Kirpi Sonik: oyunlarının xəyali qəhrəmanı

Onun əsl adı – Kirpi Ocilvi Moris (オグルヴィモーリスザヘッジホッグ, Oguruvu Imōrisu za Hejjihoggu^?, ing. Ogilvie Maurice the Hedgehog).

Kirpi Sonik
yap. ソニック・ザ・ヘッジホッグ ing. Sonic the Hedgehog
"Sonic the Hedgehog" personajı
2019-cu ildəki Kirpi Sonik dizaynı ("Team Sonic Racing" videooyunu).
İlk görünmə	"Rad Mobile" (kameo, 1991) "Sonic the Hedgehog" (1991)
Yaradan	Yuci Naka Naoto Oşima Hirokazu Yasuhara Yuci Uekava
Səsləndirən
Yaş	15
Boy	100 santimetr (3.3 ft)
Çəki	35 kiloqram (77 funt)
Rəngi	Göy
Göz	Yaşıl (orijinalı qara)
Məlumat
Tam adı	Kirpi Ocilvi Moris (ing. Ogilvie Maurice the Hedgehog)
Ləqəb(lər)i	Böyük göy (ing. Big Blue) Göy ləkə (ing. Blue Blur) Göy hoqqabaz (ing. Blue Buffoon) Göy kirpi (ing. Blue Hedgehog) Göy siçan (ing. Blue Rat) Göy külək (ing. Blue Wind) Saxtaçı (ing. Faker) İblisi oyandıran (ing. Iblis Trigger) Kiçik göy xilaskar (ing. Little Blue Savior) Kirpi Neyv (ing. Knave the Hedgehog) Müasir Sonik (ing. Modern Sonic) Nişan yastığı (ing. Pin cushion) Külək cəngavəri Ser Sonik (ing. Sir Sonic, Knight of the Wind) Külək şeytanı (ing. Speed Demon) Canlı olan ən sürətli şey (ing. The Fastest Thing Alive) Əfsanəvi göy kirpi (ing. The Legendary Blue Hedgehog) Dünyanın ən sürətli kirpisi (ing. World's Fastest Hedgehog)
Növü	Kirpi
Cinsi	Kişi
Ailə	Kirpi Culs (atası) Kraliça Kirpi Alina (anası) Kirpi Çarlz (babası) Kirpi Menik (qardaşı) Kirpi Sonya (bacısı) Emi Rouz (sevgilisi) Kirpi Menik (oğlu)
Bacarıqlar	Super sürət Gücləndirilmiş dözümülük Gücləndirilmiş akrobatik hərəkətlər və reflekslər Gücləndirilmiş fiziki güc Gücləndirilmiş tullanma Gücləndirilmiş çeviklik Gücləndirilmiş davamlılıq Əlbəyaxa döyüş Qılıncoynatma Təyyarəni idarə etmə Transformasiya

Sonik səsdən sürətli bir şəkildə qaça və əsasən düşmənlərə hücum etmək üçün top formasına burula bilən göy rəngli antropomorfik bir kirpidir. Buna görə o, Sonik (ソニック, Sonikku^?, ing. Sonic); mənası – azərb. Səs sürəti‎) adlanır. Sonik oyunların əksəriyyətində səviyyələri müəyyən bir vaxt çərçivəsində bitirməli, eyni zamanda power-up halqalarını götürməli və maneələrdən, eləcə də düşmənlərdən qaçınmalıdır. Onun əsas antaqonisti – Doktor Eqqman dünyanı fəth etmək və «Eqqmanlend» imperiyasını qurmaq istəyir.

Kirpi Sonikin yaradımasında "Sega" şirkətindəki bir çox şəxsin səyi olsa da, proqramçı Yuci Naka və rəssam Naoto Oşima personajların əsas müəllifləri hesab edilirlər. Orijinal "Sonic the Hedgehog" videooyunu "Sega" şirkətini "Nintendo" şirkətinin flaqman personajı olan Marionun rəqibi olacaq və Aleks Kidd (ing. Alex Kidd) personajını əvəzləyəcək bir talisman ilə təmin etmək üçün 1991-ci ilin iyun ayında satışa çıxarılmışdır. Kirpi Sonik "Sonic Adventure" (1998) videooyunu üçün Yuci Uekava tərəfindən yenidən dizayn edilmişdir. Bu dizayn dəyişikliyi ilə Kirpi Sonik daha yetkin bir xarici görünüş əldə etmişdir.

Kirpi Sonik dünyanın ən tanınmış videooyun personajlarından birinə çevrilmişdir. 2014-cü ilin noyabr ayında əldə edilən statistik məlumatlara əsasən, onun şərəfinə adlanan videooyunlar cəmi 150.000.000 nüsxə satmışdır. 2005-ci ildə Kirpi Sonik, Mario və Link Oyun xiyabanına əlavə edilən ilk videooyun personajları idi. Videooyunlara əlavə olaraq, o, komikslər, kitablar, cizgi filmlər və bir anime filminin protaqonistidir.

