楊明

楊明
藝人或藝術家
原名	林明樂
英文名	Matt Yeung
國籍	中國（香港）
出世	(1981-02-27) 1981年2月27號（43歲）  英屬香港
教育程度	聖匠職業訓練學校中五畢業
獎 萬千星輝頒獎典禮 飛躍進步男藝員 2017年

楊明曾經受無綫力捧，喺2000年俾公司派去英國愛丁堡參加第三屆世界先生選舉，但其後不斷惹上官非，因而俾無綫投閒置散，直至2011年，揚明憑《誰家灶頭無煙火》中「田凱」一角人氣急升，再被關注，更打入2011年萬千星輝頒獎典禮「飛躍進步男藝員」五強名單。

近年，楊明再度受到無綫電視嘅重視，喺多部電視劇入面擔正，例如《機場特警》、《迷網》、《鐵探》等，都飾演一啲形象正面嘅警察角色。但佢亦因為喺香港逃犯條例爭議期間高調支持備受示威者批評使用過分暴力嘅香港警察，以及一啲個人操守問題，備受一定爭議。親中派嘅支持者對佢態度正面，但親民主派嘅人士亦對佢有非常負面嘅態度。

電視劇（香港電台電視部）

電視劇（無綫電視）

MTV

• 鄭伊健 - together
• 陳文媛 - 順路
• 丁菲飛 - 脈搏奔流
• 小雪 - 菩薩
• 楊千嬅 - 向左走向右走
• 李彩樺 - 你唔愛我啦
• 趙頌茹 - 同情心

廣告

• 渣打銀行硬照廣告
• 丹華牛仔褲電視廣告
• 無綫電視2003年新春賀年廣告
• 新人類宣傳片

其他

• 瀛珍大作戰（2000年）
• 瀛珍好玩新攪作（2000年）
• 康泰日本旅遊特輯（2000年）
• 全城響應助更生（2000年）
• 星星相識醫療輔助金禧夜（2000年）
• 和你玩得起
• 世界先生選舉
• 強積金透視（2000年）
• 萬千星輝賀台慶（2000年）
• 歡樂滿東華（2000年）
• 萬千星輝賀台慶（2001年）
• 好客之道滿分（2001年）
• 智醒用氣群星夜（2001年）
• 小城巨星挑戰賽（2001年）
• 銀行同業為公益（2001年）
• 十載同行共環保（2001年）
• 職安資訊速遞（2001年）
• 星晨旅遊山東真的感受（2001年）
• 康泰旅遊泰國真情趣（2002年）
• JUNO與他的迷失空間（2003年）
• 萬家團圓喜洋洋（2003年）

楊明係親中派嘅支持者，曾經支持唔同親中派嘅活動，例如曾經幫親中派政黨公民力量搞嘅「KOL明日之星選拔大賽」做評審，親中派立法會議員梁美芬亦曾經為佢嘅燉湯店同埋劇集《機場特警》宣傳，大讚楊明「湯好飲，劇好睇」。喺娛樂圈多年，佢試過多次捲入政治、撐警、侵犯版權同埋個人操守嘅爭議。佢嘅親中撐警立場，亦受到民主派支持者嘅不認同。

同香港警察關係

佢亦同香港警察有密切關係，例如係撐警活動等，協助警察嘅宣傳活動等。佢亦曾發表唔少支持警察嘅言論，因而被廣泛視為撐警藝人。喺2021年11月，因墮海殉職嘅高級督察林婉儀出殯，佢亦有獻上花牌，並且喺花牌上為自己嘅燉湯店宣傳。

旗下舖頭事件：被揭侵權、無牌經營同埋武漢肺炎期間停業

喺2020年1月，楊明位於荔枝角昌隆工業大廈地舖嘅燉湯店，被傳媒揭發得「食物製造廠牌照」，唔可以招待食客。食物環境衞生署回覆傳媒查詢時，表示曾接獲有關投訴，並且喺2019年9月同埋2020年1月發現違規嘅情況，已向有關店鋪嘅負責人以無牌經營食肆罪行提出檢控。楊明回應有關投訴嘅時候，指責網民無理投訴，自己被針對。

去到2020年1月22號，楊明嘅燉湯店被揭發盜用泰國藍象嘅商標，而藍象嘅香港代理百利行環球亦喺同日發表聲明，表明自己從未同燉湯店有過任何嘅商業合作關係或收到燉湯店任何使用藍象嘅肖像權/品牌/商標嘅申請，並表明如果佢哋唔移除有關宣傳品，將會採取進一步嘅行動。

去到2021年2月，有傳媒報道佢嘅餐廳再度違規，話佢只有工廠食堂牌照，但就繼續招呼街客。

去到2022年，因為武漢肺炎疫情，佢嘅燉湯店幾乎全線停業，佢女朋友莊思明話每個月淨係計租金已經蝕成過百萬。有啲唔鍾意佢嘅網民就因而揶揄佢，話佢又可以「借酒澆愁」，叫佢「信政府無事」，問佢嘅朋友去左邊，亦有人質疑係咪真係蝕咁多。

