ЗШМ і «Машынабудаўнік».

У 1990-х гадах клюб меў назву «Легмаш» (да 1994 году), а таксама «Максім-Ворша» (1995), «Максім-Легмаш» (1996). Дружына здолела выйсьці ў Другую лігу, дзе правяла некалькі сэзонаў да 2001 году, калі празь фінансавыя чыньнікі была вымушаная зьняцца з чэмпіянату. Праз тры гады клюб павярнуўся ў Другую лігу, але гэтым разам клюб здолеў толькі ў 2005 выйсьці ў дывізіён вышэй, пасля чаго зноў апынуўся ў Другой лізе, дзе доўгі час знаходзіўся ў канцы табліцы. З 2005 па 2007 гады клюб меў назоў «Ворша-Белаўтасэрвіс».

У сярэдзіне сэзона 2013 году ў клюб прыйшлі некалькі дасьведчаных гульцоў, якія мелі досьвед выступаў у Найвышэйшай лізе і ў замежных чэмпіянатах. У выніку гэта дазволіла «Воршы» ўзьняцца на 6 радок. У сэзоне 2014 году каманда ўпэўнена правяла першы этап, дзе здабыла першае месца ў групе, не атрымаўшы аніводнай паразы. У фінальным этапе «Ворша» таксама спачатку рухалася на першым месцы, але пазьней шэраг няўдачаў адкінуў каманду на трэці радок. Толькі ў апошнім туры, дзякуючы нічыі з «Крумкачамі», «Ворша» засталася на трэцім радку і атрымала месца ў Першай лізе. Станам на 2014 год «Ворша» была самым папулярным клюбам Другой лігі паводле глядацкага інтарэсу — гэта была адзіная каманда, што зьбірала ў сярэднім больш за тысячу чалавек на матчы.

У сэзоне 2015 году дружына займала пазыцыю ўнізе турнірнай табліцы і заняла 14 месца пры 16 удзельніках. У сэзоне 2016 году быў павялічаны бюджэт клюбу, дзякуючы чаму ягоны склад папоўніў шэраг дасьведчаных гульцоў, а галоўным трэнэрам быў прызначаны Юры Канаплёў, які доўгі час працаваў зь «Віцебскам». «Ворша» здолела замацавацца ў сярэдзіне турнірнай табліцы і заняла 7 месца з 14 камандаў. У сэзоне 2017 году, не зважаючы на добры пачатак, «Ворша» хутка апынулася ў сярэдзіне турнірнай табліцы і заставалася там да сканчэньня сэзону, заняўшы 10 месца пры 16 удзельніках.

У пачатку 2018 году новым галоўным трэнэрам каманды стаў Вячаслаў Акшаеў. «Ворша» добра распачала сэзон, але потым стала трываць паразы. У жніўні трэнэрам замест Акшаева быў прызначаны Сяргей Вехцеў. Істотна зьмяніўся склад каманды, які быў папоўнены віцебскімі футбалістамі. Сэзон каманда скончыла на 12 месцы пры 15 удзельніках. Вехцеў заставаўся трэнэрам і ў сэзоне 2019 году, калі «Ворша» стала 10-й, а нападнік клюбу Дзьмітры Іваноў з 17 галамі стаў другім бамбардзірам Першай лігі. У сэзоне 2020 году «Ворша» адмовілася ад актыўнага супрацоўніцтва зь «Віцебскам» і пачала запрашаць гульцоў з Магілёву і Расеі. Галоўным трэнэрам сэзон пачынаў Аляксандар Вопсеў, у кастрычніку яго замяніў Мікалай Бранфілаў, аднак вынікі амаль не зьмяніліся — «Ворша» амаль увесь сэзон правяла ў сярэдзіне і ніжняй палове табліцы, а скончыла турнір на 11 месцы.

