Mga Madreng Kung Fu

An pangaran ninda naghale sa kabatiran ninda sa Tsinong arte marcial, na saindang pig'aadalan poon pa kan 2008 pakatugot kan Ika-12ng Gyalwang Drukpa sa sarong pag'ensayo para sa mga madre apesar kan siniglong pagbawal sa Budhismo nin pag'eksersays o anoman na magabat na pisikal na aktibidad para sa mga madre.

An mga madreng Drukpa bantog sa saindang aktibismo sosyal asin gibong-herak sa komunidad. Sinda namamayo sa mga gibohon sa saindang mga kumbento, magin man sa negosyo o pagpalakaw kan saindang kasararoan.

An mga Madreng Kung Fu nagpoon pagtalubo kan an Gyalwang Drukpa naghanap mga paagi na mapalakbang saindang mga oportunidad huli sa mga kaulangan na mata'wan an mga babae nin oportunidad sa edukasyon asin orog na sa pantay na pagtrato sainda sa komunidad. “Kun an babae mayo lamang oportunidad, dangan pa an mga magurang ninda paghiling sainda mga inutil," an Gyalwang Drukpa nagbuyagyag sa Global Citizen kan 2017, sa pagkampanya kontra sa epidemya nin human trafficking na naglakop sa ronang Himalayan. "[Sabi ninda,] "Igwa akong aking babae, kaya ini ipapabakal ko."

Sa pagsoong sa pirang siglong tradisyon nin Budhismo, an Gyalwang Drukpa nagkontrata nin sarong Vietnamese kung fu master asin sampolong mga madre kan 2008 ngarig tukdoan sinda kan kabatiran sa kung fu asin nganing mapataas an mga pagtubod-sa-sadiri kan mga madre. Sinda regular na naehersisyo asin dakul sainda may bitbit nang black belt. Si Jigme Yanching Kamu, madre poon pa kan siya edad 10, naghayag sa Great Big Story kan CNN kan summer nin 2019, na an 'Kung Fu' "nadidisiplina samuyang isip sa tamang paghorop-horop."

 

Gabos na madre may saro sanang pangenot na pangaran, Jigme, na ini Tibetanong boot sabihon "an daing pagkatakot." An mga madre tinutukdoan pagtsuper, pagpanganan sa pagpangadye, asin iba pang praktikal na adal– arog kan pagtutubero, pagmakinilya, pagbisikleta, pagkana nin mga solar panel asin pagtaram nin Ingles. Kan 2010, sinda mismo an nagpakarhay kan tinampo pasiring sa Bukid Druk Amitabha nin ikaduwang beses na, saka ngani pa pagsirbe bako sana sa kumbento kundi sa tinugdok-kan-Live to Love na klinika sa mata sa baryo nin Ramkot.

Pakalinog kan 2015, an kumbento biyo na narugba' siring kan nangyari sa kahiwasan kan Kathmandu Valley. An mga madre naghihihiray mga solar panel, naglatag mga bagong baldosa sa natad, asin nagpatindog liwat kan nagabang pader manta sige pa an byahe sa mga hararayong lugar sa pagtabang sa mga taga-baryong nagsapo nin makuring destroso.

An orden igwa nang kaapil na mga 800 na madre, nag'eedad 8 abot 80, nag'eestar sa apat na kumbento:

• Druk Gawa Khilwa, Kathmandu, sa Druk Amitabha Mountain, iyo anmjyor na training center asin sa presente, an kwartel administratibo kan gabos na kumbento sa Himalayas
• Druk Gawa Khilwa, Kortsa, namumugtak sa sarong taway na bukid-bukidon na lugar sa Ladakh, -- an mayor na sentro nin retreat kan mga madre
• Druk Gawa Khilwa, Shey, Ladakh, na nag'oolkupar kan Palasyong Naropa (Naro Phodrang) sa laog kan kampus kan Druk White Lotus School (misdbid man bilang Druk Padma Karpo Institute), -- saro sa sentro nin pag'ehersisyo sa pagsuporta sa mga tagaduman asin sa mga aking estudyante sa saindang espiritwal na pagtalubo
• Druk Gawa Khilwa, Lahaul, saro man na sentro sa espiritwal na pagtalubo kan mga tagaduman