起城市遊戲

一隻起城市遊戲大致係噉嘅：隻遊戲會提供一笪笪嘅地圖，玩家可以由 men1 niu2 度揀想起嘅物件（虛擬嘅建築物或者馬路呀噉），如果夠資源嘅話就可以起。然後個遊戲程式仲會模擬現實世界城市噉嘅經濟同社會現象，如果玩家管理得夠妥善，佢就會得到更多嘅資源，可以用呢啲資源嚟擴張佢座虛擬城市。

起城市遊戲起源自 1980 年代尾，由模擬城市帶起，到咗廿一世紀初都一路出到有睇頭嘅作品，例子可以睇吓城市：天際線呀噉。

唔同嘅起城市遊戲，喺機制上可以好唔同。不過喺廿一世紀初，起城市遊戲實會有：

• 平面：隻遊戲會有個平面嘅世界，畀玩家喺個世界入面放置各種嘅建築物同基建，編程上可以係以一幅圖數據嘅形式存在嘅，每一個節點都有變數表示佢有乜特性；一般認為，個世界嘅最大可能嘥士si2係愈大愈好，不過呢樣嘢就受制於電腦性能同埋軟件最佳化等嘅因素；喺 2015 年嘅起城市遊戲《城市：天際線》當中，一座玩家起嘅城市嘅面積最高可以去到 33.18 km² 咁大。
• 控制：隻遊戲要有個 UI 管控玩家畀嘅 input，要畀玩家控制鏡頭嘅郁動—常見嘅有「撳住右掣嗰陣鏡頭會旋轉」同埋「轆踎士中間個轆會放大縮細」呀噉；除此之外，隻遊戲亦要畀玩家由選單度揀「想起乜」同埋將揀咗想起嘅嘢擺落平面地圖度，同埋有啲掣畀玩家剷走想剷嘅嘢；隻遊戲要有齊晒呢啲嘢嘅 3D 模型或者精靈圖（遊戲資產）。

有咗平面同埋控制方法，起城市遊戲個基本格局經已齊晒。

開發起城市遊戲嘅一個難點，在於點樣模擬座城市啲變數之間嘅關係。

喺《模擬城市》同《城市：天際線》裏面，玩家嘅城市可以愈轆愈大：玩家要起嘢就要使虛擬錢；同時隻遊戲梗會有一啲機制，畀玩家賺虛擬錢（否則隻遊戲好快就玩完）；喺呢啲遊戲入面，玩家起嘅嘢能夠製造收入，就好似現實世界嘅城市噉—玩家起咗住宅就會有人搬嚟住，市民會搞經濟活動創造 GDP 而且仲會交稅；如是者，假設玩家管理得妥當，座虛擬城市就會進入一個循環—

1. 擴充城市，
2. 賺到收入，
3. 攞啲收入擴充，
4. 重複。

噉就表示，個遊戲程式內部實係猛咁計數，用手上座虛擬城市嘅狀態—好似係人口、商業用建築物嘅數量、工業用建築物嘅數量... 呀噉—做 input 計出玩家跟住落嚟會得到幾多收入。事實係，開發一隻起城市遊戲，往往會要個遊戲程式模擬現實城市規劃上已知嘅城市同經濟現象，想達致迫真嘅城市模擬。當中有啲起城市遊戲達致相當高嘅真實度，高到有啲城市規劃相關領域嘅工作者想攞呢啲遊戲嚟做教學工具，畀學生透過玩呢啲遊戲嚟學城市規劃概念。

有好多城市規劃或者經濟學嘅電腦模擬模型，都可以用嚟幫手開發起城市遊戲。例如係房地產市場電腦模擬噉：房地產市場可以當做一個由好多決策者同住戶組成嘅系統，一個住戶會有若干位決策者，每位決策者都有各種嘅特徵，包括性別、年齡同埋喺娛樂上嘅偏好呀噉，同時每個住戶都有啲特徵，例如係「手上有幾多錢」噉；然後個程式會同每位決策者計個數，得知佢住邊會得到最大嘅效益—例如一個鍾意睇戲嘅人正路會想住喺戲院附近。進階啲嘅模型，仲會考慮埋參數會點樣隨時間而變化，或者考慮每位決策者會唔會遇到情況令佢啲特徵突變。同每位決策者計好晒呢啲嘢，遊戲程式就會知座虛擬城市嘅每位虛擬市民會住邊。

除此之外，亦可以睇睇啲人點樣用電腦模擬交通、人口變化、就業、污染、能源、健康、教育同埋金融等嘅社會現象。

2019 年有人做交通模擬，模擬華沙嘅交通；啲細細粒嘅點點係一架架車。 《城市：天際線》有類似噉嘅交通模擬，玩家設計啲路嗰陣設計得唔好，可以搞到塞sak1車，成日塞車生活質素就會跌，而生活質量跌到咁上下啲人就會想搬去第度住。

喺起城市遊戲嘅歷史上，有過以下呢啲名作：

現代設定

以下係啲背景設定喺現代城市嘅起城市遊戲：

• 《模擬城市》（1989 年）：一般認為，起城市遊戲呢種遊戲類型，係由 1989 年嘅《模擬城市》確立嘅；隻遊戲有相當大嘅自由度，玩家可以自由噉建造自己想要嘅城市，唔似得打前嗰啲戰略遊戲噉吓吓都有特定嘅任務目標要玩家達成；隻遊戲初出就大受歡迎，直至 1992 年一共賣咗 100 萬件咁多。呢隻遊戲打後成為咗一個系列，出咗多部續作，對起城市遊戲造成咗深遠嘅影響。
• 《LinCity》（1999 年）：出名在自由開源，有意研究電子遊戲開發嘅人可以自由噉攞佢啲源碼去用。
• 《OpenCity》（2008 年）：又一隻自由開源嘅起城市遊戲。
• 《超級大城市》（2009 年）
• 《城市：天際線》（2015 年）：喺 2010 年代，起城市遊戲被指係低迷咗一排，出唔到咩有睇頭嘅作品，尤其係 2013 年嘅《模擬城市 2013》劣評如潮，畀好多人覺得係敗筆；而《城市：天際線》就被指係喺 2010 年代中取得成功，帶動返起起城市遊戲。
• 《城市：天際線 II》（2023 年 10 月）

架空設定

有啲起城市遊戲，背景唔係設喺現代嘅。有啲設喺古代，又或者設喺未來世界嘅都有。

• 《凱撒大帝》（1992 年）：背景設喺古羅馬。
• 《法老王》（1999 年）：背景設喺古埃及。
• 《宙斯：奧林匹斯之主》（2000 年）：背景設喺古希臘，有奇幻成份，故仔提到宙斯等嘅希臘天神。
• 《皇帝：龍之崛起》（2002 年）：背景設喺古華夏。
• 《不朽之都：尼羅河嘅仔女》（2004 年）：背景設喺古埃及。
• 《美麗新世界 2070》（2011 年）：個故仔設喺 2070 年嘅未來世界，講全球暖化搞到北極嘅冰溶晒，令到海平面大幅上升，好多城市都畀水淹沒咗；玩家要負責喺新嘅島嶼（曾經係高地）建立新嘅城市。
• 《空中王國》（2020 年）：用 Unity 遊戲引擎整嘅；個故仔設喺一個奇幻世界，用咗蒸汽鬅客噉嘅美學設計，畀玩家建造一座喺空中嘅城市；玩家仲可以「揸住」呢座城市周圍飛嚟飛去，搵新資源同埋新同盟。

• 模擬遊戲
• 戰略遊戲
• 社會模擬遊戲
• 個體為本模型