 

Kirpi Sonikin əsl yaşı, çəkisi, boyu və dizaynı kimi fiziki əlamətləri vaxtilə dəyişmişdir. Orijinal olaraq, videooyunlarda Naoto Oşimanın hazırladığı dizayndan istifadə edirdi. Bu dizaynda kirpinin xarici görünüşü "uşaq" kimi idi. Onun iynələri qısa, bədəni dairəvi və göz qişası yox idi. 1998-ci ildə "Sonic Adventure" videooyununun satışa çıxarılmasıyla Kirpi Sonikin imici Yuci Uekava tərəfindən yenidən işlənmişdir. Onun dizaynı ilə personaja uzun ayaqlar və daha az dairəvi olan bir bədən verilmişdir. Bu isə onu daha hündür görsənməyinə səbəb olmuşdur. Buna əlavə olaraq, Kirpi Sonikin iynələrinin uzunluğu artırılmış, göz qişası isə yaşıl rəngdə verilmişdir. Bundan başqa 2006-cı ildə "Sonic the Hedgehog" videooyununun satışa çıxarılmasıyla personajın xarici görünüşünə dəyişikiklər əlavə edilmişdir. O daha arıq və uzun olmuş, iynələri və xəzi isə daha açıq bir rəngdə verilmişdir. Dizaynların bütün variantlarında Sonik üzərində ağ rəngli bir halqa olan bir cüt qırmızı rəngli altı rezin ayaqqabı və ağ rəngli bir əlcək geyinir. Sonikin komikslər və cizgi filmlər kimi adaptasiyalarında videooyunlarda nümayiş edilən dizaynlardan istifadə edilmişdir. Hal-hazırda personajın boyu – 100 santimetr (3.3 ft), çəkisi isə – 35 kiloqram (77 funt).

"Archie Comics" publikasiyası tərəfindən nəşr edilən komikslərin süjetlərinə əsasən, Sonik uydurma Mobius planetində, Kirpi Culs və Kirpi Bernadettin ailəsində anadan olmuşdur. İlk vaxtlarda onun xəzinin rəngi qəhvəyi idi. Bir gün, Kirpi Sonik Doktor Ovi Kintoborun (オビキントボール博士, Dokutā Obi Kintobōru^?, ing. Doctor Ovi Kintobor) gizli yeraltı laboratoriyasını kəşf edir. O, Xaos Zümrüdləri adlanan sehrli daşların köməyi ilə planeti pisniyyətli varlıqlardan qorumaq istəyirdi. Kintobor və Sonik çox keçmədən dostlaşırlar. Kintoborun xüsusi qaçış xalçası ilə Sonik qaçış sürətini artırır və bir gün o, səs sürətindən daha sürətli olur. Buna görə də onun xəzinin rəngi göy olur. Bu hadisədən bir gün sonra Kintoboru pisniyyətli Doktor Ayvo Robotnik (ドクター・ロボトニック, Dokutā Robotonikku^?, ing. Doctor Ivo Robotnik) adlı pisniyyətli bir alimə çevirən bir hadisə gerçəkləşir. Onun arzusu bütün Mobiusun hökmdarı olmaq idi.

Sonik ən sürətli videooyun personajıdır. O, özünün qurduğu qaydalar ilə yaşayır, azadlıq və macəraları sevir, kiminsə ona təzyiq göstərməsindən nifrət edir. Sakin bir təbiətə malik olmasına baxmayaraq, Sonik hadisələr yavaşca inkişaf edəndə bədhövsələliklə və səbirsizcəsinə davranır. Kirpi Sonik həmişə öz planlarını əvvəlcədən hazırlayır və tapşırıqlarını riskli bir addım atmaqdan qorxmayaraq yerinə yetirir. Buna görə də dostları ona hörmət edir. Onun yaxın dostu və yoldaşı – Tülkü Teylz (テイルス, Teirusu^?, ing. Tails). O, baş qəhrəmana həmişə kömək edir. Sonikin digər ən yaxın dostu – Yexidna Naklz (ナックルズ・ザ・エキドゥナ, Nakkuruzu za Ekiduna^?, ing. Knuckles the Echidna). Yexidna Naklzın sərt və ciddi təbiətinə görə bu dostluq bəzən rəqabətə çevrilir. Kirpi Emi Rouz (エミー・ローズ, Emī Rōzu^?, ing. Amy Rose) Kirpi Sonikə aşiqdir, fəqət Kirpi Sonik Emi Rouzun hisslərindən utandığına və qorxduğuna görə ona qarşılıqlı bir cavab vermir. Bütün videooyunların, komikslərin və cizgi filmlərin süjetlərində Kirpi Sonikin əsas düşməni – Doktor Eqqman (ドクター・エッグマン, Dokutā Egguman^?, ing. Doctor Eggman). O tez-tez döyüşçü robotlar və dünyanı fəth etmək barədə planlar hazırlayır, amma baş qəhrəman hər kəsi alimin pis niyyətlərindən xilas edir.

