فوزية: موغنية مغريبية كانادية
فوزية أويحيى (مزيودة ف 5 يوليوز 2000 ف الدارلبيضا) لمعروفة ب السمية لفنية ديالها فوزية Faouzia موغنية و كاتبة د لأغاني و موسيقية مغريبية كانادية، لي تشهرات سيرتو ب أغنيتها Tears of Gold (دموع د الدهب).
لفاميلة د فوزية هاجرات ل كانادا ملي كانت صغيرة. تعلّمات تعزف على بزاف د لألات لموسيقية من صغرها، و بدات كاتألّف لأغاني دياولها. خرّجات عدد ديال لأغاني سينڭل، و شاركات معا موسيقيين خرين ف لغنا و تأليف لأغاني، قبلما تصدر أول ديسك طويل ديالها ب عنوان Stripped ف غشت 2020. ف 2022 ربحات جايزة أفريما ديال أحسن موغنية ف شمال إفريقيا، و ف 2023 خدات جايزة كا وحدة من أحسن 25 كاناديين ب أصول مهاجرة.
فوزية | ||
 | ||
| معلومات عامة | ||
| زيادة | 5 يوليوز 2000 (23 عام) الدار البيضا | |
| لجنسية | لمغريب كانادا | |
| لحرفة | مغنية و موغنية مؤلفة | |
| لّوغات لي كيعرف | عربية، لفرانساوية، نڭليزية و الداريجة لمغريبية | |
| معلومات خرى | ||
| ستيل | پوپ | |
| سّيت رّسمي | http://faouziaofficial.com/ | |
                | ||
لحياة و لكاريير
2000-2014: صغرها
فوزية تولدات ف كازا، ل مصطفى أويحيى و بشرى لعلوي. ملي كانت صغيرة هاجرو ل نوطر ضام دو لورد ف مانيطوبا ف كانادا، و من بعد ستاقرو ف كارمان، مانيطوبا. عندها جوج خواتات، سامية لي هيّ لمديرة د لأعمال ديالها، و كنزة لمصوّيرة ديالها. كبرات فوزية ف عائلة مسلمة و كانت كاتسافر بزاف ل لمغريب، و ڭالت بلي كاتحس ب إرتباط قوي معا لبلاد لأصلية ديالها، و بلي ف دارهوم كانو كياكلو لماكلة د لمغريب و كيلبسو اللباس التقليدي. ف واحد لحوار، ڭالت بلي كانت كاتحس ب راسها معزولة ملي كانت درية صغيرة، و بلي هاد لإحساس ب لإنعزال كانت أصعب حاجز لي كان خاصها تجاوزو. لمؤلفات لموسيقية اللولين ديالها كانو مأنسپيرين من هاد التجربة د لإنعزال، و هضرات فيهوم على تقبل لآخر كيما كان. الشغف ديالها ب لموسيقى بدا من فاش كان ف عمرها 4 سنين، فاش شافت ختها سامية كاتلعب لپيانو، و تمنات معا راسها باش تدير بحالها. بدات فوزية كاتكتب لأغاني و لقصايد على 5 سنين، و بدات كاتلعب لپيانو ملي دارت 6 سنين. و من بعد تعلّمات ل لڭيطار و لكامانجة. كاتهضر ب النڭليزية و لفرانساوية و الداريجة. هاد اللخرة كانت هيّ اللوغة د التواصل ف دارهوم.
2015-2019: بدية د لكاريير
ف 2015، ملي كان ف عمرها 15 عام، ربحات جايزة "أغنية د لعام"، "جايزة الجمهور"، و "الجايزة لكبيرة" Grand Prix ديال La Chicane Éléctrique. بدات كاتنشر لأغاني ديالها و لكوڤرات د لأغاني ف يوتيوب، و منها سنات معا شركة Paradigm Talent Agency. بسباب هاد النجاح لمبكر، قدرات تخرج السينڭل اللول ديالها ب عنوان Knock on My door (دق على بابي) ف 1 نونبر من نفس لعام.
