慈禧太后

佢掌權前半期，大清朝廷首先喺1864年成功鎮壓太平天國運動，隨後响奕訢、曾國藩、左宗棠、李鴻章、盛宣懷、張之洞等人領導下，興辦洋務運動，令到大清出現咗同治中興嘅局面。

1875年，清穆宗駕崩，慈禧立咗外甥載湉（醇親王奕譞嘅二阿哥）做皇帝，並將載湉過繼畀清文宗，是為清德宗，年號光緒，亦叫做光緒帝。

佢掌權後半期，1881年，慈安太后瓜老襯，慈禧太后實現一宮獨裁，其後，佢重喺1884年製造甲申易樞嘅政變，搞到奕訢失勢。

1894年，甲午戰爭爆發，慈禧太后因為挪用北洋海軍軍費重建頤和園，大受時人指責，與此同時，洋務運動宣布失敗。

1898年，清德宗任用康有為、梁啟超推行戊戌變法，但觸犯保守派官員嘅既得利益，慈禧太后發動戊戌政變，令清德宗、珍妃冇咗人身自由，重下令處斬戊戌六君子。

1900年1月24號，慈禧太后接受瓜爾佳·榮祿嘅建議，以清德宗名義頒詔，話清德宗冇生育能力，冊立端郡王載漪二阿哥溥儁做大阿哥，並改年號做保慶，史稱保慶帝，但係外國公使唔承認，慈禧被迫停止廢立計劃。同年，義和團運動爆發，八國聯軍亦乘機侵華，慈禧挾持清德宗去西安走難，並派崔玉貴掟珍妃落井。

1901年，清朝同十一國簽訂辛丑條約，同年，大清政府喺慈禧太后嘅默許下進行改革，改革比1898年嘅戊戌變法更廣泛、更深入，是為清末新政。

光緒帝死咗之後一日，慈禧太后喺1908年11月15號下晝五點鐘病死，然後葬喺菩陀峪定東陵；大行皇帝無嗣，由醇親王載灃個仔溥儀繼位（後來叫宣統皇帝，亦因為咁，宣統皇帝就繼承同治，兼祧光緒）。

佢死後極盡哀榮，謚號總共25個字：「孝欽慈禧端佑康頤昭豫莊誠壽恭欽獻崇熙配天興聖顯皇后」（簡稱孝欽顯皇后），係大清歷代皇后之最。