لأدارسة: سلالة حكمات لمغريب

دولة لإدريسية هي أول دولة اسلامية مستاقلة فلمغريب، ؤ كانت لعاصمة ديالها هي فاس، ؤ كانو لّولين لي دارو سيستيم د لحكم ف لمغريب خارج سّيستيم لقبلي لأمازيغي، ؤ كان مكوّن جزئيا من لعرب، لي دخّلو لعربية ل شمال لمغريب.

دولة لإدريسية (الأدارسة)
سلالة حكمات لمغريب
عملة ديال لأدارسة من لفضة
-----------
تاريخ لحوكم	م 788 – م 974
لعاصمة	واليلي (789–808) فاس (808–927)
نظام د لحوكم	ملكية
دين	لإسلام
لفترة تاريخية	لعصور لوسطى
لمؤسس	إدريس بن عبد الله (ادريس الأول)
شخصية معروفة	إدريس الأزهر (إدريس تاني)
معالم معروفة	جامع القرويين
-----------
.	.

ف عام 789م، تبنات دولة لإدريسية للي حكمات جزء كبير من لمغريب على يد ادريس بن عبد الله، و لي هو ولد حفيد لحسن بن علي، ؤ كان واحد من ناس لقلال لي نجاو من معركة فخ لي بزاف د لأنصار د علي تقتلو فيها ضد لعباسيين. ورا ما هرب من لعباسيين ؤ جا لمدينة وليلي، ستقبلاتو لقبيلة لأمازيغية ديال أوربة لي بايعاتو فنس لمدينة باش يتكلف بلأمور دينية والسياسية ديالها، ؤ تزوج منها، ؤ لعبات دور كبير بزاف ف تأسيس ديال دولة لأدريسية، بعد هاد لمبايعة، بايعوه قبايل أخرين بحال زناتة وغيرها، الشي لي عطاه بزاف ديال لقوة باش يدير التوسوعات ديالو، و بعد منو ولدو لإدريس تاني، حتى وصلات الدولة ديالو لتامسنا، فازاز وتلمسان.

 

أسسات دولة لإدريسية بزاف ديال لمدون من غير فاس، بحال لبصرة ؤ تامدولت، و تبعو ليهم بزاف ديال لقبايل بحال مكناسة ؤ غمارة ؤ مصمودة، لكن واخا هكاك فشلوا لأدارسة فتوحيد ديال لمغريب، حيت فلعهد ديالهم كان لمغريب مقسم لبزاف ديال لإمارات، بحال إمارة نكور فشمال، و سجلماسة فشرق، و بروغواطة فلغرب.

 

كايتقال بلي هارون الرشيد صافط لي يقتل ادريس بن عبد الله بسم، من موراها شد ولدو ادريس التاني لحكم وهو باقي صغير عاد عندو 12 لعام. هاد دري ولا راجل وكبر لحكم ديالو (من 803 تال 828)، ؤ بنا مدينة فاس عام 808 م، ؤ لي ولّات لمركز سّياسي ؤ رّوحاني د لمغريب، ؤ مهد للمرحلة دلقوة ديال هاد دولة، لي تبنا فيها جامع لقاراويين عام 859م، لي هو من أهم لمعالم تاريخية فلمغريب، و أقدم جامعة فلعالم. بعد لمرحلة ديال لقوة، جات لمرحلة ديال ضعف لي طاحت فيها دولة عام791 م على يد يحيى رابع. بعدما مات دريس تّاني، لمملكة ديالو تقسّمات بين ولادو ؤ ضعافت، ؤ تّقضا عليها ف مرة من طراف لفاطيميين ؤ لأمويين د لأندلوس، آخر حاكم إدريسي مات محبوس عند لأمويين ف قورطوبا ف عام 985م.

من أهم لأثار لي خلاوها الأدارسة هي مدينة فاس لي بناها دريس تاني و قسمها لعدوة ديال الأندلس و عدوة ديال لقرويين، و بنا فيها بزاف ديال لمعالم بحال جامع الأشياخ فلعدوة ديال لأندلس، ؤ جامع شرفاء فلعدوة ديال لقرويين، ؤ دور سوار على لمدينة، و دار ليها لبيبان. فلوقت ديال لأدارسة، كانت لمدينة ديال فاس عندها شهرة كبيرة فلعالم، حيت كانت من لمدون لقلال لي متحضرين، بحكم كانو فيها زناقي مبلطين بلحجر و تاينقيوهم بشكل دوري، و كانت لخزينة ديال دولة مرفحة حيت تادخل بزاف ديال ضرائب على تجارة لي تشهرات بيها هاد لمدينة، كيف ما دارو الأدارسة عملة خاصة بيهوم من لفضة.

أهم لحوايج لي ميزات الحكم ديال الأدارسة عاود، هو جامع القرويين، لي تايتعتابر أقدم جامعة مزال محلولة لحدود ليوم، هاد جامع لي بناتو فاطمة لفهرية عام 895 م، بلفلوس لي ورتاتهم على باها لي كان تاجر كبير جا لفاس من لقيراوان، لي خلى هاد جامع يتشهر قد هكا هو لعلوم لي تطورات ديك لوقت بلفضل ديالو، حيت كان بحال مدرسة ولا جامعة تايجيو ليها طلبة لعلم من كل بلاصة باش يتعلمو لعلوم ديال دين و ديال لعقل، بحال طب ولمنطق وتفسير و غيرها، و كان هاد جامع تايوفر امكانية لناس باش يتعلمو نظريا و تطبيقيا.