أليكساندر لكبير

أليكساندر خدا لحكم مور بّاه لماليك فيليپوص التاني لمقدوني ف 336 قبل لميلاد، على عمر د 20 عام، و دوّز أغلبية د لحكم ديالو ف حملات عسكارية ف غرب أسيا، أسيا لوسطانية، جنوب أسيا، و ف مصر. ملي كان ف عمرو 30 عام، كان أسس وحدة من أكبر لإمبراطوريات ف التاريخ لي كانت شادّة من ليونان تال الشمال لغربي ديال لهند. أليكساندر لكبير ماعمّرو خسر شي حرب ولّا معراكة، و كيتّعتابر بشكل عام من أعضم لقادا لعسكاريين لي دازو ف التاريخ.

أليكساندر لكبير
معلومات عامة
زيادة	20 يوليوز 356 قبل لميلاد بيلا (مملكة مقدونيا)
لموت	10 يونيو 323 قبل لميلاد (32 عام) بابل (Macedonian Empire)
طريقة دلموت	موتة طبيعية
سباب لموت	حمى التيفوئيد
لجنسية	مملكة مقدونيا
لحرفة	سياسي، قايد عسكري و عاهل
لّوغات لي كيعرف	لإغريقية
لفاميلة
لواليد	فيليب الثاني المقدوني
لواليدة	أوليمبياس
خوت	أوروبا المقدونية، فيليبوس الثالث المقدوني، كارانوس، كليوباترا المقدونية، سينان و سالونيك المقدونية
شريك	بروشات الثانية (324 قبل لميلاد–323 قبل لميلاد), موت ستاتيرا الثانية (324 قبل لميلاد–323 قبل لميلاد), موت روكسانا (328 قبل لميلاد–323 قبل لميلاد), موت
لولاد	الإسكندر الرابع المقدوني هرقل المقدوني
لمحيط	Eurydice I of Macedon (جدَّة لأب) أمينتاس الثالث المقدوني (جدٌّ لأب) Neoptolemus I of Epirus (جدٌّ لأم)
معلومات خرى
دين	الدين في اليونان القديمة و ميثولوجيا إغريقية
تأتر ب	أرسطو
لعسكر
لڭراد	رئيس أركان
لحروب	حروب الإسكندر الأكبر

أليكساندر قرا على يد لفيلسوف ليوناني أرسطو تال فاش كان عمرو 16 عام. ف 335 ق.م، شوية مورما شد لحكم، دار حملة ف لبلقان، و سيطر على طراكيا و إليريا، قبل مايمشي ل طيبا و يدمّرها. موراها بدا أليكساندر كيخدم على لمشروع ديال بّاه ب السيطرة على جميع لمناطق الناطقة ب ليونانية، و قاد لحملة ليونانية ضد لفارسيين.

ف 334 ق.م غزا لإمبراطورية لأخمينية ف بلاد فارس، و بدا سلسلة د لحملات لعسكارية لي دامت 10 سنين، و قضى فيها على لأخمينيين و حيّد الشاه داريوش التالت من لحكم، بعدما سيطر على بلاد فارس و لمناطق لي تابعة ليها بشكل كامل. أليكساندر كان كيسعى باش يوصل "تال اللخر د لأرض و لمحيط لي ضاير بيها". ف 326 ق.م غزا لهند، و قدر يغلب لماليك ديال پونجاب پوروس ف معراكة هيداسپيص Hydaspes. بسباب الطلب ديال لعساكريا ديالو لي توحّشو لوطن ديالهوم، قرر باش يرجع ف 323 ق.م و مات ف الطريق ف مدينة بابل (دابا ف لعراق) لي كان باغي يردّها لعاصمة ديال لإمبراطورية ديالو. لموت ديالو خلّات مجموعة د لحملات لعسكارية معلّقة، بحال لحملة لي كان باغي يسيطر بيها على لڭزيرة لعربية. سنوات موراها تقسّمات لإمبراطورية ديالو بعدما ناضو حروب أهلية ف مقدونيا.

التوارخيا كيعتابرو لموت ديالو هوّ لبدية ديال لفترة لهيلينية لي جات مورا لفترة ليونانية لكلاسيكية. التأتير ديال لغزو د أليكساندر لكبير كانلقاوه ف لإنتشار ديال التقافة ليونانية لقديمة ف مناطق كبيرة ف ؤروپا، أسيا و إفريقيا، و السينكريتيزم (الدمج بين لأديان)، لي عطا حاراكات دينية و تقافية بحال لبودية ليونانية و ليهودية ليونانية. أليكساندر أسس كتر من 20 مدينة منها مدينة لإسكندرية ف مصر. التأتير ديال التقافة و لفكر ليوناني داز ل لإمبراطورية الرومانية لي نشراتو ف مناطق خرين ف ؤروپا و شمال إفريقيا، و هاد التأتير ستامر ف التقافة لغربية لعصرية. ليونانية لبالية ولات اللوغة د التواصل ف بزاف د لمناطق لي سيطر عليها أليكساندر، و بسباب هادشي غادي تكون هيّ اللوغة الرسمية ديال لإمبراطورية لبيزنطية تال لقرن 15. أليكساندر لكبير دخل ل لمخيّلة التقافية و الشعبية كا بطل أسطوري سوا عند الناطقين ب ليونانية ؤلا غيرهوم، و تقدر تكون الشخصية ديال ذو لقرنين ف لإسلام مبنية على أليكساندر لكبير. النجاحات لعسكارية لكبيرة ديالو خلاتو يكون معيار باش الجينيرالات و لقادا لعسكاريين كيقارنو راسهوم من داك لوقت، و الطاكتيكات ديالو باقين كيتقرّاو ف لأكاديميات لعسكارية تال ليوم. لأساطير على أليكساندر تجمعو ف لقرن 3 ف رواية قصة أليكساندر لي تطرجم تقريباً ل جميع اللوغات لؤروپية و بزاف د اللوغات ف لعالم لإسلامي، و كان هوّ تاني أكتر كتاب ف شعبيّتو ف ؤروپا من مور لإنجيل.