Videooyunlarda Kirpi Sonik düşmənlərini məğlub etmək üçün hündürə tullana və top formasına burula bilir. "Spin dash" üsulundan istifadə edərək Kirpi Sonik əvvəl yerində sürətlənərək rəqiblərinə hücum etmək üçün top formasına burulur və yüksək sürətlə irəliləyir. "Homing attack" üsulu ilə o, düşmənlərinə hündürə tullanaraq hücum edir. O, üzə bilmədiyindən suyu xoşlamır. Kirpi Sonik personajı üçün böyük bir əhəmiyyət daşıyan qızıl halqalar onu düşmənə qarşı müdafiə edir. Xaos Zümrüdlərinin hamısı topladıqdan sonra baş qəhrəman öz super-forması olan Super Sonikə çevrilir. Bu formada ikən onun xəzinin rəngi sarı, gözünü rəngi qırmızı olur və onun iynələri dik durur.

Videooyunlarda

Kirpi Sonik videooyun personajı olaraq ilk dəfə 1991-ci ilin fevral ayında Yaponiyada satışa çıxarılan "Rad Mobile" videooyununda kameo olaraq nümayiş olunmuşdur. Bundan sonra o, ona həsr olunmuş eyniadlı videooyunda nümayiş olunmuşdur ki, bu videooyun 1991-ci ilin iyun ayında Mega Drive/Genesis konsolu üçün satışa çıxarılmışdır. Bu epizodda Kirpi Sonik və baş düşməni Doktor Eqqman ilk dəfə qarşı-qarşıya idilər. İlk epizodda Kirpi Sonik antaqonist və robotları ilə tək başına vuruşur, ancaq "Sonic the Hedgehog 2" videooyununda Kirpi Sonikin yardımına Tülkü Teylz gəlir. "Sonic CD" videooyununda baş qəhrəman Emi Rouzla tanış olur. "Sonic the Hedgehog 3" və "Sonic & Knuckles" videooyunlarında Kirpi Sonik düşmənlərlə Yexidna Naklzla birlikdə vuruşur və onunla dostlaşır. Əsas süjet xəttinin davamı olan "Sonic the Hedgehog 4: Episode I" videooyununda Kirpi Sonik yenə tək başına olur, ancaq oyunun ikinci hissəsi olan "Sonic the Hedgehog 4: Episode II" videooyununda Tülkü Teylz ona qoşulur. Bu videooyunlar "Sonic the Hedgehog" seriyasının əsas epizodlarıdırlar. Kirpi Sonik 1991-ci ildə satışa çıxarılan "Sonic the Hedgehog" videooyununun 8-bit versiyasından başlayaraq "Sonic the Hedgehog" seriyasının bütün epizodlarında nümayiş olunur.

"Sonic Adventure" videooyunu "Sonic the Hedgehog" seriyasının ilk əsas epizodudur. Bu videooyun seriyanın üçölçülü qrafikalardan istifadə edən ilk epizodudur. Videooyunun süjetində Kirpi Sonik və dostları Doktor Eqqman tərəfindən Əsas Xaos Zümrüdündən sərbəst buraxılmış Xaos bədheybəti ilə vuruşmalı olurlar. Pisniyyətli alim onu özündən asılı vəziyyətə salmaq istəyir ki, onun dağıdıcı gücündən istifadə edərək bütün Xaos Zümrüdləri toplasın və Vağzal meydanını (Station Square) ələ keçirsin. Oyunun xronoloji davamı olan "Sonic Adventure 2" videooyununda Kirpi Sonik və Doktor Eqqman dünyanı qlobal və militarist bir təşkilat olan Millətlərin Keşikçi Vahidlərindən (abr. MKV; ing. Guardian Units of Nations, abr. G.U.N.) xilas etmək üçün çiyin-çiyinə vuruşurlar. Buna baxmayaraq, seriyanın növbəti epizodu olan "Sonic Heroes" videooyununda Doktor Eqqman yenə də dünyanı fəth etmək arzusunda olur, Kirpi Sonik və dostları isə onun bu arzularını gerçəkləşdirməyinə imkan vermir. 2006-cı ildə satışa çıxarılan "Sonic the Hedgehog" videooyununda protaqonist Soleanna şəhərinin şahzadəsini xilas edir. O, "Sonic Unleashed" videooyununda Dark Qayya (Dark Gaia) tərəfindən məhv edilən planeti bərpasında iştirak edir. "Sonic Colors" videooyununda Kirpi Sonik kosmos mövzulu bir əyləncə mərkəzində olarkən visplər olaraq bilinən kiçik məxluqları xilas edir. "Sonic Generations" videooyununda Kirpi Sonik özünün "klassik" versiyası ilə tanış olur. "Sonic Lost World" videooyununun əsas süjeti Unudulmuş Heks (Lost Hex) adlı uydurma bir planetdə cərəyan edir. Burada Kirpi Sonik Ölümcül Altılıq (Deadly Six) adlı məxluqlardan ibarət bir qrup ilə üz-üzə gəlir.

