第二次當勞侵彈劾案

呢次彈劾係因為當勞侵嘗試推翻2020年美國總統選舉結果（英文：Attempts to overturn the 2020 United States presidential election）、被指向佐治亞州州務卿施壓造票，同埋喺2021年1月6號涉嫌煽動群眾令到美國國會大廈山莊爆發衝突。

1月11號，美國眾議院超過兩百個支持者將彈劾議案提上日程，指控當勞侵「煽動對美國政府嘅叛亂」同埋煽動喺國會大廈嘅違法行為。1月13號，美國眾議院以232-197嘅比例通過彈劾議案。呢次對當勞侵嘅彈劾同時係美國史上第四次對美國總統嘅彈劾。呢次彈劾議案有十個共和黨眾議員嘅支持，係美國史上收到兩黨支持最多嘅彈劾，亦都係第一次多數黨黨團內所有嘅代表都支持彈劾。

2月14號，美國參議院以57票有罪對43票無罪結束呢次彈劾，因為支持票數未過有效票數嘅三分之二，裁定當勞侵無罪。

1月8號，共和黨參議員格雷厄姆發貼文，認為彈劾「弊大於利」、指責眾議院議長佩洛西同就嚟成為參議員多數黨領袖舒默只係關心自己嘅政治生涯。1月17號，佢喺信入面呼籲舒默舉行投票，直接駁返眾議院通過嘅彈劾議案。

1月12號，共和黨參議員史葛發貼文：「眾議院嘅彈劾投票只會導致更多仇恨同國家分裂。我反對彈劾當勞侵總統」。

哈佛大學嘅退休教授、喺第一次當勞侵彈劾案中為侵辯護、同喺2020年總統選舉入面支持拜登嘅律師德肖維茨反對第二次彈劾。佢認為當勞侵「冇犯一個可以被彈劾嘅罪行」。佐治華盛頓大學法學院嘅教授Jonathan Turley認為，一個新嘅彈劾案會「損傷憲法」。即使佢譴責當勞侵嘅言論，Turley教授仍然講，當勞侵嘅言論「會被美國最高法院認定係受到保護嘅言論」。佢亦都提到侵「從來未真正呼籲進行暴力或者騷亂」，又指出咗國會民主黨議員2020年發表嘅其他言論同樣鼓勵咗變成暴力嘅抗議活動。