木薯

木薯嘅根塊雖然睇落似木頭，但佢屬肉質，樣似圓柱或圓錐，長3dm，直徑75mm，有好多澱粉。植株高2～5m。梗直立，木質。葉互生，樣似披針，掌狀深裂，紙質。花屬圓錐花序，單生，一般生喺梗尖，公乸同樹。花淺黃或帶紫紅。花公生喺花序頂，樣似吊鐘；花乸生喺花序底，柱頭三裂，有3嚿綠色嘅子房。果屬蒴果，樣似波或圓角長方形。籽比較光滑，啡色，有斑紋。花果期：每年4～10月。

植株要符合以下環境先至可以生得較好：

植株啱嗮喺夠陽光、土層深厚、排水比較好，重有年平均温度最低＞16℃嘅地方生。既禁kam1旱又禁kam1爛地。

木薯都幾有經濟價值。其中澱粉用途好廣泛，可以整菓糖、葡萄糖、麥芽糖、味精、啤酒、麵包、生粉整各式甜品、餅乾或者蝦片、醬料等食品；重有酒精、塑料纖維薄膜、樹脂、油漆、工業漿糊等化工用品。粗粉同葉可以做飼料。

藥用

佢嘅葉可以做藥，雖然有解毒消腫嘅功效，但凈可以外用。雖然根部都可以做藥兼內服，有亮發健腦、明目温肺、益肝健脾、和胃潤腸、養顏護膚、抑癌抗瘤、養陰補虛嘅功效，但一定要煮熟嗮先至食得。

因為木薯分有甜、苦兩個栽培品種，雖然甜品種可以直接剝皮或切成片乾燥就用得，但苦品種唔得。因為苦品種嘅木薯都帶有HCN，尤其喺皮層最多，所以必須要去毒處理先至食得，因為未經去毒處理嘅木薯，唔小心食咗些少會出現呼吸加速、血壓極速下降、脈搏加速、頭暈、頭痛、胃痛、嘔、腹瀉、精神錯亂、抽筋同埋發羊吊。食得太多嘅話會因為嚴重氰化物中毒而隨時冇命。不過市面上賣嘅木薯，一般都係甜品種。而苦品種多數用喺澱粉加工同埋工業用途。

• 中国外来植物 第178～179页　　上海科学技术出版社 ISBN 978-7-5478-0780-4/Q·4
• 抚州植物资源 第77页　　清华大学出版社 ISBN 978-7-302-20786-3