Kirpi Sonik "Sonic the Hedgehog" seriyasının əsas epizodlarına əlavə olaraq, avtosimulyator, faytinq, Yaponiya rol oyunu janrlarında hazırlanmış videooyunlarda da nümayiş olunub. "Sonic Storybook" adlı ayrı bir videooyun seriyası var. Bu seriyanın epizodlarının əsas süjetləri "Min bir gecə" nağılları və "Kral Artur" əfsanəsinin dünyalarında cərəyan edir. "Dr. Robotnik’s Mean Bean Machine", "Knuckles’ Chaotix", "Tails’ Skypatrol", "Tails Adventure" və "Shadow the Hedgehog" kimi videooyunlar seriyanın personajlarına həsr olunublar. Bu epizodlarda Kirpi Sonik əsas süjetdə ya heç nümayiş olunmayıb, ya da ki, əsasən kameo formasında nümayiş olunub. Kirpi Sonik başqa videooyun seriyalarında da nümayiş olunub. "Nights into Dreams…" videooyununun "Christmas Nights into Dreams" buraxılışıda oyunçular Kirpi Soniki idarə edərək Doktor Eqqmanla vuruşa bilərlər. "Samba de Amigo" videooyununda oyunçular məşhur "Green Hill" səviyyəsində ritmlə rəqs edə bilərlər. Personaj "Super Smash Bros. Brawl" krossoverlərində də nümayiş olunub. Əlavə olaraq, Kirpi Sonik "Sega Superstars" və "Mario & Sonic" videooyun seriyalarının bütün epizodlarında protaqonist kimi nümayiş olunub.

Animasiyalarda

 

Kirpi Sonik personajına həsr olunmuş ilk üç cizgi serial hal-hazırda müflisləşmiş olan "DiC Entertainment" beynəlxalq kino və telelviziya istehsal şirkəti tərəfindən hazırlanmışdır. Bu cizgi seriallarının birincisi olan "Kirpi Sonikin macəraları" cizgi serialının premyerası 1993-cü ildə gerçəkləşmişdir. Cizgi serialın epizodlarının süjetləri pisniyyətli alim Ayvo Robotnik və onun robotlarına qarşı çıxan Kirpi Sonik və dostu Tülkü Teylzin macəralarından bəhs edir. Həmin il Kirpi Sonikə həsr olunmuş başqa bir cizgi serial olan "Kirpi Sonik" yayımlanmağa başlamışdır. Bu cizgi serialların ikisinin də süjetləri Mobius planetində cərəyan edir. Alim Ayvo Robotnik Mobotropolis şəhərinə daxil olur və robotlardan ibarət ordusunun köməyi ilə oranı ələ keçirir. Şəhərin bütün sakinləri ona tabe olur, ancaq şəhərdən qaçanlar Doktor Eqqmanı devirmək üçün Azadlıq Döyüşçüləri (ing. Freedom Fighters) qrupunu təsis edirlər. Kirpi Sonik də bu qrupun bir üzvü olur. Üçüncü cizgi serial olan "Sonik Anderqraund" 1999-cu ildə yayımlanmağa başlamışdır. Cizgi serial Kirpi Sonikin, eləcə də onun bacısı Kirpi Sonya və qardaşı Kirpi Menikin macəralarından bəhs edirdi.

Yaponiya studiyaları da Kirpi Soniklə əlaqədar bir neçə layihələr üzərində işləyiblər. 1996-cı ildə tammetrajlı anime filmi olan "Sonic the Hedgehog: The Movie" OVA-sının premyerası gerçəkləşmişdir. 1999-cu ilin sentyabr ayında bu OVA ABŞ-də "ADV Films" tərəfindən lisenziyalaşdırılmışdır. Əlavə olaraq, 2003-cü ildən 2004-cü ilə qədər 78 epizodluq "Sonic X" serialı yayımlanmışdır. "TMS Entertainment" tərəfindən hazırlanmış bu anime serialı "Sonic the Hedgehog" videooyun seriyasının epizodlarına əsaslanırdı. Yaponiya hazırlanmış və personaja həsr olunmuş ən son animasiya qısametrajlı "Sonic: Night of the Werehog" idi. 2006-cı ildə satışa çıxarılan "Sonic Unleashed" videooyununa əsaslanan bu cizgi filmdə Sonik və yeni dostu Çip (チップ, Chippu^?, ing. Chip) ruhların tez-tez baş çəkdiyi bir evdə qalırlar.