У сэзоне 2021 году, не зважаючы на істотную зьмену складу, клюб працягваў рабіць стаўку на дасьведчаных футбалістаў, падмацаваўшыся таксама шэрагам маладых выканаўцаў і расейскімі гульцамі. На турнірнай дыстанцыі каманда рухалася роўна, знаходзілася амаль увесь час трохі ніжэй сярэдзіны табліцы. У верасьні 2021 году галоўны трэнэр каманды Мікалай Бранфілаў сышоў з клюбу, некаторы час абавязкі галоўнага трэнэра выконваў ягоны памочнік Алег Чарапнёў, а ў кастрычніку новым трэнэрам быў прызначаны Ігар Чумачэнка, які раней ачольваў магілёўскі «Дняпро». Дружына ўпэўнена замацавалася на 9 месцы пры 12 удзельніках, дзе і скончыла сэзон. У сэзоне 2022 году каманда працягвала знаходзіцца пераважна ў сярэдзіне табліцы. Выступала нестабільна, буйныя паразы чаргаваліся перамогамі над фаварытамі. Чэмпіянат «Ворша» завяршыла на 9 месцы пры 13 удзельніках. У сэзоне 2023 году каманда цягам турніру знаходзілася ў другой палове табліцы і скончыла чэмпіянат на 14-м радку пры 17 удзельніках.

Гульні праводзіць на гарадзкім стадыёне, які ўмяшчае 2582 гледачы. Таксама некаторыя гульні адбываюцца на стадыёнах «Лякаматыў» (2500 гледачоў) і «Пасялковы» (1500 гледачоў).

• Найвышэйшыя дасягненьні ў часы СССР: фіналіст Кубка БССР (1971), 4-е месца ў чэмпіянаце БССР (1971). 4-разовы чэмпіён Віцебскай вобласьці (1968, 1970, 1972, 1977). 4-разовы ўладальнік Кубка Віцебскай вобласьці (1961, 1971, 1972, 1976). 6-разовы срэбраны прызэр чэмпіянату Віцебскай вобласьці (1973, 1980, 1982, 1983, 1984, 1989) и 4-разовы бронзавы (1966, 1974, 1975, 1979).
• Дасягненьні ў чэмпіянатах Беларусі: 8-е месца ў Першай лізе (1996), пераможца Другой лігі (1995).

Актуальны на 11 красавіка 2024 году

№ Пазыцыя Імя Год нараджэньня 1   Бр Андрэй Ігнатовіч (ар. Дняпро) 2003 4   Аб Станіслаў Іршаў 1998 7   ПА Аляксей Чарнадараў 2001 9   Нап Дзьмітры Ціхаміраў 1999 10   ПА Павал Расолька (капітан) 1993 11   Нап Дзьмітры Тамела (ар. Нафтан) 1992 14   Нап Аляксандар Кучараў 1995 17   ПА Арцём Антонаў 2000 18   Аб Мікіта Волчанка 2002 20   ПА Уладзіслаў Пунінскі (ар. Дняпро) 2002 21   ПА Глеб Жалезьнікаў 1997 23   ПА Арцём Ганжураў 2003 33   Бр Раман Краўчанка 2004

№ Пазыцыя Імя Год нараджэньня 46   Аб Данііл Пахомаў 2003 55   Аб Сяргей Мельнік 1995 70   ПА Павал Сушкоў 2004 77   Нап Уладзіслаў Кармішын 1995 82   Аб Віталь Шалычаў 2001 91   ПА Натан Шамсіеў 2003 —   Бр Максім Сьвістуноў 2001 —   Аб Мікіта Цюніс 2003 —   ПА Раман Куляшоў (ар. Дняпро) 2003 —   Нап Ягор Малаткоў (ар. Дняпро) 2003 —   Нап Віталь Булыга 1980 —   Нап Кантамір Сабліраў 2006

• Сяргей Вехцеў (з жніўня 2018 году)
• Вячаслаў Акшаеў (2018)
• Юры Канаплёў (2016—2017)
• Аляксандар Ладзяны (да 2015 году)

• Зьвесткі пра клюб на Football.by (рас.)
• Старонка фанатаў у LiveJournal
• Агульная статыстыка ФК «Ворша» ў чэмпіянатах Беларусі