幫女朋友莊思明涉嫌洩露他人私隱事件做辯護

於2020年1月8日，楊明嘅女朋友莊思明，因為佢坐國泰航班時，唔可以借筆畀佢，而喺社交媒體表達不滿，又公開呢班機所有機艙服務員嘅資料，俾網民批評佢喺度公審同洩露其他人嘅私隱。

單嘢其後發酵，連國泰嘅本地主要競爭對手香港航空都喺社交媒體對呢單嘢抽水，舉行送筆活動，而且仲溫馨提示乘客搭飛機嗰陣，自己要帶筆填入境紙。去到1月12號，楊明唔單止無回應到莊思明洩漏機組人員名單嘅爭議同埋私隱專員公署對單嘢嘅回應，仲質疑香港航空係咪有需要都可以向空姐或空少要求幫手。另一個支持警察嘅藝人朱庭萱就直接話香港航空係以「黃絲角度揶揄撐警藝人」，「同支持祖國嘅人作對」，又祝香港航空早日結業。

去到2021年11月，學術期刊Journal of Organizational Computing and Electronic Commerce刊登咗一篇文章討論網上捍衛品牌行為，其中就攞咗呢次莊思明同楊明攻擊網民引來大批反駁嘅例子，作為呢種行為嘅其中一個案例。

醉駕同多次違反交通條例

2005年，楊明被發現將自己架車停咗喺佐敦道間行車線，仲喺車入面瞓覺，接受酒精測試嗰陣被證實超標後被拘捕，之後被判罰款7,000元同停牌1年。

2006年，楊明曾經因為被夜店保安員拒絕入場，用腳踢保安員而被判守行為。但喺守行為期間，佢再次因為醉酒之後去便利店，2次用回鄉卡當八達通用嚟買嘢，唔成功之後將店內八達通機掟出店外，仲打爛店內一個香煙廣告箱，結果被判社會服務令150小時同埋向便利店賠償3,880元。佢認罪個陣，承諾以後滴酒不沾。

2020年1月28號，《壹週刊》報導，楊明喺當日揸車沿軒尼詩道行緊嗰陣，喺大有商場附近，將自己部車停喺前面嘅巴士站，阻住其他車行，俾網民批評。

曾經喺2006年喺法庭承諾滴酒不沾嘅佢，喺2020年8月，再涉嫌酒後駕駛，經過馬己仙峽道嘅時候失控撞到交通指示牌同石壆。佢車禍後腳步浮浮，需要兩名警員攙扶先能夠上車。被送院後，佢懷疑因為拒絕提供血液樣本作酒精測試機嘅用途被捕。而且，佢喺醫院度仲大吵大鬧，醫護人員同保安要為佢著上約束衣。後來，佢被正式起訴三宗罪，包括「門窗玻璃透光度不足」、「拒絕提供血液樣本以作化驗」同埋「不小心駕駛」。開審嗰陣，作供嘅警員都話佢當時唔太清醒，而且身上仲有酒氣。去到2021年10月21日，楊明被判罪名「不小心駕駛」同埋「車窗玻璃光度不足」兩項控罪罪名成立。2022年12月，佢嘅上訴畀高等法院駁回，維持原判，除咗停牌兩年外，需即時監禁18日。法官陳仲衡仲話佢悔意一般，駕駛嘅態度「持續地差勁」，一定要判有阻嚇性的刑罰。

武漢肺炎期間涉嫌違反限聚令

楊明、莊思明、莊思敏同曹永廉等藝人喺2020年7月為電影《時代》進行拍攝，但半百演員同埋工作人員喺招待傳媒訪問及拜神儀式期間，眾多人群都無戴到口罩，被指違反限聚令，現場有路過街坊同電影工作人員同演員講叫佢哋返戴口罩，但佢哋同在場警察都無理到。

東京奧運期間被指未經同意盜用其他社交媒體專頁嘅製圖

以足球為主題嘅社交媒體專頁波事春秋，曾經喺第32屆奧林匹克運動會期間，指控楊明偷咗佢哋恭喜張家朗奪金嘅製圖，然後喺IG當自己嘅Post又冇註明來源，又冇為意佢哋落咗一個好暗嘅水印。

2021年4月22號，新加坡藝人包勳評因為醉酒駕駛被控上法庭。去到5月4號，新傳媒正式同包勳評解約。由於佢同楊明喺相對接近嘅時間期間涉嫌醉駕，所以有一啲新加坡網民揶揄佢係新加坡版楊明。不過，兩人算係同人唔同命，楊明唔止無被解約，而且繼續得到無綫電視嘅力捧。而包勳評亦因為認罪而且態度良好，後來得到新加坡資深藝人李南星旗下嘅LNX Global招攬入旗下重新出發，但楊明就唔認罪。