2014-cü ildə "Sonik Bum" adlı bir cizgi serialının premyerası reallaşmışdır. Burada süjet xətti "Sonic the Hedgehog" videooyun seriyasından fərqli bir kainatda, alternativ bir kainatda cərəyan edir. Cizgi serialın hər bir epizosu Kirpi Sonik, Tülkü Teylz, Yexidna Naklz, Emi Rouz və Porsuq Stiksin iştirakı ilə fərqli bir hekayədən bəhs edirdi. Bu personajlar hər bir epizodda Doktor Eqqmanın pisniyyətli planlarına qarşı çıxırlar.

Kirpi Sonik premyerası 2012-ci ildə gerçəkləşən "Dağıdıcı Ralf" və onun davamı "Ralf interneti qırır" "Disney" filmindəki personajlardan biri idi. Bu filmə əlavə olaraq, o, "Simpsonlar" cizgi serialının bir neçə seriyasında epizodik rol oynamışdır.

10 iyun 2014-cü ildə "Sonic the Hedgehog" videooyun seriyasına əsaslanan eyniadlı bir filmin çəkiləcəyi açıqlanmışdır. Film Ceff Foulerin rejissorluğu, Evan Sasser, Van Robişo, Patrik Keysi, Coş Miller və Oren Uzielin ssenaristliyi, Nil Moritsin prodüserliyi, Takeşi İtonun, Miye Onişi və Tobi Aşerin icraçı prodüserliyi ilə "Original Film" studiyası tərəfindən çəkilir. Filmin istehsalında "Paramount Animation", "Original Film", "Sega", "Blur Studio" və "Marza Animation Planet" birlikdə iştirak edirlər. Filmdə Kirpi Sonik personajını Ben Şvarts səsləndirir. Filmin premyerası 8 noyabr 2019-cu il tarixində gerçəkləşəcək.

Çap məhsullarında

 

1993-cü ildən 2002-ci ilə qədər Böyük Britaniya nəşrçisi "Fleetway Editions" tərəfindən "Sonic the Comic" adlı komiks seriyası nəşr edilmişdir. Komiks seriyasının süjetinə əsasən, Mobius planetində bir hadisə baş verir və bu hadisə nəticəsində alim Kintobor pisniyyətli Doktor Ayvo Robotnikə çevrilir. Bu hadisədən sonra o, robotlardan ibarət bir ordu hazırlayır və onların dəstəyi ilə bütün planeti fəth edir. Kirpi Sonik və dostları Doktor Eqqmanı devirmək üçün Azadlıq döyüşçüləri (ing. Freedom Fighters) adlı bir qrup təsis edir. 2003-cü ilin may ayında komiks seriyasının "Sonic the Comic Online!" adlı qeyri-rəsmi bir sikvelin ilk nömrəsi yayımlanmışdır. Bu komiks seriyası orijinal komikslərin azarkeşləri tərəfindən hazırlanırdı və internetdə yayımlanırdı. Orijinal komikslərin bəzi rəssam və yazıçıları da bu layihədə iştirak etmişdir.

1993-cü ildən 2017-ci ilə qədər ABŞ nəşrçisi "Archie Comics" tərəfindən "Sonic the Hedgehog" adlı komiks jurnalları nəşr edilmişdir. "Sonic the Comic" komiks seriyasında olduğu kimi burada da baş qəhrəman Kirpi Sonik Azadlıq döyüşçülərinin (ing. Freedom Fighters) rəhbəridir. Orijinal süjet xəttlərinə əlavə olaraq, bu komikslərdəki hekayələr "Sonic the Hedgehog" seriyasının bir parçası olan videooyun və cizgi filmlərdən bəzi süjet elementlərini də mənimsəmişdir. 2008-ci ildə "Archie Comics" tərəfindən nəşr edilən bu komiks jurnalları "bir videooyunun təməlində yaradılmış ən uzun komiks seriyası" olaraq Ginnesin Rekordlar Kitabının videooyun buraxılışına girmişdir. Müxtəlif vaxtlarda "Archie Comics" qrafik romanlar da nəşr etmişdir. Bunlar: "Knuckles the Echidna", "Sonic X" və "Sonic Universe".

