澳洲日: 澳洲國慶兼開埠紀念

澳洲開埠

 

 

早喺古代嘅希臘同羅馬，已經有人估計有一片神秘嘅未知南方大陸(Terra Australis)等待被人發現。1606年，荷蘭航海家威廉．揚松抵達依家嘅澳洲昆士蘭約角半島，係史上首次有歐洲人登陸澳洲。之後，相繼有唔同嘅荷蘭人去澳洲探險，佢哋稱為「新荷蘭」。佢哋探索北岸、西岸同南岸，但普遍都認為澳洲嘅環境貧瘠險惡唔適合歐洲人長期定居。一直去到1770年4月，英國航海探險家兼皇家海軍上尉占士曲船長去到澳洲雪梨植物灣登陸，隨後沿住海岸線北上，發現東岸土地肥沃同其他地方唔同。但其實喺兩年前，佢離開英國出發探險之前，佢收到海軍部嘅密令，指示佢一旦發現合適開闢商埠嘅地點，要以英國國王之名宣告為屬地。但如果當地有土著，就要得到土著同意嘅前題下先好咁做。而當佢去完澳洲返到英國之後，佢表示自己喺1770年8月依家昆士蘭嘅一個島上面舉行升旗屬領儀式，宣佈成個東岸成為英國屬地。佢命名依個島為「屬領島 (Possession Island)」，而成個澳洲東岸就叫「新南威爾士」。但佢對成件事情嘅經過描述，同船員嘅講法有所出入，令人懷疑。

1776年北美洲13個殖民地宣佈獨立並聯合成為美國，仲同英國開戰。自此，佢哋停止接受英國向佢哋發配罪犯流放，英國嘅監獄亦慢慢迫爆。喺英國，曾經有份參與占士曲船長探險澳洲東岸嘅船員就建議，可以喺新南威爾士開闢殖民地流放罪犯，更加可以畀喺美國獨立戰期間效忠英國嘅人前往開拓新家園，而且新殖民地仲可以提供英國喺亞洲同太平洋貿易嘅機會。因此，英國委任皇家海軍上將亞瑟．菲臘帶領船隊喺1787年5月13號出發前往新南威爾士開闢新殖民地。

 

 

植物灣

 

積臣港

衛星圖顯示植物灣同積臣港

 

船隊用咗大半年時間，終於喺1788年1月18號抵達雪梨植物灣，但佢哋好快就發現植物灣淡水水源有限，地點空曠缺乏天然屏障，而且港灣水深淺薄令大船難以近岸停泊上落貨物。種種情況都令植物灣唔適合用嚟開闢做新殖民地，所以佢哋決定離開植物灣去搵更加適合嘅地點定居。菲臘船長喺22號北上去搵十幾年前占士曲船長去過嘅積臣港視察，發現嗰到港口優良水源充裕。喺24號早上，菲臘船長返到植物灣下令船隊準備遷移到積臣港，但同一日，船隊見到植物灣對出海面有兩首船隻，而且船身懸掛法國旗幟。但當時海灣風向相反，水流急速，兩隻法國船並冇駛入植物灣。第二日，天氣欠佳，但菲臘船長仍然決定首先離開植物灣前往積臣港，同時叮囑船隊其餘船隻喺天氣轉好之後盡快出發，而兩隻法國船隻亦因為天氣原因冇駛入植物灣。

最後，喺1月26號早上，天氣變好，法國船隻駛入植物灣，而英國其餘船隻就離開植物灣前往只有十幾公里外嘅積臣港。去到當日傍晚喺積臣港，菲臘船長喺其他船員陪同下主持儀式，英國旗升起，全體舉杯祝願英國國王身體健康，祈求新殖民地昌盛，同時意味住英國管治率先正式開始，澳洲開埠。

原本嘅「澳洲日」

 

「澳洲日」最初同1788年1月26號澳洲開埠一啲關係都冇，而係澳洲全國為第一次世界大戰戰事舉行嘅籌款日嘅稱呼。

1914年，當時澳洲作為大英帝國嘅自治領，喺英國8月4號對德國宣戰嘅一刻 (澳洲時間8月5號)，就意味住澳洲自動加入戰爭，而澳洲政府亦旋即徵召志願軍參加作戰，民間更自發唔同嘅籌款活動支持。隨住戰事延長同發展，民間開始發起大型特定籌款主題日。第一次主題日係1915年5月15號為比利時國家救濟基金籌款嘅「比利時日」。之後，一位有四個仔參戰來自新南威爾士嘅婦女有見及此，就向州長建議發起「澳洲日」。同年嘅7月30號就定為澳洲日為紅十字會籌款，亦係首次全國舉辦嘅澳洲日。當日籌得嘅善款非常可觀，而往後嘅好幾年，每年嘅7月底都會有一日定為澳洲日為戰事籌款。

定名1月26號為「澳洲日」國慶假期嘅漫長過程

 

 

雪梨市議會喺1967年去到原來位置豎立旗杆座紀念澳洲開埠（Foundation of Australia）

早年官方係完全唔重視1月26號，而且澳洲歷史上唯一一次軍事政變成功推翻政府又咁啱係喺1808年1月26號開埠20週年發起。最初慶祝1月26號就基本上只限於新南威爾士民間，尤其係新移民同釋囚，而且當時唔叫「澳洲日」，而係叫「開埠日（Foundation Day）」或者「首次登陸日（First Landing Day）」。

要澳洲各地聯合慶祝開埠嘅過程漫長。因為英國人喺歷史上係唔同時間去澳洲唔同地方開闢唔同嘅殖民地，而新南威爾士亦分割出唔同嘅獨立殖民地，所以澳洲各地有各自嘅紀念日。再加上早年澳洲人對英國嘅身份認同，多重原因都令1月26號需要好長時間，去到1935年，先獲得新南威爾士以外嘅政府接納為共同嘅官方慶祝日子，而且更加要到1994年先至全國統一定當日為公眾假期。

而名稱方面，同樣因為澳洲複雜嘅歷史背景，導致唔同社群、唔同地方，對1月26號有唔同嘅稱呼。過去最普遍嘅稱呼係「開埠日」，亦曾經有州議會將「開埠日」依個名稱寫入法律。即使1946年各州政府共同以「澳洲日」之名慶祝1月26號之後，民間仍然維持使用「開埠日」依個名稱直到1950年代。

而喺1938年，即係各州首次共同慶祝1月26號之後嘅第三年，澳洲原住民第一次聯合喺1月26號舉行「哀悼日(Day of Mourning)」抗議。自此之後，要求更改澳洲日慶祝日期嘅呼籲亦越來越大，部份縣市區議會近年更拒絕慶祝澳洲日，而「入侵日」、「幸存日」等名稱亦先繼出現。而有鑑於澳洲日嘅爭議，近年亦越來越多僱主同大型企業批准員工選擇1月26號當日放假或者返工後補假期。

澳洲日嘅活動有好多，主要係慶祝類型，但亦都有抗議類別。

• 入籍儀式
• 澳洲榮譽勳章及獎項頒發
• 運動比賽
• 煙花匯演
• 音樂會
• 社區燒烤聚會
• 原住民組織集會抗議

澳洲日活動
時任澳洲總理茱莉亞．基勒參與新移民澳洲日入籍儀式    澳洲日社區燒烤聚會    珀斯年度澳洲日煙花匯演    原住民組織「入侵日」示威

• 香港開埠日
• 新加坡開埠