疊碼仔

同疊碼意思及語氣皆對應之葡文乃bate-ficha。

「疊碼仔」嘅女性專用稱呼係女疊碼／女疊碼仔／疊碼妹（粵拼：daap6 ma5 mui1）。

賭場會用低過面額些少嘅價錢，賣泥碼畀疊碼仔。陪賭嘅時候，疊碼仔通常會用面額價賣泥碼畀賭客，等佢哋用來賭錢。疊碼仔喺賭場同埋賭客中間交易，收走真銀或者現金碼，再派出泥碼，會賺到差價（俗稱碼佣／碼糧）。呢個誘因驅使疊碼仔盡量令賭客落親注都用泥碼，於是就會頻頻左換右換，渠哋個名就係由爾啲將一疊疊籌碼舞來舞去嘅動作而來。

「疊碼仔」有好多寫法：有人將「疊」寫成「沓」或者「叠」；「碼」寫成「馬」。

進客嘅職責正如其名——令客人進入賭場。英文junket乃「進客」之擬音詞。

有種職業叫做扒仔，因應語境如何，「扒仔」及「疊碼仔」嘅意思可能相近，亦可以迥異——會喺下面兩節略為説明。

澳門

理論上，要向政府攞咗牌，先至可以成為疊碼仔，得冇刑事紀錄嘅人合資格，縱使事實上有唔少人無牌執業；佢哋嘅主要任務係揾大客，帶入去賭場之中嘅賭廳賭錢；途中有得抽佣落袋，尤其是喺換泥碼呢個步驟。廳主經常會以泥碼形式向賭客放貸，而疊碼仔好多時要為此作擔保及負責追債。疊碼仔亦提供種種相關服務，有啲重係一條龍式嘅添。部分疊碼仔，重會以派發高利息作招徠，吸引人哋儲錢落去自己個賭廳户口道，作為佢哋借廳主名義，向賭客借出泥碼嘅資本，或者用嚟為收唔返嘅賭債填氹；噉樣做嘅人通常唔會俾政府阻止，不過有大把搞到資不抵債，結果俾廳主或存款者等債主收拾，再唔係就着草避禍。至於扒仔，就係專喺賭場之中或附近揾目標，呃呃啗啗，不擇手段，大小通吃嗰班。

星洲

此國嘅賭場入面，並冇見於澳門嘅賭場之內嗰啲賭廳；然而有唔少與之相似嘅營商手法都會被用到，不過博彩公司往往會將實情遮遮掩掩。博彩公司會自行及經賭場中介，招攬外國有錢人去幫襯，而賭場入面亦有啲只服待貴客嘅區域；兩者重會向賭客借出泥碼，追債時可能會喺外國法院興頌。博彩公司重會使佣金，請旅行社將泥碼買賣撈入旅行團生意之中，帶啲外國嘅普通人去賭場道落注。外地有時會將當地嘅賭場中介稱為疊碼仔。「扒仔」唔用於形容喺該國活動嘅人，縱然的確有人做其常做之事，尤其是𢲷貼士同幫大耳窿揾客。

香港

「疊碼仔」嘅意思頗為含糊，任何幫賭錢生意拉客嘅人，都可能被稱之為此。喺當地，得香港賽馬會准開賭，而佢又冇請中介人做幫手；不過，都有爾種人揾食——啗人過大海、上賭船、幫襯賭錢網站同埋賭檔，以及幫外圍賭局揾賭仔；有傳媒亦會當兑分仔係種疊碼仔。「扒仔」甚少攞嚟形容身處此地嘅人。

美國

澳洲

進客最早出現於澳門，博彩公司靠佢哋，由大陸帶人過去嗰處嘅賭館道賭錢；呢種商業模式受到其他地方仿效。自從澳門有泥碼，「疊碼仔」就流行起嚟，家陣幾乎冇人會講「進客」，縱使兩者意思大致重疊。

「疊碼仔」同「扒仔」皆通常只適用於澳門，理論上指唔同行業，不過實際上有唔少會撈埋對方嗰瓣，行外人於是習慣咗將佢哋混為一談。香港、台灣及大陸嘅傳媒，有唔少到咗今日依然唔會區分上述兩者；亦偶然會以「疊碼仔」泛指任何從事「博彩中介」呢個行業嘅人，唔限地域。