ف 2016 جات التانية ف "برنامج توجيه لفنانين الطالعين" Emerging Artist Mentorship Program. ف 2017، خدات الجايزة لكبيرة ف مسابقة لمزيكة Unsigned Only ف ناشڤيل. ف نفس لعام، شاركات معا مات إپ، فنان من مدينتها، ف لمسابقة الدولية د كتابة لأغاني International Songwriting Competition، لي كاتّعتابر أكبر مسابقة ف لعالم ديال كتابة لأغاني، و ربحو بجوج ب أغنية The Sound (الصوت) باش يكونو أول كاناديين كيربحو هاد الجايزة، من بين 16000 مشاركة من 137 بلاد. و شاركات معا لؤركيسطرا السيمفونية د وينيپيڭ ف لإحتفال ب مرور 150 عام على تأسيس كانادا.
ف غشت 2018، شاركات فوزية ف أغنية Battle ديال لموغني لعالمي ديڤيد ڭيطا، لي شكر فيها بزاف و لقدرات لغنائية ديالها ف حوار معا جورنال Le Matin السويسري. فوزية عتابرات لمشاركة ديالها معا ديڤيد ڭيطا "أفخر لحضة ف لكاريير ديالها". شاركات تا ف أغنية ب عنوان Money ف ألبوم Destin ديال الراپور لفرانساوي نينو Ninho.
فوزية قرات لانفورماتيك ف جامعة مانيطوبا.
2020 تال دابا
ف لبدية د 2020، تلقّات فوزية دعوة من لموغنية لميريكانية كيلي كلاركسون باش تطرجم أغنيتها ل الداريجة، لي خرجات ب عنوان "كنتحداك" ف 16 أبريل.
ف 30 مارس 2022، علنات على الديسك الطويل التاني ديالها، و صدرات منو أغنية RIP, Love. الديسك خرج رسميا ف 19 ماي، و مضمنين فيه أغاني لي كانت صدراتهوم ف سنوات قبل على شكل سينڭل بحال Minefields (حقول د لألغام)، Don't Tell Me I'm Pretty (ماتڭولش ليا أنا زوينة)، و Puppet (مونيكة). ف 7 أكتوبر صدرات أغنيتها "حبيبي (ماي لوڤ)".
عاونات ف لكتابة ديال أغنية Beg Forgiveness (طلب السماح) من ألبوم Vultures 1 ديال ¥$ (كاني ويست و تاي ضولا ساين) لي خرج ف 10 فبراير 2024.
الستيل ديالها
الطيمات و الستيل د لمزيكة
فوزية كاتغني لپوپ، لأر أند بي، السينثپوپ، و لپوپ أكوستيك. وصفات لموسيقى ديالها بلي "عاطفية" و "شديدة". ڭلوريا موري ڭالت بلي لمزيكة ديال فوزية "فيها عناصر ديال أغاني لپوپ لمتفائل لي ف لعادة كيكونو لكلمات ديالهوم سطحيين، مي لكلمات ديال فوزية عكس من هادشي فيهوم معاني عميقة". فوزية كاتغني سيرتو ب النڭليزية، ب تأتيرات موسيقية عربية. و غنات شي مرات تا ب لفرانساوية و الداريجة.
تأتيرات
فوزية كاتعتابر واليديها و خواتاتها أكبر سبب علاش تبعات كاريير ف لموسيقى. كبرات كاتسمع ل موغنين بحال ريحانا، ليدي ڭاڭا، أريانا ڭراندي، روزاليا، بيونصي، سيا، أديل، كيلي كلاركسون و دجون ليجيند. ملي كانت صغيرة كانت كاتسمع معا واليديها ل لأغاني لعربية ديال أم كلتوم و فيروز. و سمعات تا لمزيكة ديال أصالة نصري و الشاب خالد. ف لمزيكة لكلاسيكية سمعات ل بيتهوڤن، شوپان، و باخ. أتّرو عليها تا فراقي د لموسيقى د لپوپ بحال فول أوت بويز و إماجين دراڭنز. هاد اللخرين حضرات ل وحدة من لحفلات ديالهوم.
عيون لكلام
This article uses material from the Wikipedia داريجة article فوزية, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). المحتوى متاح وفق CC BY-SA 4.0 ما لم يرد خلاف ذلك. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki داريجة (DUHOCTRUNGQUOC.VN) is an independent company and has no affiliation with Wiki Foundation.