麥理浩

麥理浩響英國蘇格蘭格拉斯哥出世，讀牛津大學；1939年加入殖民地部，派駐馬來亞。1941年派駐廈門任副領使以嚟，佢好多次派咗去東南亞同中國各地嘅領事機構。之後調返英國外交部。1971年被委任做香港總督，11月19號上任，連任三次，總共十年五個月，至1982年5月8號離港，係任期最長嘅港督。

1983年麥理浩爵士返英國後，獲英女王伊利沙伯二世封為終身貴族。

2000年，麥理浩響蘇格蘭艾爾郡病死，享年82歲。

麥理浩上任香港總督時，香港貪污風氣嚴重，成日有公僕向市民收「茶錢」。1973年，總警司葛柏涉嫌受賄，麥理浩爵士響第二年2月成立總督特派廉政專員公署，負責處理反貪污工作。1975年，香港政府終於將葛柏引渡返香港受審。

1970年代，香港人口劇增，麥理浩推行一系列措施減輕人口問題，當中包括「十年建屋計劃」（1972年）、發展新市鎮同埋興建地下鐵路（1979年）。1970年代中期，一啲中產市民唔想入住質素較差嘅公屋，但經濟能力又冇錢買樓，有見及此，麥理浩響1978年推出「居者有其屋」計劃。同年，佢推行九年免費教育政策，所有6至15歲細路必需接受教育。

由於麥理浩響呢段時間治績好好，為香港經濟起飛奠下基礎，有人將佢管治嘅十年形容為「麥理浩黃金十年」。

1979年年初，麥理浩訪問北京，同當時嘅中國領導人鄧小平商討香港喺1997年，即新界租借條約期限屆滿後嘅前途問題，係1949年中華人民共和國立國以來第一位到訪嘅港督。

麥理浩喺1947年同麥鄧麗娉（Margaret Noël Dunlop，通稱麥理浩夫人）結婚，有兩個女。麥理浩夫人喺2020年2月16號逝世。

• 香港大學名譽法學博士（1992年）

麥理浩熱愛行山。香港將一條由西貢北潭涌經九龍群山到屯門，全長約100公里嘅行山徑定名做麥理浩徑，紀念佢為香港作出嘅貢獻。北潭涌亦都有以佢老婆命名嘅麥理浩夫人渡假村。