1993-cü ildə Böyük Britaniya nəşrçisi "Virgin Publishing" tərəfindən Kirpi Sonikə həsr olunmuş dörd roman nəşr olunmuşdur. Bu romanlar "Sonic the Comic" komiks seriyasının süjetindən əvvəl baş vermiş hadisələrdən bəhs edir. 1987-ci ildə satışa çıxarılmış orijinal "Final Fantasy" videooyununun ssenaristi Kenci Terada və rəssam Sanqa Norimoto Kirpi bir manqa yaratmışdır ki, burada Kirpi Sonikə çevrilə bilən Niki Parlauser adlı başqa bir kirpidən bəhs edilir. 1992-ci ildən 1993-cü ilə qədər bu manqaya əsaslanan "Shogaku Ninensei" adlı bir elmi komiks kitabı da nəşr edilmişdir. Bu komiks "Shogakukan no Gakushuuzasshi" jurnalının bir hissəsi idi. Manqanın süjetinə görə, Kirpi Nikki anası Brenda, atası Poli və bacısı Anita ilə birlikdə bir evdə yaşayır. Dəcəl Anton Beruka onun bacısını oğurlayır. Kirpi Niki bacısını xilas etməyə çalışsa da dəcəl onu yerə yığır və oradan qaçır. Əsəbiləşmiş Kirpi Niki öz zəifliyinə görə gileylənir, amma gözlənilməz bir halda Kirpi Sonikə çevrilir və bacısını xilas edir.

 

1990-cı ilin aprel ayında "Sega" "AM8" komandasından "Nintento" şirkətinin "Mario" videooyun seriyasıyla rəqabət apara biləcək bir videooyun hazırlamağı tapşırdı. Bu komanda ilk vaxtlarda sadəcə yeddi nəfərdən ibarət idi və daha sonra "Sonic Team" adlandırılmışdır. Əlavə olaraq, "Sega" şirkəti komandadan şirkətin talismanı olan Aleks Kiddi əvəzləyəcək bir personaj yaratmaqlarını da istəmişdi. Şirkətin idarə heyəti Mikki Maus kimi məşhur bir personaj görmək istəyirdilər. Rəssamlar gələcək talisman üçün müxtəlif konsepsiyalar hazırlamışdılar. Onlar arasında uça bilən bir sincab, dövşan, armadil, kirpi, ABŞ Prezidenti Teodor Ruzveltin bir oxşarı və başqaları var idi. Axırda, istehsalçılar Naoto Oşima tərəfindən dizayn edilmiş Mister Harinecumi (ミスターハリネズミ, Misutā Harinezumi^?, azərb. Mister Kirpi‎)); ABŞ və Avropada Mister Nidlmaus, ing. Mister Needlemouse) adlı bir kirpini seçdilər. Müəlliflər daha sonra onun adını Kirpi Sonik olaraq dəyişdirdilər. Naoto Oşima personajın imicini hazırlayarkən Pişik Feliks və Mikki Mausdan ilhamlanmışdı. Personajın xəzinin rəngi "Sega" şirkətinin loqotipinin əsas rənginin şərəfinə götürülmüşdü. Kirpi Sonikin ayaqqabıları Maykl Ceksonun ayaqqabılarına bənzər bir şəkildə çəkilmişdi. Onun ayaqqabılarındakı qırmızı rəng Şaxta Babanın geyiminin rəngindən və Maykl Ceksonun "Bad" adlı sinqlının rənginin əksindən götürülmüşdü. Personajın xasiyyəti gələcək ABŞ Prezidenti Bill Klintonun optimist rəftarından bəhs edən bir raporta əsaslanmışdı.

Proqramçı Yuci Naka "Sonic the Hedgehog" videooyununu yaradarkən boruda hərəkəti asanlaşdıran bir alqoritm hazırlamışdır. Bu alqoritmə görə Naoto Oşima və geymdizayner Hirokazu Yasuhara personajın xarici görünüşünə bəzi kiçik dəyişikliklər əlavə etmişdi. Əlavə olaraq, "AM8" komandasının üzvləri Kirpi Sonikin sürətli olmasını istəyirdilər. Bununla onlar səviyyələri sürətli bir şəkildə bitirmək istəyən təcrübəli oyunçuları özlərinə cəlb edəcəkdilər. Yaradılan personajın üzgüçülük bacarıqları yox idi. Buna görə də o, suya düşdüyü anda ölürdü. Buna səbəb Yuci Nakanın kirpilərin real həyatda suda hərəkət edə bilmədiklərinə inanması idi.

