سلو

كتكوّن أساسا من الدقيق لمحمر و اللوز و الجنجلان و السكار و الزبدة، و كتختلف طريقة تحضيرها من منطقة لأخرى، حتى السمية كتختلف شي مناطق كيقولو عليه السْفْوف و أخرى كتقول عليه التْقَاوْت، وكيتصاوب بزاف ف شهر رمضان.

سلو
معلومات عامة
سّمية لأصلية	ⴰⵙⴻⵍⵍⵓ
نوع د لماكلة	حلوى و حلوى سكرية
لبلاد لأصلية	لمغريب
مصاوب من	دقيق، لوز، جنجلان
كوزينة	كوزينة د شمال إفريقيا

كيرجع أقدم تدوين ل وصفة سلو لكثر من 9 قرون، و بالضبط ف لقرن 12 ف عهد لمرابطين، تدكر ف كتاب «نزهة المشتاق في اختراق الآفاق» للجغرافي المغربي الإدريسي السبتي لي عاصر الدولة المرابطية، وكان سلو ولّا أسلو بالأمازيغية، ماكلة خاصة بقبيلة لمتونة الأمازيغية لي حكمات لمغريب و لأندلوس شحال هادي، و كيقول الإدريسي ف الصفحة 224 عن لمتونة:

"وجل طعامهم وأحفله الطعام المسمى بالبربرية "آسلوا" وهو أنهم يأخذون الحنطة فيقلونها قليا معتدلا ثم يدقونها حتى تعود جريشا ثم يمزجون العسل بمثله سمنا ويعجنون به تلك الحنطة على النار ويضعونه في مزاود لهم فيأتي طعاما شهيا وذلك أن الإنسان منهم إذا أخذ من هذا الطعام ملء كفه وأكله وشرب عليه اللبن ثم مشى بقية يومه ذلك لم يشته طعاما إلى الليل."

• 2 كيلو د جنجلان محمر و مطحون
• 5 حبات د المسكة الحرة
• 3 معالق كبار د النافع مطحون
• 3 معالق كبار من حبة حلاوة مطحونة
• 3 معالق من القرفة المطحونة
• 400 غرام من السكار ڭلاصي
• كيلو د اللوز
• كيلو و نص د الدقيق البيض المحمر
• 250 ڭرام د الزبدة
• 250 ڭرام د العسل
• شوية د الملحة

1. ف مقلا كبيرة، قلي الدقيق مزيان و حركو حتى يتحمر.
2. غسل الجنجلان ب لما مزيان، و قليه ف مقلا خرة و خليه حتى يبرد عاد طحنو ف لمولينيكس.
3. ومن بعد، سلق اللوز مزيان ف نار هادية، و قشرو و قليه ف شوية تاع زيت حتى يتحمر عاد طحنو.
4. ف زلافة كبيرة، خلط الدقيق و السكار مزيان عاد زيد اللوز، ليانسون، لقرفة، لمسكة الجنجلان المطحون و الملحة ل الدقيق و خلطهم مزيان.
5. ذوب الزبدة ف كسرونة، و زيد عليها لعسل خليها تبرد شوية عاد زيدها بشوية بشوية ف خليط ل الدقيق.
6. عجن خليط دقيق بيديك بزوج مزيان حتى تجانس لمكونات. ومن بعد فاش غتسالي قدمو بالطريقة لي بغيتي.