Videooyunun musiqisi "Dreams Come True" pop musiqi qrupunun üzvü Masato Nakamura tərəfindən bəstələnmişdi. Kirpi Sonik personajının şəkli bu qrupun növbəti qastrol səfəri zamanı avtobuslarında və afişalarında verilmişdi, ancaq bu dizayn "Sega" tərəfindən təsdiqlənməmişdi. Hərçənd, Kirpi Sonikin dişləri iti olacaqdı və köpək dişinə bənzəyəcəkdi, lakin dizaynerlər Kirpi Sonikin xarici görünüşünü daha mehribancasına dizayn etməli idilər ki, personaj qərb bazarının ənənələrinə uyğun gəlsin. İstehsalçılar oyunda Madonna (マドンナ, Madon'na^?) adlı bir qız baş qəhrəman və bir rok qrupu əlavə etmək istəyirdilər, ancaq "Sega" şirkətinin ABŞ qolunu təzyiqi ilə bu fikirlərdən imtina edildi. İstehsal komandasından mənfi reaksiya almasına baxmayaraq, Yuci Naka lokalizatorların səyi nəticəsində edilən dəyişiklikləri dəstəkləmişdir. Onun dediyinə görə, bu dəyişikliklər seriyanın xeyrinə olmuşdur. O həmçinin, Kirpi Sonik və Doktor Ayvo Robotnik arasında olan düşmənçiliyin təbiətin texnologiyanın inkişafı ilən olan mübarizəsini təmsil etdiyini bildirmişdir.

Səs aktyoru

Rocer Kreyq Smit — 2010-cu ildən bəri ingilisdilli medialarda personajın səs aktyoru.		Ben Şvarts — 2019-cu ildə yayımlanacaq "Kirpi Sonik" filmində personajın səs aktyoru.

Kirpi Sonik personajı ilk dəfə "SegaSonic the Hedgehog" və "Sonic the Hedgehog CD" videooyunlarında səsləndirilmişdir. Bu videooyunlarda onun səs aktyoru müvafiq olaraq, Takeşi Kusao və Keyko Utoku olmuşdur. "Kirpi Sonikin macəraları", "Kirpi Sonik" və "Sonik Anderqraund" cizgi seriallarında personajın səs aktyoru Cəlil Vayt olmuşdur. 1996-cı ildə Yaponiyada personaja həsr olunmuş tammetrajlı bir OVA-nın premyerası gerçəkləşmişdir ki, bu OVA-da personajı Masami Kikuçi səsləndirmişdir. Üç il sonra OVA-nın ABŞ-də premyerası gerçəkləşdirmiş ki, OVA-nın bu versiyasında personajın səs aktyoru Martin Börk olmuşdur.

1998-ci ildə satışa çıxarılmış "Sonic Adventure" videooyunundan başlayaraq personajı yapondilli medialarda Cuniçi Kanemaru səsləndirir. O, "Sonic X" anime serialında da personajı səsləndirmişdir. Buna baxayaraq, "Sonic Unleashed" videooyununun bir epizodunda Kirpi Sonik qulyabanıya çevrilir və bu zaman personaj Tomokacu Seki tərəfindən səsləndirilir.

Videooyunlarda personajı ingilis dilində orijinal olaraq, Rayan Drammond səsləndirirdi, fəqət "Sonic X" anime serialını ABŞ-də yayımlamaq hüququnu satın alan "4Kids Entertainment" Kirpi Sonikin səs aktyoru olaraq Ceyson Qriffiti işə almışdır. Buna baxmayaraq, Drammond 2005-ci ilə qədər personajı videooyunların ingilis dilindəki buraxılışlarında səsləndirməyə davam etmişdir. 2005-ci ildə "Sega" şirkəti bütün "Sonic the Hedgehog" personajlarının səs aktyorlarını "4Kids TV" telekanalındakı səs aktyorları ilə dəyişdirmişdir. 2010-cu ildə "Sega" şirkəti "4Kids TV" ilə olan müqaviləsini yeniləməmiş və "Studiopolis" ilə əməkdaşlıq etməyə başlamışdır. 2010-cu ildə satışa çıxarılan "Sonic Free Riders" videooyunundan başlayaraq personajı ingilisdilli medialarda Rocer Kreyq Smit səsləndirir. 2019-cu ildə yayımlanacaq "Kirpi Sonik" filmində personajı Ben Şvarts səsləndirəcək.

"Sonic Generations" videooyundan başlayaraq, Kirpi Sonik yapon və ingilis dillərinə əlavə olaraq, fransız (Aleksandr Jilet), alman (Mark Staxel), italyan (Renato Novara), portuqal (Manolu Rey) və ispan (Yonatan Lopez) dillərində də səsləndirilir.

 

Kirpi Sonikin "Sega" şirkətinin talismanı olması personajın dördüncü nəsil videooyun konsollarında əldə etdiyi müvəfəqiyyətin və dünyanın ən məşhur videooyun personajlarından biri olmasının başlıca səbəblərindən biridir. "Sonikin tarixi: Bir ikonanın doğulması" sənədli filmində şirkətin "Sega Technical Institute" diviziyasının dizayneri Piter Moravik 1990-cu illərin uşaqlarının Kirpi Sonik barədə Mario və Mikki Mausdan daha çox məlumat aldığını demişdir. Kirpi Sonik xarici görünüşü və sürətli qaçmaq bacarığı ilə bütün dünyada şöhrət əldə etmişdir. Nümunə olaraq, "Electronic Gaming Monthly" jurnalının bir mütəxəssisi ilk "Sonic the Hedgehog" videooyununu gözdən keçirərəkən personajın sürətini "Ulduz yolu" franşizasındakı "Enterprayz NCC-1701" kosmos gəmisi ilə müqayisə etmişdir. Keçmiş "Sega" meneceri Ken Balounun dediyinə görə, "Sonic the Hedgehog" franşizası oyunçular sürətli bir platformer haqqında olan düşüncələrinin məhdudiyyətlərini məhv etmişdir. Buna baxmayaraq, "Sega" talismanının iştirak etdiyi növbəti layihələrdə istehsalçıların mütəmadi olaraq, üçölçülü qrafikalardan istifadə etməsi tez-tez tənqid olunmuşdur. Tənqidçilər Kirpi Sonikin yaradıcılığa fasilə verilməsinin lazımi olduğunu düşünürlər. Onların fikirlərinə görə istehsalçılar onu ya yeganə oynanıla bilən personaj olaraq saxlamalı, ya da ki, onu "tez bir ölüm" ilə təmin etməlidirlər.

Personajın xarici görünüşü "Sega" şirkətinin sponsorluq etdiyi bir neçə tədbirin də simvolu olmuşdur. 1994-cü ildən 1997-ci ilə qədər "Sega" "CEF Yunayted İtixara Tiba" futbol klubuna sponsorluq etmişdir ki, bu dövrdə komanda heyətinin üzvləri üzərində Kirpi Sonikin rəsmi olan bir forma geyinirdilər. 1993-cü ildə keçirilən Formula 1 çempionatıda "Sega" şirkəti "Vilyams" komandasına sponsorluq etmişdir. Bu komandanın sürücüsü Alen Prost həmin çempionatın qalibi olmuşdur. Kirpi Sonik personajı komandanın yarış avtomobillərində və sürücü kaskalarında təsvir olunurdu. Kirpi Sonik 1993 Avropa Qran prisi zamanı reklam şarlarında və lövhələrində təsvir olunmuşdur.

1993-cü ildə Kirpi Sonik "Macy's" univermaqının təşkil ediyi Şükran günü paradında nümayiş olunan ilk videooyun personajı olmuşdur. Kirpi Soniki təsvir edən aerostat 2011-ci, 2012-ci və 2013-cü illərdə yenidən nümayiş olunmuşdur. Kirpi Sonik həmçinin, Qızılgül paradında nümayiş oluann ilk videooyun personajıdır ki, o, paradda ilk dəfə 1996-cı ildə nümayiş olunmuşdur. 2004-cü ildə personaj Qızıl Coystik mükafatlarında "Ən yaxşı personaj" mükafatına layiq görülmüşdür. 2005-ci ildə Kirpi Sonik, Mario və Link Oyun xiyabanına əlavə edilən ilk videooyun personajları idilər. Əlavə olaraq, SHH (Sonic Hedgehog homolog) zülalı Kirpi Sonik personajının şərəfinə adlandırılmışdır.

2008-ci ildə Böyük Britaniyada 500 nəfər arasında "ən məşhur videooyun personajı" sualı üzrə keçirilən sorğuda Kirpi Sonik səslərin 24%-i ilə birinci, rəqibi Mario isə səslərin 21%-i ilə ikinci olmuşdur. 2008-ci ilin axırlarında "MSN" tərəfindən "ən tanınmış videooyun personajı" sualı üzrə keçirilən sorğuda Kirpi Sonik birinci yeri tutmuşdur. 2010-cu ildə "Nintendo Power" jurnalının redaktorları özlərinin ən sevimli altıncı personajı adlandırmışdır. Ginnesin Rekordlar Kitabının 2011-ci ildə nəşr edilmiş buraxılışında verilən "ən yaxşı 50 videooyun personajı" başlıqlı siyahıda Kirpi Sonik 10-cu yeri tutmuşdur.

"GameDaily" tərəfindən hazırlanan "ən yaxşı 10 Super Smash Bros. Brawl personajı" siyahısında 9-cu yeri tutmuşdur. 2009-cu ildə "IGN" saytı hazırladığı "dəyəri ən çox şişirdilmiş 10 videooyun personajı" başlıqlı siyahısında Kirpi Soniki 3-cü yerə, "Cheat Code Central" isə hazırladığı eyniadlı siyahıda personajı 7-ci yerə layiq görmüşdür.